ভাৰতে চীনা এপছ নিষিদ্ধ কৰাৰ ঘটনাত গভীৰ উদ্বেগ প্ৰকাশ কৰিছে চীনে।
উল্লেখ্য যে, কালি ভাৰতে টিকটকসহ ৫৯ টা চীনৰ এন্দ্ৰয়ড এপছ নিষিদ্ধ কৰিছিল।
নতুন দিল্লীৰ এই সিদ্ধান্তৰ পিছতে মঙলবাৰে চীনৰ বৈদেশিক মন্ত্ৰালয়ে নিজৰ প্ৰতিক্ৰিয়া প্ৰকাশ কৰি এইদৰে কয়।
সোমবাৰে টিকটক, ইউ চি ব্ৰাউজাৰ, শ্বেয়াৰ-ইট, উই চাট, কেম-স্কেনাৰকে আদি কৰি ৫৯ টা চীনা এপছ কেন্দ্ৰীয় চৰকাৰে নিষিদ্ধ কৰাৰ পিছত দুই দেশৰ মাজত ডিজিটেল উত্তেজনা বৃদ্ধি পোৱা পৰিলক্ষিত হৈছে।
কেন্দ্ৰীয় চৰকাৰৰ দাবী যে, ভাৰতৰ সুৰক্ষা, সংহতি, নিৰাপত্তা ও সাৰ্বভৌমত্ব ৰক্ষা আৰু দেশৰ সাধাৰণ মানুহৰ তথ্যৰ নিৰাপত্তাৰ নিশ্চিত কৰিবলৈ এই সিদ্ধান্ত গ্ৰহণ কৰিছে।
এই এপবোৰ লগতে অনলাইন শ্বপিং চাইট আলিবাবা, টেনছেন্ট আদি একাধিক সংস্থাকো নিষিদ্ধ কৰা হৈছে ভাৰতত।
ভাৰতে চীনৰ বিৰুদ্ধে ‘ডিজিটেল ষ্ট্ৰাইক’ চলাইছে নেকি বুলি সোধা এক প্ৰশ্নৰ উত্তৰত চীনৰ বৈদেশিক মন্ত্ৰালয়ৰ মুখপাত্ৰ ঝাও লিজিয়ানে সংবাদ এঞ্চেন্সি ৰয়টাৰক কয়, “চীন এই ঘটনাটোক লৈ গভীৰভাৱে উদ্বিগ্ন।”
ইফালে কেন্দ্ৰীয় চৰকাৰে ৫৯ টা এপ নিষিদ্ধ কৰাৰ লগতে সংশ্লিষ্ট সংস্থাবোৰৰ পৰা বিস্তাৰিতভাৱে ব্যাখ্যাও বিচাৰিছে।
জনপ্ৰিয় ভিডিঅ’ এপ টিকটকে দাবী কৰিছে যে দেশৰ গ্ৰাহকৰ কোনো তথ্য বিদেশ তথা চীনৰ হাতত তুলি দিয়া নাই।
তেওঁলোকে ভাৰত চৰকাৰ সকলো নিয়ম আৰু নিৰ্দেশনা মানি আহিছে আৰু চলিব বুলিও কয়।
