সততে বাতৰিত প্ৰচাৰিত হয় পঞ্চায়তৰ দূৰ্নীতিৰ কথা। কিন্তু শিৱসাগৰৰ আমগুৰিৰ এখন পঞ্চায়তে গ্ৰহণ কৰা পদক্ষেপৰ জৰিয়তে বিভিন্নজনৰ প্ৰশংসা বুটলিবলৈ সক্ষম হৈছে।
আন বহু পঞ্চায়তৰ বাবে আদৰ্শ হ’ব পাৰে এইখন পঞ্চায়ত। শিৱসাগৰ জিলাৰ আমগুৰি বিধানসভা সমষ্টিৰ দিকচু গাঁও পঞ্চায়ত ৫ হাজাৰ সাঁচি গছ আৰু ৫ হাজাৰ মাটিকঁঠালেৰে সমৃদ্ধ এখন ব্যতিক্ৰমী পঞ্চায়ত।
অহা দহ বছৰত এই গাঁও পঞ্চায়তখন কেইবা লক্ষাধিক টকাৰ গৰাকী হৈ পৰিব বুলি আশা কৰিব পাৰি। কাৰণ আগৰ থকা একোজোপা সাঁচি গছৰ মূল্য লাখ টকা পৰ্যন্ত হ’ব পাৰে।
একে সময়তে পঞ্চায়তখনে বিগত বছৰটোত পাঁচ বিঘা মাটিত পাঁচ হাজাৰ মাটিকঁঠালৰ পুলি ৰোপন কৰিছে। ইতিমধ্যে পুৰঠ হৈ উঠিছে মাটিকঁঠালসমূহ। এটা মাহৰ পিছত মাটি কঠাল বিক্ৰী কৰি লাখৰ ওচৰা-ওচৰি ধন লাভ কৰাৰ লগতে সাঁচি পুলি বিক্ৰী কৰিও লাভ কৰিব দুই লক্ষাধিক টকা।
উল্লেখযোগ্য যে, বিগত বৰ্ষতো পঞ্চায়তখনে সূৰ্যমুখী ফুলৰ খেতি কৰি লাভ কৰিছিল যথেষ্ট পৰিমাণৰ ধন। লাভ কৰা ধনৰাশিৰে পঞ্চায়ত এলেকাৰ দৰিদ্ৰ পৰিয়ালৰ শিক্ষাৰ্থীসকলক সহায় কৰা হৈছিল।
দিকচু গাঁও পঞ্চায়তৰ সভাপতি সঞ্জীৱ বৰা, অৰূপ সন্দিকৈ, মিলন খনিকৰৰ লগতে জব কাৰ্ডৰ হিতাধিকাৰী সকলৰ এনে কাৰ্যক এতিয়া সকলোৱে একেমুখে শলাগিছে।
