উজনি অসমৰ প্ৰধানকৈ যোৰহাট জিলাত ২০০৭ চনতে আৰম্ভ হোৱা ৩৭ নং ৰাষ্ট্ৰীয় ঘাইপথ সম্প্ৰসাৰণৰ কাম অতি লেহেমীয়া হোৱাৰ অভিযোগ উত্থাপিত হৈ থকাৰ পাছতো পথ সম্প্ৰসাৰণৰ কাম খৰতকীয়া নোহোৱাত বিভিন্ন মহলত ব্যাপক প্ৰতিক্ৰিয়াৰ সৃষ্টি হৈছে।
পথ সম্প্ৰসাৰণৰ কামৰ এনে লেহেমীয়া গতিৰ বাবে প্ৰায় আঠ মাহ পূৰ্বে মুখ্যমন্ত্ৰীয়ে নিজে যোৰহাটৰ চেনিজানৰ সমীপত ৰৈ গাড়ীৰ পৰা নামি কাম কাজৰ অগ্ৰগতিৰ বুজ লৈ ক্ষীপ্ৰতাৰে কাম সম্পূৰ্ণ কৰাৰ নিৰ্দেশ দিছিল।
কিন্তু স্বয়ং মুখ্যমন্ত্ৰী গৰাকীৰ এই নিৰ্দেশনাৰ পাছতো শামুকীয়া গতিৰে অব্যাহত আছে পথ সম্প্ৰসাৰণৰ কাম।
অসম চৰকাৰৰ বন বিভাগ, জলসম্পদ বিভাগ, বিদ্যুৎ বিভাগৰ মাজত প্ৰয়োজনীয় সমন্বয়হীনতাই হৈছে চাৰিলেন যুক্ত পথ সম্প্ৰসাৰণৰ কাম অতি লেহেমীয়া হোৱাৰ অন্যতম কাৰণ।
বিভাগ কেইটাৰ বিষয়া কৰ্মচাৰীৰ মাজত এনে সমন্বয়হীনতাৰ বাবে সঠিক সময়ত প্ৰয়োজন হোৱা নথি আদি লাভ নকৰাৰ বাবে অসুবিধাৰ সন্মুখীন হ’ব লগা হৈছে নিৰ্মাণ সংস্থা সমূহ।
শেহতীয়াকৈ ৰাষ্ট্ৰীয় ঘাইপথ সম্প্ৰসাৰণ কাম ক্ষীপ্ৰতাৰে কৰাৰ বেলিকা অসম চৰকাৰৰ আন্তৰিকতাহীনতাও উন্মোচিত হৈছে।
যোৱা ১৫ জুলাইতে কেন্দ্ৰীয় পৰিৱেশ আৰু বন মন্ত্ৰী প্ৰকাশ জাভেদকাৰে চাৰিলেন পথ সম্প্ৰসাৰণ কামত প্ৰয়োজন হোৱা পলস(অৰ্ডিনাৰি আৰ্থ) সৰবৰাহৰ বাবে পৰিৱেশ সম্পৰ্কীয় কোনো প্ৰমাণ পত্ৰৰ আৱশ্যক নহয় বুলি নিৰ্দেশনা জাৰি কৰি ৰাজ্য চৰকাৰলৈ পত্ৰ প্ৰেৰণ কৰিছিল।
উল্লেখযোগ্য যে পৰিৱেশ সম্পৰ্কীয় প্ৰমাণ পত্ৰ লাভৰ বাবে চৰকাৰী ৰঙাফিটা মেৰপেচৰ বাবে দীৰ্ঘ সময়ৰ প্ৰয়োজন হয়। যাৰ বাবে পথ সম্প্ৰসাৰণৰ কাম অতি লেহেমীয়া হয়।
এনে সমস্যাৰ বাবে কেন্দ্ৰীয় মন্ত্ৰী গৰাকীয়ে এক নিৰ্দেশনা জাৰি কৰিছিল যদিও দুটা মাহ পাৰ হোৱাৰ পাছতো ৰাজ্য চৰকাৰে আজি পৰ্যন্ত বন বিভাগলৈ কোনো নিৰ্দেশনা জাৰি নকৰিলে। যাৰ বাবে এতিয়া বিপদত পৰিছে চাৰিলেন পথ সম্প্ৰসাৰণৰে জড়িত নিৰ্মাণ সংস্থাসমূহ।
ইপিনে যোৰহাট জিলাৰ টীয়ক নগৰৰ দুই কাষে পথৰ কাম আধৰুৱা হোৱাৰ বাবে ব্যৱসায়-বাণিজ্যত বাৰুকৈ প্ৰভাৱ পৰিছে।
কোভিড প্ৰতিৰোধৰ বাবে চৰকাৰে ঘোষণা কৰা লকডাউনৰ ফলত প্ৰায় সৰ্বস্বান্ত হোৱা ব্যৱসায়ীসকলে অনতি বিলম্বে পথৰ কাম সম্পূৰ্ণ কৰিবলৈ আহ্বান জনাইছে অন্যথা ক্ষতিপুৰণৰ দাবী কৰিছে।
ৰাজ্য চৰকাৰৰ এনে অমনোযোগিতাই এতিয়া ৰহস্যৰ সৃষ্টি কৰিছে ৰাইজৰ। পথ সম্প্ৰসাৰণৰ কাম ক্ষীপ্ৰতাৰে আগবঢ়োৱাৰ স্বাৰ্থত ৰাজ্য চৰকাৰখনে এই ক্ষেত্ৰত প্ৰয়োজনীয় পদক্ষেপ গ্ৰহণৰ আহ্বান জনাইছে সচেতন ৰাইজে।
