ডিব্ৰুগড়ৰ ন্যায়িক দণ্ডাধীশৰ আদালতে বনকৰা নাবালকৰ গাত উতলা পানী ঢলা ঘটনাৰ মূল অভিযুক্ত ডাঃ সিদ্ধি প্ৰসাদ দেউৰী আৰু তেওঁৰ পত্নী মিতালী কোঁৱৰক দেওবাৰে জেললৈ প্ৰেৰণ কৰিছে।
ভাৰতীয় দণ্ড বিধিৰ ৩৪৪/৩২৬/৩৪ ধাৰাৰ অধীনৰ ডিব্ৰুগড় আৰক্ষী থানাৰ গোচৰ নং ১৪৪৩/২০২০ সন্দৰ্ভত দম্পতিহালক দেওবাৰে আদালতত হাজিৰ কৰোৱা হৈছিল।
নগাওঁ আৰক্ষীয়ে শনিবাৰে সন্ধিয়া ৰহাৰ পৰা পলাতক দম্পতিহালক গ্ৰেপ্তাৰ কৰিছিল।
ইয়াৰ পূৰ্বে ডিব্ৰুগড় আৰক্ষীয়ে ঘটনা সন্দৰ্ভত দম্পতিহালৰ পুত্ৰ, কন্যাক আটক কৰিছিল।
অভিযোগমতে ডাঃ দেউৰীয়ে তেওঁৰ ঘৰৰ মজিয়াত শুই থকা অৱস্থাত ১২ বছৰীয়া নাবালক বনকৰা ল’ৰাজনৰ গাত উতলা পানী ঢালি দিছিল।
পিছত চাইল্ডলাইন, শিশু কল্যাণ সমিতি আৰু আৰক্ষীৰ দলে নাবালকগৰাকীক উদ্ধাৰ কৰিছিল।
নাবালকগৰাকীয়ে যোৱা এবছৰ ধৰি ডাঃ দেউৰীৰ ঘৰত বনকৰা ল’ৰা হিচাপে কাম কৰি আহিছিল।
