নিশা এহাল চিকিৎসক দম্পতীক আক্ৰমণ কৰি হত্যাৰ চেষ্টা কৰাৰ অভিযোগত গ্ৰেপ্তাৰ হৈছে এগৰাকী প্ৰাক্তন সেনা।
ঘটনাৰ বিৱৰণীৰ মতে বাক্সা জিলাৰ তামুলপুৰ প্ৰাথমিক স্বাস্থ্য কেন্দ্ৰৰ চিকিৎসক দম্পতীক তেওঁলোকৰ চৰকাৰী আৱাসত দেওবাৰে নিশা তামুলপুৰ থানা অন্তৰ্গত পুনীয়া গাঁৱৰ চমেন বসুমতাৰী নামৰ প্ৰাক্তন সেনা জোৱানজনে আক্ৰমণ কৰে।
আক্ৰমণকাৰী বসুমতাৰীয়ে নিশা প্ৰায় ১০ মান বজাত চিকিৎসক ডাঃ গৌতম মেধিক চৰকাৰী আৱাসত প্ৰৱেশ কৰি শাৰীৰিকভাৱে আক্ৰমণ কৰে।
ইমানতে ক্ষান্ত নাথাকি বসুমতাৰীয়ে আক্ৰমণৰ পৰা স্বামীক ৰক্ষা কৰিবলৈ চেষ্টা কৰা মেধিৰ পত্নী ডাঃ পিংকি চৌধুৰী আৰু ১৬ বছৰীয়া কন্যা অনুষ্কা মেধিকো শাৰীৰিকভাৱে আক্ৰমণ কৰে।
উক্ত আক্ৰমণত চিকিৎসক ডাঃ গৌতম মেধিয়া কপালত আঘাত পোৱাৰ বিপৰীতে পত্নী ডাঃ পিংকি চৌধুৰীৰ এখন হাত গুৰুতৰভাৱে আঘাতপ্ৰাপ্ত হৈছে।
নিশাই চিকিৎসক দম্পতীয়ে চমেন বসুমতাৰীৰ আক্ৰমণৰ পৰা ৰক্ষা পাবলৈ ওচৰ চুবুৰীয়াৰ সঁহাৰি বিচাৰি চিঞৰ বাখৰ কৰে।
চিঞৰ বাখৰ শুনি চুবুৰীয়াসকলে উলাই আহি চমেন বসুমতাৰীৰ আক্ৰমণ পৰা ডাঃ মেধিৰ পৰিয়ালটোক ৰক্ষাৰ কৰাৰ লগতে আক্ৰমণকাৰী বসুমতাৰীক আৱদ্ধ কৰি স্থানীয় আৰক্ষীক খবৰ দিয়ে।
খবৰ পায়ে তামুলপুৰ আৰক্ষী থানাৰ দুই আৰক্ষী বিষয়া মনোজ কুমাৰ দাস আৰু বণজিৎ উজীৰৰ নেতৃত্বত আৰক্ষীৰ এটা দলে গৈ আক্ৰমণকাৰী বসুমতাৰীক আটক কৰে।
নিশাই চিকিৎসক দম্পতীয়ে চমেন বসুমতাৰীৰ বিৰুদ্ধে আৰক্ষী থানাত এখন এজাহাৰ দাখিল কৰে আৰু সেই এজাহাৰৰ ভিত্তিত বসুমতাৰীক আৰক্ষীয়ে গ্ৰেপ্তাৰ কৰি আজি আদালত হাজিৰ কৰোৱায়।
আদালতে ইতিমধ্যে বসুমতাৰীক ন্যায়িক জিম্মালৈ প্ৰেৰণ কৰিছে।
ইফালে হাতত গুৰুতৰভাৱে আঘাতপ্ৰাপ্ত ডাঃ পিংকি চৌধুৰীক কন্যাৰ সৈতে উন্নত চিকিৎসাৰ বাবে গুৱাহাটীলৈ প্ৰেৰণ কৰা হৈছে যদিও ডাঃ গৌতম মেধিক নলবাৰীতে চিকিৎসা কৰি থকা হৈছে।
উক্ত আক্ৰমণৰ ঘটনাক বাক্সা জিলাৰ আছু, এবছু, বিপিএফ, এবিৱাইএছএফ আদিৰ লগতে বিভিন্ন দল-সংগঠনে তীব্ৰ গহিৰণা দিয়াৰ লগতে আক্ৰমণকাৰী চমেন বসুমতাৰীৰ কঠোৰতম শাস্তিৰ দাবী কৰিছে।
