অহা ২৮ ফেব্ৰুৱাৰীৰ পৰা ৪ মাৰ্চলৈকে পাঁচদিনীয়া কাৰ্যসূচীৰে বৰপেটা সত্ৰত শ্ৰী শ্ৰীকৃষ্ণৰ দৌল মহোৎসৱৰ ব্যাপক প্ৰস্তুতি চলিছে।
প্ৰচাৰ, সাংস্কৃতিক বিভাগ, আতিথ্য আৰু অভ্যৰ্থনাকে ধৰি মুঠতে ১৭ খন উপ সমিতি গঠন কৰা হৈছে। তেওঁলোকে মহোৎসৱখনি সাফল্যমণ্ডিত কৰি তুলিবলৈ পূৰ্ণ গতিত কাম কাজ চলাই আছে। মহোৎসৱখনি সম্পূৰ্ণ সত্ৰীয়া ৰীতি আৰু পৰম্পৰাৰে অনুষ্ঠিত কৰা হ’ব।
এই বছৰ দৌল মহোৎসৱৰ প্ৰথম দিনা বহ্নোৎসৱ বা গন্ধৰ্ৱ যাত্ৰা পালন কৰা হ’ব।
দৈনিক দুপৰীয়া প্ৰসংগৰ পিছত দৌল গোৱিন্দ আৰু কলীয়া গোঁহাইক মণিকূট বা ভাঁজঘৰৰ পৰা গায়ন বায়নৰ সৈতে পূব দূৱাৰেদি বাহিৰলৈ উলিয়াই অনা হয়।
দুয়োটা মূৰ্তিকে মঠৰ সন্মুখভাগত ৰখা হ’ব। দুয়োটাকে সন্ধিয়া মেজিৰ চাৰিওফালে সাতবাৰকৈ প্ৰদক্ষিণ কৰোৱা হ’ব আৰু তাৰপিছত দৌলত উঠাব। সেই সন্ধিয়া স্থানীয় শিল্পীৰ দ্বাৰা হিলৈ-ফটকাৰ প্ৰদৰ্শন কৰা হ’ব।
মাৰ্চৰ ১, ২ আৰু ৩ তাৰিখে ভৰ দৌল উদযাপন কৰিব। পুৰুষ আৰু মহিলা ভকতসকলৰ দ্বাৰা পুৱাৰ নিয়মীয়া প্ৰসংগৰ পিছতে আটাইকেইদিন ‘’জগমোহন গৃহ’’ত ভাগৱত পাঠ, ভোজন ব্যৱহাৰ, ঘোষা কীৰ্তন আৰু ব্যাস কীৰ্তন অনুষ্ঠিত হ’ব।
সত্ৰৰ বুঢ়া সত্ৰীয়াই ভৰ দৌলৰ প্ৰথম দিনা ফাকুৰে প্ৰাৰ্থনা আগবঢ়াব আৰু তাৰপিছতে এই দুদিনত আন ভকতসকলে এই সেৱা আগবঢ়াব।
যদিও বহ্নোৎসৱৰ পৰা দৌলৰ সময়খিনিত মূৰ্তি দুটা সলনি কৰা অৱস্থাতে থাকিব, কিন্তু ২ মাৰ্চৰ গধূলি ১০ বজাৰ পিছত উত্তৰ ফাল্গুনী নক্ষত্ৰৰ সময়ছোৱাত ঘটা কিছু জ্যোতিষ শাস্ত্ৰৰ ক্ৰিয়াৰ বাবে তেওঁলোকক ‘’জগমোহন গৃহ’’লৈ লৈ যোৱা হ’ব।
মহোৎসৱৰ শেষৰ দিনা অৰ্থাৎ ৪ মাৰ্চত ফাকুৱা বা বৰপেটাৰ বিখ্যাত সুঁৱেৰি উৎসৱ উদযাপন কৰা হ’ব।
দৌল মহোৎসৱৰ চাৰিওটা দিনতে বিভিন্ন সাংস্কৃতিক কাৰ্যসূচীৰ আয়োজন কৰা হৈছে। অহা ২৮ ফেব্ৰুৱাৰীত গন্ধযাত্ৰাৰ দিনাই ৰাজ্যিক পৰ্যায়ত এটা হোলী গীত প্ৰতিযোগিতাৰ আয়োজন কৰা হৈছে।
