লাডাখ সংকটৰ পিছতে চীনৰ বিৰুদ্ধে অধিক কঠোৰ হৈছে ভাৰত। ইতিমধ্যে ভাৰতে চীনৰ ৫৯ টাকৈ এপ নিষিদ্ধ কৰাৰ পিছত এইবাৰ ভাৰতত ব্যৱসায়িক সাম্ৰাজ্য গঢ়ি তোলা ৭ টাকৈ চীনৰ কোম্পানীৰ বিৰুদ্ধে ব্যৱস্থা গ্ৰহণৰ বাবে সাজু হৈছে চৰকাৰ।
ভাৰতে নজৰত ৰখা এই সাতটা কোম্পানীৰ ভিতৰত হুৱেই,আলিবাবা,ঝিনজিং কেথে ইন্টাৰনেছনেল,চাইনা ইলেক্ট্ৰিকেল টেকন’ল’জি গ্ৰুপ,টেনচেন্ট,এছ এ আই চি মটৰ কৰ্পৰেছন আদি অন্যতম।
চৰকাৰে অভিযোগ কৰা অনুসৰি এই কোম্পানী কেইটাই চীনৰ সেনা বাহিনী পি এল এৰ সৈতে পোনপটীয়া অথবা পৰোক্ষ ভাৱে সম্পৰ্ক ৰক্ষা কৰি আহিছে।
চীনৰ টেলিকম কোম্পানী হুৱেইৰ প্ৰতিষ্ঠাপক ৰেং জেংফেই এটা সময়ত পি এল এৰ উপ-সঞ্চালক আছিল।
ভাৰতত ২০১৮-১৯ বিত্তীয় বৰ্ষত কোম্পানীটোৱে ব্যৱসায় কৰিছে প্ৰায় ১২,৮০০ কোটি টকাৰ।
শেহতীয়াকৈ ৫জি সংযোগক লৈ আমেৰিকা, জাপান, ব্ৰিটেইন,অষ্ট্ৰেলিয়া আদি দেশৰ সৈতে হুবেই কোম্পানীৰ সংঘাত হৈছে।
ফলত বহু কেইখন দেশে কোম্পানীটো নিষিদ্ধ কৰাৰ দিশে অগ্ৰসৰ হৈছে।
আলিবাবা আৰু বাইডু কোম্পানী দুটা চীনৰ কৃত্ৰিম চোৰাংচোৱা প্ৰকল্পৰ সৈতে জৰিত হৈ আছে।
চীনৰ আলিবাবা কোম্পানীয়ে ভাৰতত জমেট’,পেটিএম, স্নেপডিল আদি পৰিচালনা কৰি আহিছে।
একেদৰে টেনচেন্টে ফ্লিপকাৰ্টত বিনিয়োগ কৰিছে প্ৰায় ৭০০ নিযুত মাৰ্কিন ডলাৰ।
অ’লা কেবছতো কোম্পানীটোৱে বিনিয়োগ কৰিছে ৪০০ নিযুত ডলাৰ।
এনে কোম্পানী সমূহৰ জৰিয়তে ভাৰতৰ বহু গুৰুত্বপূৰ্ণ তথ্য চীনে লাভ কৰি থকাৰ অভিযোগতে কোম্পানী কেইটাৰ বিৰুদ্ধে ব্যৱস্থা গ্ৰহণৰ কথা ভাবিছে ভাৰত চৰকাৰে।
