নিয়মিতভাৱে ইনষ্টাগ্ৰামত তেওঁ ভিডিঅ’ পোষ্ট কৰে। দৈনন্দিন জীৱনৰ বিভিন্ন বিষয় উত্থাপন কৰে। ফ’ল’ৱাৰৰ সংখ্যা ছয় লাখতকৈ অলপ বেছি। দিল্লীৰ ইনফ্লুৱেন্সাৰ নেহা বিষ্টে শেহতীয়াকৈ ছ’চিয়েল মিডিয়াত তেওঁৰ বিবাহৰ খবৰ শ্বেয়াৰ কৰিছিল। কিন্তু সেই বিবাহৰ খবৰ পোৱাটোৱে কাল হ’ল এজন যুৱ অনুৰাগীৰ!
তেওঁ প্ৰিয় ইনফ্লুৱেন্সাৰগৰাকীৰ বিয়া তেওঁ মানি ল’ব পৰা নাছিল। নিজে তেওঁক বিয়া কৰাব বিচাৰিছিল। এইদৰে উত্তৰ প্ৰদেশৰ যুৱকজন হঠাতে তেওঁৰ ঘৰত প্ৰৱেশ কৰিলে। নেহাৰ পৰিয়ালৰ লোক আৰু ওচৰ-চুবুৰীয়াৰ প্ৰহাৰত গুৰুতৰভাৱে আহত হয়। এসপ্তাহৰ পিছত চিকিৎসালয়ত চিকিৎসাধীন অৱস্থাত তেওঁৰ মৃত্যু হয়। এই ঘটনাত আৰক্ষীয়ে নেহাৰ পিতৃসহ দুজন লোকক গ্ৰেপ্তাৰ কৰিছে।
পূব দিল্লীৰ মধু বিহাৰ অঞ্চলত সংঘটিত হৈছে এই ঘটনা। উত্তৰ প্ৰদেশৰ গাজীপুৰৰ বাসিন্দা অভিনৱে চেন্নাইৰ এটা ব্যক্তিগত কোম্পানীত কাম কৰিছিল। ৭ নৱেম্বৰত তেওঁ জোৰকৈ নেহাৰ ঘৰত সোমাইছিল। নেহাক বিয়া কৰিব লাগে বুলি দাবী কৰিলে। পিছদিনা দাখিল কৰা এফআইআৰত যুৱকজনৰ মুখত সুৰাৰ গোন্ধ পোৱাৰ কথা উল্লেখ আছিল। অভিনৱৰ এই আচৰণত ক্ষুব্ধ হৈ পৰে নেহাৰ পৰিয়ালৰ লোক। চুবুৰীয়া দুই এজনেও তেওঁলোকৰ লগত যোগ দিলে। সকলোৱে যুৱকজনক মাৰপিট কৰিলে। পিছত আৰক্ষীক খবৰ দিয়া হয়।
ঘটনাস্থলীত উপস্থিত হৈ গুৰুতৰ অৱস্থাত অভিনৱক উদ্ধাৰ কৰে আৰক্ষীয়ে। পিঠি আৰু সোঁ ভৰিত গভীৰ আঘাত পাইছিল। প্ৰথমে তেওঁক ৰাজীৱ গান্ধী চিকিৎসালয়লৈ লৈ যোৱা হয়। তাতেই ১৫ নৱেম্বৰত চিকিৎসাৰ সময়ত তেওঁৰ মৃত্যু হয়।
তদন্তত আৰক্ষীয়ে জানিব পাৰিছে যে অভিনৱে নিয়মিতভাৱে নেহাৰ ছ’চিয়েল মিডিয়াৰ ভিডিঅ’ চাইছিল। লাহে লাহে তেওঁৰ প্ৰতি একপক্ষীয় আকৰ্ষণ গঢ় লৈ উঠে। কেইমাহমানৰ আগতেও তেওঁ অনুৰাগী হিচাপে নেহাৰ ঘৰলৈ গৈছিল। কিন্তু এইবাৰ তেওঁ ক্ষুব্ধ হৈ পৰিছিল কাৰণ নেহাই আন এজন যুৱকক বিয়া কৰাবলৈ সিদ্ধান্ত লৈছিল। যদিও নেহাই তেওঁক চিনিয়েই নাপাইছিল।
এই ঘটনাত আৰক্ষীয়ে অনিচ্ছাকৃত হত্যাৰ গোচৰ ৰুজু কৰিছে। নেহাৰ পিতৃ বীৰেন্দ্ৰ বিষ্ট আৰু চুবুৰীয়া এজনক গ্ৰেপ্তাৰ কৰা হৈছে। অঞ্চলটোৰ চিচিটিভি ফুটেজ পৰীক্ষা কৰা হৈছে। এই প্ৰহাৰত আৰু কোন জড়িত আছিল সেইটো চিনাক্ত কৰাৰ প্ৰচেষ্টা অব্যাহত আছে। ঘটনাৰ অন্যান্য দিশৰ তদন্তও অব্যাহত আছে বুলি আৰক্ষী বিষয়া এজনে জানিবলৈ দিয়ে।





