আশী আৰু নব্বৈৰ দশকৰ কথা সেই সময়ত ভায়ামামা বুলি ক’লে হয়তো নজনা মানুহ নাছিলে৷
কমেডি জগতৰ “ভায়ামামা” কৌতুক গোষ্ঠীৰ হয়তো অসমৰ সৰ্ব প্ৰথম কৌতুক গোষ্ঠী, ভায়ামামা কৌতুক গোষ্ঠীৰ শিল্পী সকলোৰ অভিনয়ে নহঁহা জনকো হহুৱাবলৈ সক্ষম হৈছিল৷সকলোকে হহুৱাই হহুৱাই এই সংসাৰৰ পৰা বিদায় লোৱা ভায়া মামাৰ “ভায়া দা”খ্যাত ধ্ৰুৱজিৎ কিশোৰ চৌধুৰীৰ পৰিয়ালত এতিয়া হাহাঁকাৰ৷
তীব্ৰ আৰ্থিক সংকটত অভিনয় শিল্পীৰ পৰিয়ালৰ সদস্যই এতিয়া চকুৰপানীৰে বাট নেদেখা অৱস্থা৷ চৰকাৰী আঁচনি আৰু সাহায্যৰ পৰাও বঞ্চিত অভিনেতাৰ পৰিয়াল৷ ঘৰতে ক্ষুদ্ৰ দোকান দি কোনোমতে জীৱনটো চলাইছে পৰুষহীন পৰিয়ালৰ সদস্যাই৷
আপোনালোকৰ নিশ্চয় মনত আছে! যি কৌতুক গোষ্ঠীয়ে সমগ্ৰ ৰাজ্যৰ শ্ৰোতা দৰ্শকক হাঁহিৰ খোৰাক যোগাই অহাৰ লগতে বলিষ্ঠ অভিনয় আগবঢ়াই প্ৰখ্যাত হৈ পৰিছে বহু অভিনয় শিল্পীয়ে৷
তাৰ উদাহৰণ গোৱালপাৰাৰ গৌৰৱ বলিউদৰ প্ৰখ্যাত অভিনেতা ‘আদিল হুছেইন’৷ কিন্তু সেই সময়চোৱাত বলিষ্ঠ অভিনয়ৰে কমেডী জগতত খলকনি তোলা অভিনয় শিল্পীৰ পৰিয়াল বৰ্তমান কেনে আছে?
১৯৯৯ চনত এক কৰুণ দুৰ্ঘটনাত নিহত হোৱা ভায়ামামা কৌতুক গোষ্ঠীৰ শিল্পীৰ পৰিয়ালৰ খবৰ নাই অসম চৰকাৰ তথা সাংস্কৃতিক বিভাগৰ।
গোৱালপাৰা জিলা কৃষ্ণাইৰ পৰা প্ৰায় পোন্ধৰ কিলোমিটাৰ মান আঁতৰৰ ভিতৰুৱা গাঁও “ওপৰতোলাত” জন্ম হৈছিল ভায়ামামাৰ বলিষ্ঠ অভিনেতা ধ্ৰুৱজিৎ কিশোৰ চৌধুৰীৰ৷
অসমৰ ইতিহাসৰ প্ৰথম কমেডিয়ান গোষ্ঠী “ভায়ামামাৰ”এক বলিষ্ঠ চৰিত্ৰত অভিনয় কৰিছিল তেওঁ৷ ভায়ামামা কৌতুক গোষ্ঠীৰ প্ৰথম বাণিজ্যিক ভি,ডি,অ কেচেট ভায়ামামাৰ বিহু, ভায়ামামাৰ ৰামায়ণ, ভায়ামামাৰ মহাভাৰত আদিৰ বিভিন্ন কমেডী চৰিত্ৰত অভিনয় কৰি দৰ্শকক হাঁহিৰ খোৰাক জগাইছিল তেওঁ৷
আনকি সেই সময়ত গোৱালপাৰাৰ গৌৰৱ বলিউদৰ বৰ্তমানৰ প্ৰখ্যাত অভিনেতা আদিল হুছেইনো অভিনয় কৰিছিল সেই ভায়ামামা কৌতুক গোষ্ঠীত৷শ্ৰোতা-দৰ্শক হঁহুৱাই থকা সেই গৰাকী কৌতুক অভিনেতা ধ্ৰুৱজিৎ কিশোৰ চৌধুৰীৰ পৰিয়ালৰ দুৰৱস্থা দেখিলে আজি সকলোৱে কান্দিব৷
ঘৰ বুলিবলৈ ক্ষুদ্ৰ ক্ষুদ্ৰ দুটা জৰাজীৰ্ণ জুপুৰি৷ লাভ কৰা নাই কোনো চৰকাৰী আঁচনিৰ সাহায্য৷ বৰ্তমানলৈ নাই ৰেচন কাৰ্ড৷ ইমানে দূৰ্ভগীয়া যে ল’কডাউনৰ সময়ত চৰকাৰৰ দিয়া এহেজাৰ টকাৰ পৰাও বঞ্চিত হৈছে পৰিয়ালটো৷
কোনো পৰুষ সদস্য নথকা পৰিয়ালটোত আছে প্ৰয়াত শিল্পী গৰাকীৰ বৃদ্ধ মাতৃৰ লগতে তেওঁৰ তিনি গৰাকী ভগ্নী৷ বৃদ্ধ মাতৃৰ চিকিৎসাৰ বাবেও সময়ে সময়ে বিপদত পৰে তেওঁলোক৷
শিল্পী গৰাকীৰ মৃত্যুৰ পিছত পত্নীয়েও পতি গৃহ এৰি যোৱাৰ পিছত দুই ভগ্নীৰ সামান্য উপাৰ্জনৰে কোনোমতে চলি আছেপৰিয়ালটো৷
এগৰাকী ভগ্নীয়ে ঘৰতে এখন ক্ষুদ্ৰ দোকান দিয়াৰ লগতে এগৰাকী ভগ্নীয়ে এখন ব্যক্তিগত বিদ্যালয়ত শিক্ষকতা কৰি কোনো মতে চলাই আছে পৰিয়ালটো৷
কিন্তু অসহায় পৰিয়ালটোৰ কাষত থিয় দিবনে অসম চৰকাৰৰ সাংস্কৃতিক বিভাগে? সেয়ে চৰকাৰৰ সহযোগ কামনা কৰিছে এতিয়া পৰিয়ালৰ লোকে ৷
