গোৱালপাৰা জিলাৰ দৰংগিৰি এছিয়া মহাদেশৰ বিখ্যাত কলৰ বজাৰ আৰু এই বজাৰখনৰ পৰাই দেশৰ বিভিন্ন প্ৰান্তৰ লগতে বিদেশলৈ কলৰ ৰপ্তানি কৰা হয়।
এছিয়াৰ ভিতৰতে বৃহৎ এই কলৰ বজাৰখনত বিগত সময়ছোৱাত প্ৰয়োজনীয় আন্তঃগাঠনিৰ অভাৱৰ বাবে ব্যৱসায়ী সকলে বিভিন্ন সমস্যাৰ সন্মুখিন হ’বলগীয়া হৈছিল।
কল ব্যৱসায়ী সকলে বহুবাৰ চৰকাৰক প্ৰয়োজনীয় আন্তঃগাঠনি নিৰ্মাণৰ বাবে আবেদন কৰিছিল যদিও এই সন্দৰ্ভত কোনোধৰণৰ গুৰুত্ব প্ৰদান কৰা হোৱা নাছিল।
শেহতীয়াভাৱে অসম চৰকাৰে অসম দৰ্শন আঁচনিৰ অধীনত দৰংগিৰি বজাৰক উন্নত মানৰ বজাৰ হিচাপে গঢ়ি তোলাৰ বাবে তৎপৰ হৈ পৰিছে।
এই আঁচনিখনৰ অধীনত দৰংগিৰি বজাৰৰ উন্নয়নৰ বাবে অসম চৰকাৰে ১ কোটি ১৯ লাখ টকাৰ অনুমোদন আগবঢ়াইছে।
অসম দৰ্শন আঁচনিৰ জৰিয়তে উন্নয়ন কৰিব লগীয়া বজাৰ প্ৰকল্পটোৰ আজি আধাৰ শিলা স্থাপন কৰে দুধনৈ সমষ্টিৰ বিধায়ক দীপক কুমাৰ ৰাভায় ৷
প্ৰস্তাৱিত প্ৰকল্পটো সম্পূৰ্ণ হৈ উঠাৰ পিচত বজাৰ খনে অন্য এক মাত্ৰা লাভ কৰিব বুলি বিধায়ক গৰাকীয়ে আশা প্ৰকাশ কৰে।
ইয়াৰ উপৰিও দৰংগিৰি কল বজাৰ কমিটি আৰু দৰংগিৰি উন্নয়ন কমিটিয়েও এই আঁচনি লাভ কৰি যথেষ্ট উৎফুল্লিত হৈ পৰিছে।
১.১৯ কোটি টকাৰে নিৰ্মাণ কাৰ্য্য আৰম্ভ হোৱা বজাৰ খনত বহুকেইটা উন্নত মানৰ প্ৰযুক্তি ব্যৱহাৰ হ’ব বুলিও বিভাগীয় কতৃপক্ষই জানিবলৈ দিয়ে।
