“অসমৰ প্ৰথম গৰাকী শ্বহীদ সাংবাদিক কমলা শইকীয়া আছিল সাহসী, স্পষ্টবাদী আৰু সততাৰ প্ৰতীক৷ জীৱিত কালত আপোচবিহীন সাংবাদিক, সমাজকৰ্মী গৰাকীয়ে নিজ কৰ্মৰ যোগেদি নিজৰ চিনাকী যুগমীয়া কৰি থৈ গৈছে৷”
আপকুৰ শিৱসাগৰ জিলা সমিতিৰ উদ্যোগত তথা বৃহত্তৰ গৌৰীসাগৰ বাসী ৰাইজৰ সহযোগত গৌৰীসাগৰ বহুমুখী প্ৰকল্প ভৱন প্ৰাংগণত অসমৰ প্ৰথম গৰাকী শ্বহীদ সাংবাদিক, স্বাধীনতা সংগ্ৰামী কমলা শইকীয়াৰ ২৯ সংখ্যক মৃত্যু দিৱস উদযাপন আৰু স্থায়ী আৱক্ষমূৰ্তি নিৰ্মাণৰ আধাৰশিলা অনুষ্ঠানত উপস্থিত থাকি যোৰহাট লোকসভা সমষ্টিৰ সাংসদ তপন কুমাৰ গগৈয়ে এইদৰে কয়।
জিলা আপকুৰ সভাপতি পদুম কুমাৰ শইকীয়াৰ সভাপতিত্বত অনুষ্ঠিত স্মৃতিচাৰণ সভাখনত সাংসদ গৰাকীয়ে মুখ্য মন্ত্ৰীৰ নিৰ্ধাৰিত পুঁজি (Untied Fund) -ৰ দহ লাখ টকাৰ অনুদানেৰে নিৰ্মাণ হ’ব লগা স্বাধীনতা সংগ্ৰামী তথা শ্বহীদ সাংবাদিক গৰাকীৰ আৱক্ষ মুৰ্তিয়ে ভবিষ্যত প্ৰজন্মৰ মাজত তেখেতৰ আদৰ্শ বিলাই দিয়াত সক্ষম হব বুলিও সদৰী কৰে৷
স্মৃতিচাৰণ সভাখন আনুষ্ঠানিক ভাৱে উদ্বোধন কৰি বিশিষ্ট নিৱন্ধকাৰ শিৱসাগৰ বাণিজ্য মহাবিদ্যালয়ৰ অধ্যক্ষ ড° সৌমাৰজ্যোতি মহন্তই কয় যে, নিৰ্ভীক সাহিত্যিক সাংবাদিক কমলা শইকীয়াই নিৰ্ভীক আৰু স্পষ্টবাদিতাৰে নব্বৈৰ দশকতে বাতৰি প্ৰকাশ কৰি গৈছে৷।
তেওঁ কয় যে বাতৰি কাকতৰ একোটা পৃষ্ঠাই একোটা সময়ৰ ইতিহাসক প্ৰতিনিধিত্ব কৰে৷ তেনে এজন মনিষীৰ প্ৰতিমুৰ্তি সাংবাদিকৰ সংগঠন এটাই স্থাপন কৰিবলৈ লোৱাটো সঁচায়ে প্ৰশংসনীয়৷
সভাত কমলা শইকীয়াৰ প্ৰতিচ্ছবিত বন্তি প্ৰজলন কৰি আমগুৰি সমষ্টিৰ বিধায়ক প্ৰদীপ হাজৰিকাই কয় যে সাহিত্য, সংস্কৃতি আৰু আপোচবিহীন সাংবাদিকতাৰে সমাজৰ হিত চিন্তা কৰা কমলা শইকীয়া আছিল এজোপা বৰগছ স্বৰূপ- যাৰ ছাঁত অগণন মানুহে জিৰাবলৈ ঠাই পাইছিল৷
জীৱনত কেৱল যোগাত্মক চিন্তাৰে সমাজৰ কাম কৰি যোৱা কমলা শইকীয়াৰ আদৰ্শৰে বাট বুলিবলৈ দল-মত নিৰ্বশেষে সকলোৰে চিন্তা-চেতনা যোগাত্মক হ’ব লাগিব বুলি তেওঁ মন্তব্য কৰে৷
শিৱসাগৰ জিলা উপায়ুক্ত লক্ষ্মীনন্দন গগৈয়ে বিশিষ্ট অতিথি হিচাবে উপস্থিত থাকি কমলা শইকীয়াৰ কৰ্মৰাজিক শ্ৰদ্ধাৰে সোঁৱৰণ কৰে৷ তেওঁ কমলা শইকীয়াৰ আৱক্ষ মূৰ্তি নিৰ্মাণৰ বাবে সাংসদ গগৈয়ে আগবঢ়োৱা পুঁজিৰ বাবে কৃতজ্ঞতা প্ৰকাশ কৰে।
তেওঁ কমলা শইকীয়াৰ নীতি-আদর্শ নৱ প্ৰজন্মৰ মাজত প্ৰচাৰ আৰু প্ৰসাৰৰ ওপৰত গুৰুত্ব আৰোপ কৰে।
আপকুৰ জিলা সম্পাদক শৰৎ শেনচোৱাই উদ্দেশ্য ব্যাখা কৰা সভাখনত অতিৰিক্ত উপায়ুক্ত কবিতা কাকতি কোঁৱৰ, গৌৰীসাগৰৰ খণ্ড উন্নয়ন বিষয়া সঞ্জীৱ বৰা, বিশিষ্ট সমাজ কৰ্মীসকল ক্ৰমে সুৰভি ৰাজকুঁৱৰী, প্ৰাঞ্জল কটকী আৰু বিজিত গগৈ, কমলা শইকীয়াৰ পুত্ৰ ধনঞ্জয় শইকীয়াকে ধৰি বহুকেইগৰাকী গণ্যমাণ্য ব্যক্তি উপস্থিত থাকে৷
