নাগালেণ্ডৰ জখামত থকা ভাৰতীয় সেনা বাহিনীৰ চাউনীৰ ১৫ গৰাকী সেনা জোৱানৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।
নাগালেণ্ডৰ জখামত থকা সেনা চাউনীলৈ ক’ৰ’না আক্ৰান্ত সেনা বাহিনীৰ জোৱান সকল বিগত সপ্তাহত অন্য ৰাজ্যৰ পৰা বদলি হৈ আহিছিল।
অন্য ৰাজ্যৰ পৰা নাগালেণ্ডলৈ বদলি হৈ অহাৰ সময়তে সেনা জোৱান সকলৰ ক’ৰ’নাৰ পৰীক্ষা কৰা হয় আৰু এই পৰীক্ষাত ১৫ গৰাকী জোৱানৰ ফলাফল পজিটিভ আহে।
ক’ৰ’না আক্ৰান্ত সেনা জোৱান সকলক বৰ্তমান জখামত থকা সেনা বাহিনীৰ চিকিৎসালয়ত চিকিৎসা প্ৰদান কৰি থকা হৈছে।
আনহাতে, জখামৰ স্থানীয় ৰাইজে জিলা প্ৰশানক জখামৰ সেনা চাউনীক কণ্টেইনমেণ্ট জ’ন হিচাপে ঘোষণা কৰাৰ বাবে আহ্বান জনাইছে।
উল্লেখযোগ্য যে, ইয়াৰ পূৰ্বে ত্ৰিপুৰাত থকা ভাৰতীয় সীমান্ত সুৰক্ষা বাহিনীৰ জোৱান সকলৰ কাৰ্য্যালয়ত ক’ৰ’না ভাইৰাছৰ ব্যাপক সংক্ৰমণ ঘটিছিল।
ত্ৰিপুৰাত শতাধিক বি এছ এফৰ জোৱান ক’ৰ’নাত আক্ৰান্ত হৈছিল।
নাগালেণ্ডত নতুনকৈ ক’ৰ’না আক্ৰান্ত হোৱা ১৫ গৰাকী সেনা জোৱানকে ধৰি ৰাজ্যখনত মুঠ ক’ৰ’না আক্ৰান্তৰ সংখ্যা ৩৭১ গৰাকীলৈ বৃদ্ধি পাইছে।
