অহা ৮ মাৰ্চ তাৰিখে আন্তঃৰাষ্ট্ৰীয় নাৰী দিৱস উপলক্ষে ৰাজ্যৰ প্ৰায় ৫০০ মহিলাক লৈ ব্যতিক্ৰম মাছডোৱে আয়োজন কৰিছে ‘মহিলা ৱাকাথন’।
ব্যতিক্ৰম মাছডোৰ উদ্যোগত ১ জানুৱাৰিৰ পৰা ৯০ দিনীয়াকৈ আয়োজিত ‘ন’ হৰ্ন’ কাৰ্য্যসূচীয়ে আজি ৬২ সংখ্যক দিনত ভৰি দিয়া উপলক্ষে গুৱাহাটী প্ৰেছ ক্লাবত আয়োজন কৰা এক অনুষ্ঠানত এই কথা প্ৰকাশ কৰে সংস্থাৰ প্ৰধান সঞ্চালক ড০ সৌমেন ভাৰাতীয়াই।
এই কাৰ্য্যসূচী পুৱা ৬:৩০ বজাৰ পৰা লক্ষীধৰ বৰা ক্ষেত্ৰৰ পৰা আৰম্ভ হ’ব বুলি তেওঁ জানিবলৈ দিয়ে।
তেওঁ নৰ্থ ইষ্ট নাওক জনোৱা অনুসৰি ‘সেই দিনটোতে স্বামী বিবেকানন্দ কেন্দ্ৰত বিভিন্ন ক্ষেত্ৰত আগবঢ়োৱা অৱদানৰ বাবে ১০ গৰাকী মহিলাক সম্বৰ্ধনা জনোৱা হ’ব। সাহিত্যৰ ক্ষেত্ৰত আগবঢ়োৱা অৱদানৰ বাবে নীলিমা বৰা আৰু দেবলীনা সেনগুপ্ত, সংগীতৰ ক্ষেত্ৰত নৱপ্ৰজন্মৰ কন্ঠশিল্পী টিংকুমণি কলিতাকে ধৰি মুঠ ১০ গৰাকীক সম্বৰ্ধনা জনোৱা হ’ব।’
তেওঁলোকৰ এই পদক্ষেপত মহানগৰ যান-বাহন আৰক্ষীয়ে পূৰ্ণ সমৰ্থন জনোৱা বুলি তেওঁ সদৰী কৰে। তেওঁৰ মতে ‘আৰক্ষী আয়ুক্ত হীৰেন নাথে শব্দ প্ৰদূষণ ৰোধৰ ক্ষেত্ৰত বিভাগৰ ফালৰ পৰা ব্যৱস্থা গ্ৰহণ কৰা হ’ব’ বুলি আশ্বাস প্ৰদান কৰিছে।
লক্ষণীয় যে মহানগৰীৰ বিভিন্ন শিক্ষানুষ্ঠান, স্বেচ্ছাসেৱী সংস্থাই ন’ হৰ্ন কাৰ্য্যসূচীত অংশগ্ৰহণ কৰা বুলি ড০ ভাৰাতীয়াই সদৰী কৰে।
তদুপৰি মুখ্য মন্ত্ৰী সৰ্বানন্দ সোণোৱাল, কন্ঠ শিল্পী জুবিন গাৰ্গ, অভিনেত্ৰী বৰ্ষাৰাণী বিষয়া, সদৌ অসম ছাত্ৰ সন্থাৰ সম্পাদক লুৰিণ জ্যোতি গগৈকে ধৰি বহুকেইজনে ব্যতিক্ৰমৰ এই পদক্ষেপৰ প্ৰতি শুভেচ্ছা জনোৱা বুলি জানিব পৰা গৈছে।
জানিব পৰা মতে সংস্থাৰ উদ্যোগত মহানগৰীৰ গণেশগুৰি, দিশপুৰ, ভঙাগড়, দীঘলীপুখুৰী, জালুকবাৰীকে ধৰি বিভিন্ন স্থানৰ ট্ৰেফিক পইন্টত প্ৰায় ১০,০০০ ষ্টিকাৰ লগোৱা হৈছিল।
ইয়াৰোপৰি ড০ ভাৰতীয়াই জনোৱা মতে কালি তেওঁলোকে কেন্দ্ৰীয় কাৰাগাৰত গৈ এই কাৰ্য্যসূচীৰে অংশ হিচাপে ১২০০ কয়দীৰ মাজত চিত্ৰাংকন প্ৰতিযোগিতাৰ অনুষ্ঠিত কৰিছিল।
উদ্যোক্তা মণ্ডলীয়ে নৰ্থ ইষ্ট নাওক জনোৱা অনুসৰি মহানগৰীত ক্ৰমান্বয়ে বৃদ্ধি পোৱা শব্দ প্ৰদুষণৰ মাত্ৰা হ্ৰাস কৰিবৰ বাবে তেওঁলোকে এই পদক্ষেপ হাতত লৈছিল। তদুপৰি যান-যঁটৰ সময়ত বিনা কাৰণত হৰ্ণ নবজাবলৈ জনসাধাৰণৰ মাজত এক সজাগতা আনিবৰ বাবে তেওঁলোকে এই প্ৰচেষ্টা হাতত লোৱা বুলি সদৰী কৰে।
ভবিষ্যত সময়ত ৰাজ্যৰ বিভিন্ন প্ৰান্তত তেওঁলোকে এই ন’ হৰ্ণ কাৰ্য্যসূচী ৰূপায়ণ কৰিব বুলি সাংবাদিকৰ আগত মন্তব্য কৰে। এই ক্ষেত্ৰত তেওঁলোকে ৰাজ্যৰ বিভিন্ন দল-সংগঠনক তেওঁলোকৰ এই যাত্ৰাৰ অংশীদাৰ হ’বৰ বাবে আহ্বান জনায়।
জানিব পৰা মতে পহিলা জানুৱাৰীৰ দিনা ৰাজ্যপাল জগদীশ মুখীয়ে ৰাজভৱনৰ পৰা এই কাৰ্য্যসূচীৰ উদ্বোধন কৰিছিল।
আজিৰ অনুষ্ঠানটোত সাহিত্যিক নিলীমা বৰা, নৱপ্ৰজন্মৰ গায়িকা টিংকুমণি কলিতা, নৃত্যশিল্পী নিবেদিতা তালুকদাৰ, ফেশ্ব’ন ডিজাইনাৰ সুনীতা দেব উপস্থিত থাকে।
