চাহ বিক্ৰীৰ আঁৰত এখন সম্পূৰ্ণ ভুৱা চিকিৎসা মহাবিদ্যালয় চলি আছিল, আৰু সেই প্ৰতিষ্ঠানৰ চেয়াৰমেন হিচাপে বহি আছিল স্বয়ং এজন স্থানীয় চাহ বিক্ৰেতা! উত্তৰ প্ৰদেশৰ এনে অবিশ্বাস্য আৰু অত্যন্ত উদ্বেগজনক জালিয়াতিৰ ঘটনাক লৈ ক্ষুব্ধ হৈ পৰিছে উচ্চতম ন্যায়ালয়।
দেশৰ সৰ্বোচ্চ ন্যায়ালয়ে বিষয়টোক কেৱল অবৈধ বুলিয়েই নহয়, শিক্ষা আৰু স্বাস্থ্য ব্যৱস্থাৰ বাবেও এক চৰম আঘাত বুলি অভিহিত কৰিছে। শীৰ্ষ আদালতে লগতে একে সময়তে বিশ্ববিদ্যালয় অনুদান আয়োগ বা ইউজিচিক চূড়ান্ত নিষ্ক্ৰিয়তাৰ বাবে তীব্ৰ ভৎৰ্সনা কৰিছে।
আদালতত দাখিল হোৱা তথ্য অনুসৰি উত্তৰ প্ৰদেশৰ স্বঘোষিত চিকিৎসা মহাবিদ্যালয়খন দীৰ্ঘদিন ধৰি কোনো আইনী অনুমোদন বা আন্তঃগাঁথনি অবিহনে চলি আছিল আৰু সাধাৰণ ছাত্ৰ-ছাত্ৰীক ডিগ্ৰীৰ প্ৰলোভন দেখুৱাই লাখ লাখ টকা আত্মসাৎ কৰা হৈছিল।
আটাইতকৈ চকু কপালত তুলিব পৰা কথাটো হ’ল সেই স্থানীয় চাহ বিক্ৰেতাজনক প্ৰতিষ্ঠানটোৰ মুৰব্বী পদত বহুওৱা হৈছিল যিজন প্ৰকৃত প্ৰৱঞ্চকসকলৰ হাতৰ পুতলা হিচাপে ব্যৱহাৰ হৈছিল। ন্যায়ধীশসসকলে আশ্চৰ্য্য প্ৰকাশ কৰি কয়, য’ত সাধাৰণ মানুহৰ জীৱন আৰু ভৱিষ্যত জড়িত হৈ আছে, তাত চাহ বিক্ৰেতা এজন নিজে কেনেকৈ চিকিৎসা মহাবিদ্যালয়ৰ মুৰব্বী হৈ বহি থাকিব পাৰে?
এই ঘটনাত উচ্চতম ন্যায়ালয়ে কেৱল উত্তৰ প্ৰদেশ চৰকাৰকে নহয়, ইউজিচিৰ দায়িত্বহীন ভূমিকাক লৈও গুৰুতৰ প্ৰশ্ন উত্থাপন কৰিছে। ন্যায়াধীশসকলে স্পষ্টকৈ সকীয়াই দিয়ে, নাকৰ তলতে কেনেকৈ দিনক দিনে গঢ়ি উঠিছে এনে ভুৱা উচ্চ শিক্ষানুষ্ঠান আৰু কিয় কুম্ভকৰ্ণৰ দৰে শুই আছে ইউ জি চি? কেৱল জাননী প্ৰেৰণ বা ভুৱা বিশ্ববিদ্যালয়ৰ তালিকা প্ৰকাশ কৰি আয়োগে নিজৰ দায়িত্বৰ পৰা আঁতৰি থাকিব নোৱাৰে।
আদালতে নিৰ্দেশ দিয়ে যে অপৰাধমূলক আইনৰ অধীনত এনে অকৰ্তৃত্বশীল ভুৱা প্ৰতিষ্ঠানৰ বিৰুদ্ধে তৎকালীনভাৱে কঠোৰ আইনী ব্যৱস্থা গ্ৰহণ কৰি ইয়াৰ মূল ষড়যন্ত্ৰকাৰীসকলক চিনাক্ত কৰি দৃষ্টান্তমূলক শাস্তি নিশ্চিত কৰিব লাগিব।
উচ্চতম ন্যায়ালয়ে স্পষ্ট কৰি দিছে যে যুৱ প্ৰজন্মৰ ভৱিষ্যতৰ সৈতে এনে জঘন্য খেল কোনো ধৰণে সহ্য কৰা নহ’ব।
