বিগত কিছুদিন ধৰি উত্তৰ-পূৰ্বাঞ্চলত সঘনে ভূমিকম্প হোৱালৈ চাই অঞ্চলটোত কিবা বৃহৎ প্ৰাকৃতিক দুৰ্যোগ হ’ব নেকি তাকেলৈ এতিয়া চিন্তিত হৈ পৰিছে বহুজন।
ভূমিকম্প প্ৰৱণ অগ্নি বলয়ৰ অন্তৰ্গত হোৱা বাবেই এই অঞ্চলত ভূমিকম্পই অথন্তৰ ঘটোৱাৰ আশংকা ব্যক্ত কৰি আহিছে বহুতে।
দেওবাৰে পুৱাও এক মৃদু প্ৰাৱল্যৰ ভূমিকম্পই জোকাৰি যায় অৰুণাচলৰ টাৱাঙক।
পুৱা ৭.৩০ বজাত সংঘটিত এই ভূমিকম্পৰ প্ৰাৱল্য আছিল ৰিখটাৰ স্কেলত ৩.৪।
উল্লেখ্য ১ ছেপ্তেম্বৰৰ পুৱতি নিশা অহা এটা ভূমিকম্পই সমগ্ৰ মণিপুৰক জোকাৰি যায়।
বাতৰি অনুসৰি, পুৱতি নিশা ২.৩৯বজাত ভূমিকম্পৰ জোকাৰণি অনুভুত হয় আৰু ৰিখটাৰ স্কেলত ইয়াৰ মাত্ৰা ৫.১ মেগনিটিউড ৰেকৰ্ড কৰা হয়।
ৰাষ্ট্ৰীয় ভূকম্পন কেন্দ্ৰৰ মতে ভূমিকম্পটোৰ অভিকেন্দ্ৰ আছিল ভাৰত-ম্যানমাৰ সীমান্তৰ প্ৰায় ৫৫কিলোমিটাৰ পূবে উখ্ৰুলত।
যোৱা ২৭ আগষ্টত মিজোৰামৰ চাম্ফাই জিলাত এঘন্টাৰ ভিতৰতে ৩.৬ৰ পৰা ৫.৩ ৰিখটাৰ স্কেলৰ ভিতৰত ক্ৰমে তিনিটা ভূমিকম্পৰ জোকাৰণি অনুভুত হৈছিল।
সেইদৰে, মণিপুৰৰ চান্দেল জিলাত যোৱা ১১ আগষ্টত এটা ৪.০ প্ৰাবল্যৰ ভূমিকম্পই জোকাৰি যায়।
ৰাষ্ট্ৰীয় ভূকম্পন কেন্দ্ৰৰ মতে মণিপুৰৰ মইৰাঙৰ পৰা ৪৩ কিলোমিটাৰ দক্ষিণ পূবত ১৫ কিলোমিটাৰ গভীৰতাত ভূমিকম্পটোৰ অভিকেন্দ্ৰ আছিল।
বিগত ২১ জুনতো এটা মধ্যমীয়া ধৰণৰ ভূমিকম্পই মণিপুৰক জোকাৰি গৈছিল।
উত্তৰ-পূবত বিগত কেইমাহৰ পৰা ক্ৰমাগতভাৱে হৈ থকা ভূমিকম্প সন্দৰ্ভত কেন্দ্ৰ চৰকাৰেও চিন্তা ব্যক্ত কৰিছে।
