কেৱল বজাৰলৈ গ’লেই অনুভৱ কৰিব পাৰি যে কেঁচা শাক-পাচলি, পিঁয়াজ, আৰু আনকি সৰু সৰু বস্তুৰ দামো কিমান বাঢ়িছে। বজাৰত বহুদিনৰ পৰাই মহঙা দৰ চলি আছে। দাম কমি অহাৰ কোনো লক্ষণ দেখা যোৱা নাই।
এইবাৰ ইয়াৰ প্ৰভাৱ পৰিছে দেশৰ খুচুৰা মুদ্ৰাস্ফীতিৰ ওপৰত। আগষ্ট মাহত যিটো হাৰ ৪.৮৩ শতাংশ আছিল, সেয়া ছেপ্টেম্বৰ মাহত ৫.৫৪ শতাংশলৈ বৃদ্ধি পাইছে। চৰকাৰী পৰিসংখ্যা অনুসৰি এমাহত পিঁয়াজৰ মূল্য ৪৮.৭৮ শতাংশৰ পৰা ১০৮.০৯ শতাংশলৈ বৃদ্ধি পাইছে। হালধি আৰু নেমুৰ দামও যথেষ্ট বৃদ্ধি পাইছে।
খাদ্য সামগ্ৰীৰ মূল্য বৃদ্ধিৰ ছবিখন গ্ৰাহক খাদ্য মূল্য সূচকাংক (CFPI)ৰ পৰিসংখ্যাত অধিক স্পষ্ট। আগষ্ট মাহত খাদ্য সামগ্ৰীৰ মুদ্ৰাস্ফীতিৰ হাৰ আছিল ৫.৯৭ শতাংশ। ছেপ্টেম্বৰ মাহত ৭.৭৪ শতাংশলৈ বৃদ্ধি পাইছে। ফলত খুচুৰা মুদ্ৰাস্ফীতিৰ বৃদ্ধিয়ে ৰিজাৰ্ভ বেংকৰ ৪ শতাংশ লক্ষ্য অতিক্ৰম কৰিছে। অৱশ্যে এতিয়াও ই কেন্দ্ৰীয় বেংকৰ ২ৰ পৰা ৬ শতাংশ সহনসীমাৰ পৰিসৰৰ ভিতৰত আছে।
এই মুদ্ৰাস্ফীতিৰ চাপৰ মাজতে ভাৰতীয় ৰিজাৰ্ভ বেংকে যোৱা সপ্তাহত ৰেপো ৰেট ২৫ বেছিছ পইণ্ট বৃদ্ধি কৰি ৫.৫০ শতাংশলৈ বৃদ্ধি কৰে। ৰেপো হাৰ বৃদ্ধিয়ে বেংকৰ বাবে ঋণ লোৱাৰ খৰচ বৃদ্ধি কৰিব পাৰে, যাৰ ফলত ঋণৰ সুতৰ হাৰতো প্ৰভাৱ পৰিব। ফলত মধ্যবিত্ত শ্ৰেণীয়ে কেৱল বজাৰ বা খাদ্যৰ বাবেই নহয়, আন বহু কাৰণত চাপ অনুভৱ কৰিছে।
খাদ্য সামগ্ৰীৰ ভিতৰত ছেপ্টেম্বৰ মাহত আটাইতকৈ বেছি বৃদ্ধি পাইছে পিঁয়াজৰ দাম। আগষ্ট মাহত পিয়াঁজৰ মুদ্ৰাস্ফীতিৰ হাৰ ৪৮.৭৮ শতাংশৰ পৰা ছেপ্টেম্বৰ মাহত ১০৮.০৯ শতাংশলৈ বৃদ্ধি পাইছে। অৰ্থাৎ এবছৰ আগৰ তুলনাত পিঁয়াজৰ দাম বৃদ্ধিৰ হাৰ ১০০ শতাংশ অতিক্ৰম কৰিছে। নহৰুৰ ক্ষেত্ৰতো ছবিখন চিন্তনীয়। আগষ্ট মাহত নহৰুৰ মুদ্ৰাস্ফীতিৰ হাৰ ৪৩.৬০ শতাংশ হোৱাৰ বিপৰীতে ছেপ্টেম্বৰ মাহত ৫৪.৬২ শতাংশলৈ বৃদ্ধি পাইছে। নেমুৰ ক্ষেত্ৰত এই হাৰ ১৫.১৫ শতাংশৰ পৰা ৩৬.৪১ শতাংশলৈ বৃদ্ধি পাইছে।
খাদ্য সামগ্ৰীৰ উপৰিও ব্যক্তিগত পৰিচৰ্যা, সামাজিক সুৰক্ষা আৰু অন্যান্য সামগ্ৰী আৰু সেৱাৰ শিতানত মুদ্ৰাস্ফীতিৰ হাৰ ছেপ্টেম্বৰ মাহত ১৩.৭৫ শতাংশ। ৰেষ্টুৰেণ্ট আৰু হোটেলত থকা-সেৱাৰ খৰচ ৯.৩৬ শতাংশ বৃদ্ধি পাইছে।
পৰিবহণ খণ্ডত মুদ্ৰাস্ফীতিৰ হাৰ ৫.০১ শতাংশ। ব্যক্তিগত গাড়ী চলোৱাৰ ব্যয় বৃদ্ধি হৈছে ৭.৪৬ শতাংশ। স্বাস্থ্য সেৱাৰ মুদ্ৰাস্ফীতি ১.৪০ শতাংশ, গৃহ আৰু উপযোগী সেৱাত ২.৭৪ শতাংশ আৰু শিক্ষা খণ্ডত ৩.৯৪ শতাংশ।
ছেপ্টেম্বৰৰ পৰিসংখ্যাই দেখুৱাইছে যে খাদ্যৰ মূল্য বৃদ্ধিয়ে সামগ্ৰিকভাৱে খুচুৰা মুদ্ৰাস্ফীতি বৃদ্ধিৰ দিশে ঠেলি দিছে। বিশেষকৈ পিঁয়াজ, নহৰু আৰু নেমুৰ দাম বৃহৎ বৃদ্ধিয়ে সাধাৰণ মানুহৰ দৈনন্দিন খৰচৰ ওপৰত চাপ বৃদ্ধি কৰিব পাৰে।
