ভাৰতৰ ঐতিহ্যৰ পৰিপন্থী বামপন্থী ভাৱধাৰাৰ দ্বাৰা অনুপ্ৰাণিত হৈ সংবিধানত সন্নিৱিষ্ট কৰা বুলি দাবী কৰি দুটা শব্দক মুচি পোলাৱাৰ বাবে সৰ্বোচ্চ ন্যায়ালয়ত আৰ্জি পেচ কৰিছে দেশৰ দুজন আইনজীৱীসহ এজন লোকে।
সংবিধানৰ প্ৰস্তাৱনাত উল্লেখ থকা ‘সমাজবাদ’(Socialist) আৰু ধৰ্মনিৰপেক্ষতা(Secular) এই দুই শব্দক সংবিধানৰ পৰা আঁতৰাই পেলোৱাৰ বাবে উচ্চতম ন্যায়ালয়ত আবেদন দাখিল কৰিছে দেশৰ দুই আইনজীৱী বলৰাম সিং, কৰুণেশ কুমাৰ আৰু প্ৰৱেশ কুমাৰ নাৰ এজন লোকে।
তেওঁলোকে আবেদনত কয় যে উক্ত দুয়োটা শব্দকে সংবিধানৰ পৰা আঁতৰাই দিবলৈ উচ্চতম ন্যায়ালয়ে কেন্দ্ৰীয় চৰকাৰক নিৰ্দেশ দিব লাগে।
উল্লেখ্য যে সংবিধানৰ ওপৰত ধৰ্মান্ধ আৰু ফেচিষ্ট মনোবৃত্তিৰ লোকৰ আক্ৰমণ এয়াই প্ৰথম নহয়।
ইয়াৰ পূৰ্বেও ২০১৬ চনত এলাহাবাদ উচ্চ ন্যায়ালয়ত এই একেটা সংক্ৰান্তত আবেদন দাখিল কৰা হৈছিল যদিও উচ্চ ন্যায়ালয়খনে সেই আবেদন গ্ৰহণ কৰা নাছিল।
আবেদনকাৰীকেইজনে কাৰ্ল মাক্সৰ ভাৱধাৰাৰ দ্বাৰা অনুপ্ৰাণিত হৈ এই শব্দ দুটা সংবিধানত যোগ দিয়া বুলি দাবী কৰিছে।
তেওঁলোকৰ মতে ভাৰতীয় হাজাৰ বছৰীয়া ধৰ্মীয় ঐতিহ্য, আৰ্থ-সামাজিক পৰিস্থিতি, ধৰ্মীয় বিশ্বাস, প্ৰাচীন সংস্কৃতিৰ আদিৰ সৈতে মাক্স বা কমিউনিষ্ট ভাৱধাৰাৰ কোনো মিল নাই।
সেয়ে এই শব্দ দুটি ভাৰতীয় এতিহ্য আৰু সামাজিক ভাৱধাৰাৰ বিৰোধী।
উল্লেখ্য যে, ১৯৭৬ চনৰ ৪২ সংখ্যক সংশোধনীত ভাৰতৰ সংবিধানৰ প্ৰস্তাৱনাত এই শব্দ দুটি যোগ দিয়া হৈছিল।
