বিশ্বৰ বজাৰ দখল কৰিব পৰাকৈ ৰাজ্যখনৰ পৰম্পৰাগত সামগ্ৰীসমূহৰ মূল্য সংযোজনৰ বাবে উদ্ভাৱনীমূলক ধাৰণাৰ প্ৰয়োগৰ বাবে মুখ্য মন্ত্ৰী সৰ্বানন্দ সোণোৱালে আহ্বান জনাইছে।
আজি মহানগৰীৰ আমবাৰীৰত ‘আছাম ষ্টাৰ্ট আপ-দ্যা নেষ্ট’ৰ সফলতা উদযাপনৰ বাবে আয়োজিত ‘উদ্যম অসম’ শীৰ্ষক এক অনুষ্ঠানত মুখ্য অতিথিৰূপে অংশগ্ৰহণ কৰি সোণোৱালে এই আহ্বান জনায়।
ৰাজ্য চৰকাৰৰ উদ্যোগ আৰু বাণিজ্য বিভাগৰ তত্ত্বাৱধানত গঠিত সংস্থা ‘আছাম ষ্টাৰ্ট আপ-দ্যা নেষ্টে’ ইয়াৰ প্ৰতিষ্ঠাকালৰ পৰা প্ৰথমটো বৰ্ষৰ ভিতৰতে ৭৫ টা ষ্টাৰ্ট আপত উদগণি যোগাইছে।
এই ষ্টাৰ্ট আপসমূহে প্ৰায় ১১ কোটি টকাৰ ব্যৱসায় কৰাৰ লগতে ১৬৯০ গৰাকী লোকক প্ৰত্যক্ষ আৰু ৪০ হাজাৰৰো অধিক ব্যক্তিক পৰোক্ষ নিয়োগৰ সুবিধা আগবঢ়াইছে।
অনুষ্ঠানত ভাষণ প্ৰদান কৰি মুখ্য মন্ত্ৰী সোণোৱালে একবিংশ শতিকা প্ৰযুক্তিৰ যুগ বুলি কয়। জনজীৱনৰ প্ৰতিটো ক্ষেত্ৰতে এতিয়া প্ৰযুক্তিয়ে প্ৰভাৱ বিস্তাৰ কৰিছে, সমান্তৰালভাৱে মানুহৰ পছন্দও সলনি গৈ গৈ আছে বুলি মুখ্য মন্ত্ৰীয়ে কয়।
পৰম্পৰাগত সাজ-পোছাক, কাঁহ-পিতলৰ সামগ্ৰী আদিৰ দৰে ৰাজ্যখনৰ কুটীৰ উদ্যোগসমূহৰ এককত্বৰ কথা উল্লেখ সোণোৱালে কয় যে মানুহৰ দৃষ্টি আকৰ্ষণ কৰিব পৰাকৈ এইসমূহ সামগ্ৰীত সকলো উপাদানেই নিহিত হৈ আছে।
অৱশ্যে গ্ৰাহকসকলৰ পৰিৱৰ্তিত পছন্দৰ প্ৰতি লক্ষ্য ৰাখি এই ক্ষেত্ৰত আমি অধিক উদ্ভাৱনীমূলক চিন্তা-চৰ্চা কৰিব লাগিব বুলিও মুখ্য মন্ত্ৰীয়ে অনুষ্ঠানত মত ব্যক্ত কৰে।
আজিৰ অনুষ্ঠানত সোণোৱালে মাই আছাম ষ্টাৰ্ট আপ আই ডিৰ অধীনত এই কেন্দ্ৰই উদগণি যোগোৱা ৩১ টা ষ্টাৰ্ট আপলৈ বিত্তীয় অনুদানৰ প্ৰথম কিস্তিৰ চেকসমূহো বিতৰণ কৰে।
তেওঁ লগতে ‘আছাম ট্ৰেইলব্লেজাৰ্ছ’ শীৰ্ষক কফি টেবুল বুকখনৰ প্ৰথম সংস্কৰণো আনুষ্ঠানিকভাৱে উন্মোচন কৰে।
এই গ্ৰন্থখনত অসম ষ্টাৰ্ট আপৰ যাত্ৰাৰ বিৱৰণৰ লগতে ষ্টাৰ্ট আপসমূহৰ সফলতাৰ কাহিনীও সন্নিবিষ্ট কৰা হৈছে।
অনুষ্ঠানত মুখ্য মন্ত্ৰীৰ লগতে উদ্যোগ আৰু বাণিজ্য বিভাগৰ মন্ত্ৰী চন্দ্ৰ মোহন পাটোৱাৰীয়ে ভাষণ প্ৰদান কৰে।
