নাগৰিকত্ব সংশোধনী আইন চমুকৈ কা বাতিলৰ দাবীত প্ৰতিবাদ কৰি ছহিদীবৰণ কৰা পাঁচজনক ছহিদক লৈ অসমৰ মানৱ অধিকাৰ আয়োগে গুৰুত্বপূৰ্ণ ৰায় প্ৰদান কৰিছে।
যোৱা ১২ ডিচেম্বৰৰ দিনা আৰক্ষীৰ গুলিত পাঁচজনকৈ লোকে প্ৰাণ আহুতি দিছিল।
এই ঘটনাৰ এসপ্তাহৰ পাছতে প্ৰদেশ কংগ্ৰেছৰ সভাপতি ৰিপুন বৰাই প্ৰদেশ কংগ্ৰেছৰ আইন বিভাগৰ সহযোগত অসম মানৱ অধিকাৰ আয়োগত এক গোচৰ দিছিল বুলি সংবাদমেলযোগে জানিবলৈ দিয়ে প্ৰদেশ কংগ্ৰেছৰ আইন বিভাগৰ অধ্যক্ষ নিৰণ বৰাই।
গুৱাহাটীৰ ৰাজীৱ ভৱনত সম্বোধন কৰা সংবাদমেলত নিৰণ বৰাই কয় ‘ৰিপুন বৰাই গোচৰটো ৰুজু কৰি ঘটনাটোৰ উচ্চ পৰ্যায়ৰ তদন্ত দাবী কৰাৰ লগতে ছহিদৰ পৰিয়ালক ২০ লাখ টকাকৈ ক্ষতিপূৰণ দিবলৈ দাবী জনাইছিল। এই গোচৰৰ নম্বৰ আছিল ২৭৯২/২০২০।‘
এই গোচৰৰ ভিত্তিতে আয়োগে ২৩ ডিচেম্বৰ ২০১৯ ত ৰাজ্য চৰকাৰৰ মুখ্য সচিবক ঘটনাৰ উচিত তদন্ত কৰি প্ৰতিবেদন দাখিল কৰিবলৈ নিৰ্দেশ দিছিল।‘
বৰাই কৰা অভিযোগ অনুসৰি ‘সোণোৱাল চৰকাৰে বিষয়টোৰ ওপৰত তিলমানো গুৰুত্ব নিদিলে। মানৱ অধিকাৰ আয়োগে যোৱা ১৩ জানুৱাৰী, ৩০ জানুৱাৰী, ২০ ফেব্ৰুৱাৰী আৰু ২৫ ফেব্ৰুৱাৰীত গোচৰটোৰ শুনানি অনুষ্ঠিত কৰি সোণোৱাল চৰকাৰক বাৰম্বাৰ তদন্তৰ প্ৰতিবেদন দাখিল কৰিবলৈ নিৰ্দেশ দিছিল। কিন্তু মানুহৰ আৱেগৰ সৈতে জড়িত এই বিষয়টোলৈ সোণোৱাল চৰকাৰে তিলমানো কাণসাৰ নিদিলে।‘
সেয়েহে যোৱা ১৪ ছেপ্তেম্বৰৰ দিনা অনুষ্ঠিত হোৱা শুনানিৰ অন্তত সোণোৱাল চৰকাৰক গোচৰটোৰ প্ৰতিবেদন দাখিল কৰিবলৈ এমাহৰ সীমা বান্ধি দিয়ে। অন্যথা সোণোৱাল চৰকাৰে ক্ষতিপূৰণ দিব লাগিব বুলিও আয়োগে নিৰ্দেশ দিয়ে বুলি নিৰণ বৰাই জনায়।
‘অন্যথা চৰকাৰে ছহিদ ঈশ্বৰ নায়ক, আব্দুল আলিমৰ পৰিয়ালক ৩ লাখ টকাকৈ ক্ষতিপূৰণ, ১৮ বছৰৰ অনুৰ্দ্ধৰ ছহিদ দিপাঞ্জল দাস আৰু ছেম ষ্টেফৰ্ডক ২ লাখ টকাকৈ ক্ষতিপূৰণ আদায় দিব লাগিব।‘ নিৰণ বৰাই সংবাদমেলত জনায় কয়।
অহা ১৬ নৱেম্বৰত পৰৱৰ্তী শুনানি অনুষ্ঠিত হ’ব বুলি তেওঁ জনায়।
ইপিনে, ডিব্ৰুগড়ৰ ছহিদ দ্বিডেন্দ্ৰ পাঙগিঙৰ মৃতদেহ ৰাইজে মৰণোত্তৰ পৰীক্ষাৰ বাবে নিদিলে আৰু মৰণোত্তৰ পৰীক্ষা অবিহনেই সৎকাৰ কৰা হ’ল বুলি উল্লেখ কৰি বৰাই লগতে কয় ‘যাৰ বাবে দ্বীজেন্দ্ৰ পাঙগিঙ নিহত হোৱাৰ প্ৰকৃত কাৰণ জানিব পৰা নগ’ল।‘
দ্বীজেন্দ্ৰ পাঙগিঙৰ মৃত্যুৰ সন্দৰ্ভত চৰকাৰে দাখিল কৰা প্ৰতিবেদনক লৈ প্ৰদেশ কংগ্ৰেছ অলপো সন্তুষ্ট নহয় বুলি উল্লেখ কৰি তেওঁ লগতে কয় ‘পৰিয়ালৰ লোকে কিছু সময় দিলে আৰু সহযোগিতা কৰিলে কোনোধৰণৰ পাৰিশ্ৰমিক নোলোৱাকৈ প্ৰদেশ কংগ্ৰেছে গোচৰটো গুৱাহাটী উচ্চ ন্যায়ালয়ৰ মজিয়ালৈ লৈ যাব।‘
