কিছুদিন পূৰ্বে উত্তৰাখণ্ডৰ ধাৰাচুলাৰ পৰা লিপুলেখলৈকে ৰাস্তা নিৰ্মাণৰ কামত বাধা প্ৰদান কৰিছিল নেপালে।
ইয়াৰ পাছতে সংবিধান সংশোধন কৰি কে পি শৰ্মা অ’লিৰ চৰকাৰে ভাৰতৰ তিনিখন ঠাই নিজৰ মানচিত্ৰত অন্তৰ্ভুক্ত কৰে।
বিষয়টোক লৈ দুয়োখন দেশৰ মাজত আৰম্ভ হোৱা সংঘাত এতিয়াও চলি আছে।
ইপিনে, ইয়াৰ মাজতে এইবাৰ বিহাৰৰ সীতামাৰি জিলাৰ নেপাল সীমান্ত অঞ্চলত ভাৰতে নিৰ্মাণ কৰি থকা এটা ঘাইপথৰ কাম নেপালে বন্ধ কৰি দিয়ে।
এতিয়া ইয়াকে লৈ পুনৰ দিল্লী আৰু কাঠমাণ্ডুৰ মাজত উত্তেজনাৰ উপক্ৰম হৈছে।
বিহাৰৰ ৬৩১ কিলোমিটাৰ জোৰা অঞ্চল নেপালৰ সৈতে সীমান্তত আছে। বিহাৰ চৰকাৰে ইমানদিন ধৰি এই অঞ্চলত ৰাস্তা নিৰ্মাণৰ কাম কৰি আহিছে যদিও কোনোদিনে বাধাৰ সন্মুখীন হোৱা নাছিল।
পিচে, কিছুদিন ধৰি বিহাৰ চৰকাৰৰ বিভিন্ন উন্নয়নমূলক কামত নেপাল চৰকাৰে বাধা দিবলৈ লৈছে।
কেইদিনমান আগতে ৰাজ্যখনৰ চম্পাৰণ জিলাৰ নেপাল সীমান্তৰ সমীপত থকা লালবকেয়া নদীৰ ওপৰত নিৰ্মাণ কৰা এটা বান্ধৰ কামত তেওঁলোকে বাধা দিছিল।
সেই সময়ত নেপালৰ সীমান্তৰক্ষী বাহিনীয়ে সিপাৰৰ পৰা গুলীচালনা কৰি সীতামাৰিৰ এজন বাসিন্দাক নিহত কৰে।
এইবাৰ নেপালে সীতামাৰিৰ পৰা ভিট্টাম’ৰলৈকে নিৰ্মাণ কৰা ঘাইপথৰ কাম বন্ধ কৰি দিয়ে। ভাৰতে নো মেনছ লেণ্ডৰ ওপৰত এই পথ নিৰ্মাণ কৰা বুলি নেপালে অভিযোগ কৰিছে।
কিন্তু সংশ্লিষ্ট ভাৰতীয় বিষয়াসকলে তেওঁলোকৰ এই দাবী মিছা বুলি অস্বীকাৰ কৰিছে।
বুধবাৰে নেপালৰ সীমান্তৰক্ষী বাহিনীৰ লোকে বাধা দিয়াত সৃষ্টি হোৱা উত্তেজনাৰ পাছত ভাৰতীয় সীমান্ত সুৰক্ষা বাহিনী আৰু সীতামাৰি জিলাৰ আৰক্ষীয়ে ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে।
বিহাৰ চৰকাৰৰ প্ৰশাসনে এই বিষয়ৰ বিস্তৃত প্ৰতিবেদন ইতিমধ্যে কেন্দ্ৰীয় গৃহ মন্ত্ৰ্যালয়লৈ প্ৰেৰণ কৰিছে।
