যোৱা ৩ জুনত ক’ল ইণ্ডিয়া লিমিটেডে উত্তৰ-পূব কয়লাক্ষেত্ৰ, মাৰ্ঘেৰিটাত সকলো খনন বাতিলৰ নিৰ্দেশ দিয়াৰ পিছৰে পৰা উত্তাল হৈ পৰিছে সমগ্ৰ মাৰ্ঘেৰিটা৷
ক’ল ইণ্ডিয়াৰ কৰ্মচাৰী, মাইনিং কোম্পানীৰ কৰ্মচাৰীৰ লগতে স্থানীয় ৰাইজ আৰু বিভিন্ন দল-সংগঠনে মাৰ্ঘেৰিটাৰ আৰ্থিক ভেটিৰ স্বৰূপ ক’ল ইণ্ডিয়া লিমিটেডক বৰ্তাই ৰখাৰ বাবে অব্যাহত ৰাখিছে ধৰ্ণা, প্ৰতিবাদ আদি কাৰ্যসূচী৷
আজি পুৱা মাৰ্ঘেৰিটা আঞ্চলিক ছাত্ৰ সন্থাৰ উদ্যোগত উত্তৰ মাৰ্ঘেৰিটা ৰঙ্গমঞ্চত মাৰ্ঘেৰিটা মহকুমাৰ ১৪টা বিভিন্ন জাতীয়-জনগোষ্ঠীয় সংগঠনৰ উমৈহতীয়া মঞ্চৰ সহযোগত উত্তৰ-পূব কয়লাক্ষেত্ৰক সুৰক্ষা দিয়াৰ দাবীত এক ধৰ্মঘট কাৰ্যসূচী ৰূপায়ণ কৰে৷
প্ৰতিবাদকাৰীসকলৰ স্পষ্ট মত যে জৈৱ বিচিত্ৰ হানি বিঘিনি নোহোৱাকৈ, প্ৰাকৃতিক ভাৰসাম্য বিনষ্ট নোহোৱাকৈ বৈজ্ঞানিক ভিত্তিত অন্তঃ খনন প্ৰক্ৰিয়াৰে কয়লা আহৰণ কৰি উদ্যোগটো পুনৰ কাৰ্যক্ষম কৰিব লাগে৷
আছু, অসম জাতীয়তাবাদী যুৱ ছাত্ৰ পৰিষদ, ছাত্ৰ মুক্তি সংগ্ৰাম সমিতি, আহোম সভা, আদিবাসী ছাত্ৰ সন্থা, গোৰ্খা ছাত্ৰ সন্থা, আটছা, আটাছুকে কৰি চৈধ্যটাকৈ জনগোষ্ঠীয় সংগঠনে এক অৱস্থান ধৰ্মঘট কাৰ্যসূচী ৰূপায়ণ কৰি কোনো কাৰণতে উত্তৰ-পূব কয়লাক্ষেত্ৰ মাৰ্ঘেৰিটা বন্ধ হ’বলৈ নিদিয়াৰ দাবী তোলে।
তেওঁলোকে উন্নত মানৰ বৈজ্ঞানিক পদ্ধতিৰে অত্যাধুনিক যন্ত্ৰপাতি ব্যৱহাৰ কৰি প্ৰকৃতি সুৰক্ষা কৰি কয়লাৰ খনন কাৰ্য চলাই মাৰ্ঘেৰিটাৰ আৰ্থিক পৰিৱেশ সুচল কৰি ৰাখিবৰ বাবে মাৰ্ঘেৰিটা মহকুমাধিপতিৰ যোগে ভাৰতৰ প্ৰধানমন্ত্ৰীলৈ এখন স্মাৰকপত্ৰ প্ৰেৰণ কৰে।
উল্লেখযোগ্য যে উত্তৰ-পূব কয়লাক্ষেত্ৰ মাৰ্ঘেৰিটাত প্ৰত্যক্ষ ভাবে ৪ হেজাৰৰো অধিক স্থায়ী আৰু অংশকালীন কৰ্মচাৰী জড়িত হৈ আছে।
ইয়াৰ উপৰি বঙাইগাঁও বিদ্যুৎ প্ৰকল্প, বোকাজান চিমেণ্ট ফেক্টৰী, একাংশ চাহ বাগিচাকে ধৰি ৰাজ্যৰ বহু ক্ষুদ্ৰ উদ্যোগ এই কয়লাৰ ওপৰত নিৰ্ভৰশীল।
