বিমানবন্দৰত হিন্দী নোকোৱাৰ বাবে সাংসদৰ নাগৰিকত্বক লৈ প্ৰশ্ন!

বিমানবন্দৰত চেকিঙৰ সময়ত হিন্দীত কথা নোকোৱাৰ বাবে এগৰাকী সাংসদৰ নাগৰিকত্বক লৈ প্ৰশ্ন উত্থাপন হোৱাৰ বাতৰিয়ে প্ৰতিক্ৰিয়াৰ সৃষ্টি কৰিছে।

বাতৰি অনুসৰি, এই ঘটনা সংঘটিত হৈছে চেন্নাই বিমানবন্দৰত।

এনে প্ৰশ্নৰ সন্মুখীন হৈছে তামিলনাডুৰ ডিএমকে দলৰ লোকসভাৰ সাংসদ কানিমোঝিয়ে।

বাতৰি মতে, বিমানবন্দৰত কৰ্তব্যৰত চিআইএছএফৰ এগৰাকী মহিলা কৰ্মীয়ে হিন্দী নোকোৱাৰ বাবে তেওঁক ভাৰতীয় হয় নে নহয় সেই প্ৰশ্ন কৰে।

এনে প্ৰশ্নৰ সন্মুখীন হৈ প্ৰথমতে সাংসদগৰাকী হতবাক হৈ পৰে। কিন্তু নিজকে চম্ভালি লৈ সাংসদগৰাকীয়ে লগে লগে ওলোটাই প্ৰশ্ন কৰে যে হিন্দী ক’ব জনাটো কেতিয়াৰ পৰা ভাৰতীয় হোৱাৰ পৰিচয় হৈ পৰিল?

Today at the airport a CISF officer asked me if “I am an Indian” when I asked her to speak to me in tamil or English as I did not know Hindi. I would like to know from when being indian is equal to knowing Hindi.#hindiimposition

— Kanimozhi (கனிமொழி) (@KanimozhiDMK) August 9, 2020

দেওবাৰে ডিএমকেৰ সাংসদগৰাকীয়ে টুইট কৰি এই অভিযোগ উত্থাপন কৰাৰ লগতে তেওঁৰ বক্তৱ্যও দাঙি ধৰিছে।

ছচিয়েল মিডিয়াত ভাইৰেল হোৱাৰ পাছত বহুতেই সাংসদ কানিমোঝিৰ সমৰ্থনত মন্তব্য কৰিছে। বহুতেই আকৌ হিন্দীৰ আগ্ৰাসনৰ বিৰুদ্ধেও সৰৱ হৈছে।

ইপিনে, এই ঘটনাৰ পাছত বিপাঙত পৰিছে চিআইএছএফ। টুইটাৰত এই ঘটনাত দুখ প্ৰকাশ কৰি চিআইএছএফৰ ফালৰ পৰা উক্ত কৰ্মীৰ বিৰুদ্ধে তদন্ত আৰম্ভ কৰাৰ কথাও সদৰী কৰা হৈছে।