শিক্ষাৰ ক্ষেত্ৰত দৰিদ্ৰতা তথা শাৰীৰিক বাধাগ্ৰস্ততা কেতিয়াও হেঙাৰ হ’ব নোৱাৰে। এই কথা যুগে যুগে প্ৰতিপন্ন কৰি আহিছে এচাম মেধাৱী তথা প্ৰতিভাসম্পন্ন ছাত্ৰ-ছাত্ৰীয়ে।
ৰাজ্যত ঘোষণা হ’ল হাইস্কুল শিক্ষান্ত পৰীক্ষাৰ ফলাফল। শিৱসাগৰত থকা মাজুলীৰ জোনালী দাসে প্ৰথম বিভাগত উত্তীৰ্ণ হয়। কিন্তু কোন এই জোনালী ?
মাজুলীৰ এটি দৰিদ্ৰ পৰিয়ালৰ মেধাৱী যুৱতী জোনালী। পঢ়াৰ লগতে অনন্য প্ৰতিভা থকা জোনালীক শিৱসাগৰৰ অ’এনজিচিৰ কৰ্মচাৰী ধীৰাজ পাংগিংয়ে দুবছৰৰ পূৰ্বে শিৱসাগৰলৈ আনিছিল। জোনালীক অষ্টম শ্ৰেণীত নাম লগাই দিছিল শিৱসাগৰৰ ভূৱন চন্দ্ৰ গগৈ হাইস্কুলত। ধীৰাজ পাংগিং আৰু তেওঁৰ পৰিবাৰে জোনালীক নিজৰ ছোৱালীৰ দৰে মৰম কৰে।
আৰু জোনালীৰ পঢ়াৰ ক্ষেত্ৰত কোনো ত্ৰুতি কৰা নাছিল পাংগিং দম্পতিয়ে। তাৰেই ফলস্বৰূপ আজি জোনালীয়ে হাইস্কুল শিক্ষান্ত পৰীক্ষাত প্ৰথম বিভাগত উত্তীৰ্ণ হয়। কেৱল পঢ়াতেই নহয়, সংগীতৰ প্ৰতিও আগ্ৰহী জোনালী।
জোনালীয়ে গীত গাই ভাল পোৱাৰ বাবে ধীৰাজ পাংগিং আৰু তেওঁৰ পত্নীয়ে জোনালীক সংগীত বিদ্যালয়ত নাম ভৰ্তি কৰি দিছিল।
জোনালীৰ এই সাফল্যত এতিয়া সকলো উৎফুল্লিত।
আনহাতে চৰাইদেউ জিলাৰ সাপেখাটী সৰুপথাৰৰ অতি দৰিদ্ৰ পৰিষালৰ বিশেষভাৱে সক্ষম যুৱক সনাতন গগৈ। জন্মৰে পৰা দৃষ্টিহীন সনাতন গগৈয়ে মৰাণ জনমংগল আদৰ্শ অন্ধ বিদ্যালয়ৰ পৰা হাইস্কুল শিক্ষান্ত পৰীক্ষাত গনিত বিষয়ত লেটাৰ সহ প্ৰথম বিভাগত উত্তীৰ্ণ হয়। নিজে দৃষ্টিহীন হলেও কোনো দিনে নিজকে দৃষ্টিহীন বুলি নাভাবি অন্য দহজনৰ দৰে হাতত হাত ধৰি আগোৱাই গৈ আছো বুলি কয় সনাতন গগৈয়ে।
আনহাতে সাংস্কৃতিক ক্ষেত্ৰটো নিজৰ প্ৰতিভাৰ বাবে উজলি উঠিছে সনাতন গগৈ। তেওঁ নিজে বাঁহী, গগনা, হুতুলি আদি প্ৰস্তুত কৰাৰ লগতে ক্লাচিকেল মিউজিকৰো শিক্ষা গ্ৰহণ কৰিছে সনাতনে।
শিৱসাগৰৰ হাঁহচৰা দয়া চাৰিআলি জাঠিয়াপতীয়া গাঁৱৰ অতি দৰিদ্ৰ পৰিয়ালৰ ছাত্ৰী স্নেহা গগৈ। স্নেহাই এইবাৰ হাঁহচৰা উচ্চতৰ মাধ্যমিক বিদ্যালয়ৰ পৰা হাইস্কুল শিক্ষান্ত পৰীক্ষাত পাঁচটা বিষয়ত লেটাৰ সহ ডিষ্টিংচন লাভ কৰি সমগ্ৰ হাঁহচৰা অঞ্চললৈ গৌৰৱ কঢ়িয়াই আনিলে৷
অতি দৰিদ্ৰ পৰিয়ালয়ৰ এই ছাত্ৰী গৰাকী পঢ়া-শুনাৰ লগতে ঘৰুৱা বিভিন্ন কৰ্মতো পাৰ্গত।
ডেৰ বছৰৰ পূৰ্বে পিতৃক হেৰোৱা স্নেহাৰ মাতৃ ভানু গগৈয়ে বহু কষ্টৰে স্নেহাক পঢ়ুৱাইছে।
মাতৃসহ জীৱন সংগ্ৰাম চলাই নিয়া স্নেহাৰ উচ্চ শিক্ষাৰ বাবে এতিয়া প্ৰয়োজন হৃদয়ৱান ব্যক্তিৰ অলপ সহায়।
মনত দূৰ্দান্ত হেঁপাহ আৰু প্ৰবল ইচ্ছা শক্তি থাকিলে সকলো কামেই সহজ। আজি তাৰেই প্ৰমাণ দিলে জেনালী, সনাতন স্নেহাৰ দৰে আন বহুজনে। শিক্ষাৰ ক্ষেত্ৰত দৰিদ্ৰতা আৰু শাৰীৰিক বাধাগ্ৰস্ততা কেতিয়াও হেঙাৰ হ’ব নোৱাৰে। জোনালী, সনাতন আৰু স্নেহাৰ উজ্বল ভৱিষ্যত কামনা কৰিলোঁ।
