বলীউদ জোকাৰি যোৱা অভিনেতা সুশান্ত সিং ৰাজপুতৰ আত্মহত্যাৰ ঘটনাৰ পাছত বিষয়টোক লৈ এতিয়া নতুন নতুন অধ্যায় উন্মোচিত হৈছে।
আৰক্ষীয়ে তেওঁলোকৰ তদন্তৰ আওতা বৃদ্ধি কৰি অভিনেতাগৰাকীৰ বন্ধু, ঘৰুৱা কামকৰা লোক তথা আত্মীয়ৰ লগতে সুশান্তৰ সৈতে কাম কৰা শিল্পী আৰু প্ৰডাকশ্যন হাউছসমূহকো সোধপোছ কৰিবলৈ লৈছে।
সুশান্ত সিং ৰাজপুতৰ আত্মহত্যাৰ গোচৰত মুম্বাই আৰক্ষীয়ে বলীউদৰ অভিনেত্ৰী তথা সুশান্তৰ ঘনিষ্ঠ বান্ধৱী ৰিয়া চক্ৰৱৰ্তীক বৃহস্পতিবাৰে পুৱা ১১বজাৰ পৰা নিশা ১০বজালৈ জেৰা কৰে।
মুম্বাই আৰক্ষীয়ে ৰিয়াৰ সৈতে প্ৰায় ১১ঘন্টা সোধপোছ চলায়।
বাতৰি অনুসৰি সুশান্ত সিং ৰাজপুতে এইগৰাকী গাৰ্লফ্ৰেণ্ড বুলি পৰিচিত অভিনেত্ৰীৰ সৈতে এখন ৰোমান্টিক তথা কমেডি ছবিত কাম কৰাৰ কথা আছিল।
বান্দ্ৰা আৰক্ষী থানাত সোধপোছৰ পাছত অভিনেত্ৰী ৰিয়াই সংবাদ মাধ্যমৰ আগত মুখ খোলা নাই।
সুশান্ত সিং ৰাজপুতৰ ব্যৱসায়িক মেনেজাৰ শ্ৰুতি মোদী আৰু তেওঁৰ জনসম্পৰ্কৰক্ষী অংকিতা নেহলানিকো সোধপোছ কৰা হয়।
ইয়াৰ পূৰ্বে আৰক্ষীয়ে বলীউদৰ কাষ্টি ডাইৰেক্টৰ তথা সুশান্তৰ শেহতীয়া ছবিখনৰ পৰিচালক মুকেশ ছাবড়াক প্ৰায় ৭ঘন্টা ধৰি জেৰা চলাইছিল।
আৰক্ষী সূত্ৰই জানিবলৈ দিয়া মতে, এই গোচৰত প্ৰায় পাঁচটা প্ৰডাকশ্যন হাউছ আৰু প্ৰডিউচাৰকো সোধপোছ কৰা হ’ব।
এতিয়ালৈকে আৰক্ষীয়ে মুঠ ১১গৰাকী ব্যক্তিৰ ভাষ্য লিপিবদ্ধ কৰিছে।
আনহাতে, বাতৰি অনুসৰি বিগত কেইবছৰত সুশান্ত সিং ৰাজপুতে নাগালেণ্ড চৰকাৰক প্ৰায় ১কোটিতকৈয়ো অধিক টকা সাহায্য পুঁজিলৈ দান দিছিল।
