ভূপালৰ আকাংক্ষা শৰ্মাৰ হত্যাকাৰী প্ৰেমিক উদয়ন দাসক যাৱজ্জীৱন কাৰাদণ্ডৰ শাস্তি প্ৰদান কৰিছে বাঁকুড়াৰ ফাষ্ট ট্ৰেক আদালতে।
২০১৭ চনত বাঁকুড়াৰ নিৱাসী আকাংক্ষা শৰ্মা(২৮)ক ভূপালৰ ছাকেট নগৰৰ প্ৰেমিক উদয়ন দাসে হত্যা কৰি এটা কংক্ৰিটৰ বেদী সাজি তাতে মৃতদেহটো লুকুৱাই ৰাখিছিল।
উক্ত হত্যাকাণ্ডটো সংঘটিত কৰি কেবা মাহলৈ প্ৰমাণ নষ্ট কৰি গাপ দি ৰাখিছিল হত্যাকাৰী উদয়ন দাসে।
আদালতে হত্যাকাৰী উদয়ন দাসক হত্যা অপৰাধত যাৱজ্জীৱন আৰু ২০ হাজাৰ টকাৰ জৰিমনা আৰু প্ৰমাণ নষ্ট কৰাৰ অপৰাধত আৰু ২ বছৰৰ কাৰাদণ্ড আৰু ২ হাজাৰ টকাৰ জৰিমনাৰে দণ্ডিত কৰিছে।
জৰিমনা অনাদায় হ’লে আৰু ২ বছৰৰ কাৰাদণ্ডৰ অতিৰিক্ত শাস্তি বিহিছে হত্যাকাৰী উদয়ন দাসক আদালতে।
উল্লেখ্য যে, চ’ছিয়েল মিডিয়াৰ যোগে আংকাক্ষা শৰ্মা আৰু উদয়ন দাসৰ সৈতে পৰিচয় ঘটিছিল। ইয়াৰ পিছতে উদয়নে আকংক্ষাক প্ৰেম নিবেদন কৰিছিল।
২০১৬ চনৰ ২৬ জুলাইত আমেৰিকাত ইউনিচেফৰ কামত যোগ দিয়াৰ উদ্দেশ্যে আকাংক্ষাই ঘৰৰ পৰা উলাই গৈছিল যদিও উদয়নৰ ছাকেট নগৰৰ ঘৰত উপস্থিত হয়। জানিব পৰা উদয়নৰ ভাতৃয়ে আকাংক্ষাৰ নামত ভুৱা পাৰ্ছপ’ৰ্ট উলিয়াই থৈছিল।
১৫ জুলাইত ছাকেট নগৰৰ নিজ বাসগৃহতে প্ৰেমিকা আকাংক্ষাক হত্যা কৰি উদয়নে কংক্ৰিটৰ বেদী সাজি এটা টিনৰ বাকচত মৃতদেহটো ভৰাই তাতে লুকুৱাই ৰাখে।
ইফালে আকাংক্ষাৰ পৰিয়ালৰ লোকক বিভ্ৰান্ত কৰাৰ উদ্দেশ্যে উদয়নে আকাংক্ষাৰ নম্বৰৰ পৰা পৰিয়ালৰ লোকলৈ হোৱাটছএপত মেচেছ প্ৰদান কৰে। আনকি আমেৰিকাত উপস্থিত হোৱা বুলি আকাংক্ষাৰ নামতে মেচেছ প্ৰেৰণ কৰে হত্যাকাৰী উদয়নে।
কেবামাহো ধৰি পৰিয়ালৰ লোকে আকাংক্ষাৰ সৈতে ফোনত যোগাযোগ কৰিব নোৱাৰি ২০১৬ চনৰ ডিচেম্বৰ মাহৰ ৫ তাৰিখে আৰক্ষীৰ থানাত আকাংক্ষা নিখোজ হোৱাৰ অভিযোগ দাখিল কৰে।
আৰক্ষীয়ে আকাংক্ষাৰ মোবাইল নম্বৰৰ লোকেশ্যন ট্ৰেছ কৰি নিশ্চিত হয় যে ভূপালৰ ছাকেট নগৰৰ পৰা হোৱাটছএপৰ যোগে মেচেছ কৰা হৈছে। ইয়াৰ পিছতে ২০১৭ চনৰ ৫ জানুৱাৰীত আৰক্ষীয়ে এক অপহৰণৰ গোচৰ ৰুজু কৰি তদন্তৰ অভিযান ক্ষীপ্ৰতৰ কৰে।
আৰক্ষীয়ে অভিযান চলাই ১ ফেব্ৰুৱাৰিত বাঁকুড়াৰ আৰক্ষীয়ে উদয়ন দাসক গ্ৰেপ্তাৰ কৰে। আৰক্ষীৰ জেৰাত উদয়ন দাসে আকাংক্ষা শৰ্মাক হত্যা কৰাৰ কথা স্বীকাৰ কৰে। আৰু কংক্ৰিটৰ বেদীৰ ভিতৰৰ পৰা আকাংক্ষা শৰ্মাৰ মৃতদেহ উদ্ধাৰ কৰে আৰক্ষীয়ে।
আৰক্ষীৰ জেৰাত পোহৰলৈ আহে যে ২০১০ চনত উদয়নে নিজ পিতৃ-মাতৃ ক্ৰমে বীৰেন্দ্ৰকুমাৰ দাস আৰু ইন্দ্ৰাণী দাসক হত্যা কৰি মৃতদেহ দুটা ছত্তিশগড়ৰ ৰায়পুৰৰ নিজা বাগানত পুতি থৈছিল।
৫ ফেব্ৰুৱাৰিত আৰক্ষীয়ে উদয়নৰ পিতৃ-মাতৃৰ কংকালসাৰ দুটা উদ্ধাৰ কৰে। আৰু আকাংক্ষাক হত্যা কৰাৰ তিনি মাহৰ ভিতৰতে আৰক্ষীয়ে হত্যাকাৰী উদয়নৰ বিৰুদ্ধে ফাষ্ট ট্ৰেক আদালত চাৰ্জশ্বিট দাখিল কৰে।
বুধবাৰে যাৱজ্জীৱন কাৰাদণ্ড লাভ কৰি হত্যাকাৰী উদয়ন দাসে কয়, “মোৰ কোনো অনুশোচনা হোৱা নাই। এইবাৰ হাই ক’ৰ্ট আৰু ছুপ্ৰিন ক’ৰ্টলৈ যাম।”
ইফালে আকাংক্ষা শৰ্মাৰ পৰিয়ালে কয় যে তেওঁলোকে হত্যাকাৰী উদয়ন দাসৰ ফাঁচী বিচাৰিছিল। কিন্তু আদালতৰ এই ৰায়ক তেওঁলোকে সন্মান জনোৱা বুলিও জানিবলৈ দিয়ে সংবাদ মাধ্যমক।