লাডাখৰ বৰ্তমান পৰিস্থিতিৰ সন্দৰ্ভত সামৰিক বাহিনীৰ শীৰ্ষ বিষয়াসকলৰ সৈতে আজি বৈঠকত অমংশগ্ৰহণ কৰে প্ৰতিৰক্ষা মন্ত্ৰী ৰাজনাথ সিঙে।
ইয়াৰ লগে লগে লাডাখকলৈ চলিত সপ্তাহত দ্বিতীয়বাৰ সামৰিক বাহিনীৰ শীৰ্ষ বিষয়াসকলৰ সৈতে বৈঠকত অংশগ্ৰহণ কৰে প্ৰতিৰক্ষাগৰাকীয়ে।
আনহাতে ভাৰত আৰু চীনৰ মেজৰ জেনেৰেল পৰ্যায়ৰ বৈঠক বৰ্তমানেও অব্যাহত আছে। এই বৈঠক দহদিন ধৰি চলাৰ কথা।
ভাৰতীয় সেনাৰ সূত্ৰৰ মতে পাংগং হ্ৰদৰ উত্তৰ পাৰৰ পৰিস্থিতি এতিয়াও সলনি হোৱা নাই। বৰঞ্চ সেই অঞ্চলত চীনা সৈন্যই পাথৰেৰে বাংকাৰ তৈয়াৰ কৰিবলৈ আৰম্ভ ৰৰিছে।
এনে পৰিস্থিতিত আজি চীফ অৱ ডিফেন্স ষ্টাফ বিপিন ৰাৱাট, স্থল সেনা প্ৰধান এম এম নাৰবনে, বায়ুসেনা প্ৰধান ৰাকেশ কুমাৰ ভদৌৰিয়া আৰু নৌসেনাৰ প্ৰধান কৰ্মবীৰ সিংহৰ সৈতে প্ৰতিৰক্ষা মন্ত্ৰী ৰাজনাথ সিঙে আলোচনাত মিলিত হয়।
ইপিনে লাডাখৰ পৰস্থিতিৰ সন্দৰ্ভত ভাৰত আৰু চীন সেনাৰ মেজৰ জেনেৰল পৰ্যায়ৰ বৈঠকো চলি আছে।
উল্লেখ্য যে, ৬ জুনৰ পৰা দুই দেশৰ মাজত লাডাখত কামাণ্ডাৰ স্তৰৰ বৈঠক আৰম্ভ হৈছিল। আনহাতে দুই দেশৰ ব্ৰিগেডিয়াৰ আৰু কৰ্ণেল পৰ্যায়ৰ বৈঠকো অবিৰতভাৱে চলি আছে।
আনহাতে লাডাখৰ ভাৰত-চীন সীমান্তৰ উত্তেজনাকলৈ বৰ্তমানেও কংগ্ৰেছ নেতা ৰাহুল গান্ধী সৰৱ হৈয়ে আছে।
ৰাহুল গান্ধীয়ে বাৰম্বাৰ দাবী কৰি আহিছে যে চীনে ভাৰতৰ ভূখণ্ড দখল কৰিছে।
আজি কেন্দ্ৰীয় মন্ত্ৰী ৰবি শংকৰ প্ৰসাদে ৰাহুল গান্ধীক পুনৰ আক্ৰমণ কৰি কয় যে ‘ৰাহুল গান্ধীয়ে দাবী কৰিছে, চীন সীমান্তৰ স্পৰ্শকাতৰ তথ্যৰ সন্দৰ্ভত প্ৰধানমন্ত্ৰীয়ো জ্ঞাত। কিন্তু আমি ভাবো তেওঁ এই সম্পৰ্কে জনাৰ এটি সমান্তৰাল পথ আছে। তেওঁ ডোকলাম সংকটৰ সময়ত চীন ৰাষ্ট্ৰদূতৰ লগত বৈঠক কৰা নাছিল নেকি?’
উল্লেখ্য যে ২০১৭ চনত ডোকলামত দুই দেশৰ সৈন্যবাহিনীয়ে মুখামুখি সংঘৰ্ষত লিপ্ত হৈছিল।
সেই সংকট কালত চীনৰ ৰাষ্ট্ৰদূতৰ সৈতে এক বৈঠকত ৰাহুল গান্ধী নিজেও উপস্থিত আছিল বুলি দাবী কৰি কেন্দ্ৰীয় মন্ত্ৰী প্ৰসাদে কয় যে ‘প্ৰথমে সেই খবৰ ভুৱা বুলি আখ্যা দিলেও পিছত কংগ্ৰেছ দল তথা ৰাহুল গান্ধীয়ে সেয়া সঁচা বুলি মানি লৈছিল।’
