ভাৰতীয় ক্ৰিকেট দলৰ দুই প্ৰাক্তন অধিনায়ক বিৰাট কোহলী আৰু ৰোহিত শৰ্মাই ২০২৭ চনৰ বিশ্বকাপত অংশগ্ৰহণ কৰিবনে নাই, সেই সিদ্ধান্ত গ্ৰহণৰ ক্ষেত্ৰত তেওঁলোকৰ বয়স কোনো কাৰক নহ’ব। বিগত কিছু বছৰ ধৰি দলত দুয়োগৰাকী তাৰকাৰ স্থানক লৈ চলি থকা বিতৰ্কৰ মাজতে ভাৰতীয় ক্ৰিকেট নিয়ন্ত্ৰণ ব’ৰ্ডৰ সভাপতি মিঠুন মানহাছে এই স্পষ্ট বাৰ্তা প্ৰদান কৰিছে। যোৱা বছৰৰ ছেপ্টেম্বৰ মাহত বিচিচিআইৰ দায়িত্ব গ্ৰহণ কৰা মানহাছে কয় যে যেতিয়ালৈকে দুয়োগৰাকী বৰ্ষীয়ান খেলুৱৈয়ে নিজৰ ফিটনেছ বজাই ৰাখিব আৰু সৰ্বোচ্চ স্তৰত উন্নত প্ৰদৰ্শন আগবঢ়াই থাকিব, তেতিয়ালৈকে তেওঁলোকে দেশৰ হৈ খেলি থাকিব পাৰিব।
ক্ৰীড়া আলোচনী ‘স্প’ৰ্টষ্টাৰ’ক (Sportstar) দিয়া এক সাক্ষাৎকাৰত মানহাছে কয় যে, “মোৰ দৃষ্টিত দল নিৰ্বাচনৰ মূল মাপকাঠী ফিটনেছ আৰু প্ৰদৰ্শনহে হোৱা উচিত, কোনোপধ্যেই বয়স নহয়। যদি কোনো খেলুৱৈ খেলাৰ বাবে সম্পূৰ্ণ ফিট থাকে, উন্নত প্ৰদৰ্শন আগবঢ়ায় আৰু দেশৰ বাবে মেচ জিকাত অৰিহণা যোগায়, তেন্তে নিৰ্বাচনৰ ক্ষেত্ৰত আমি কেৱল সেইটো দিশতহে গুৰুত্ব দিয়া উচিত।”
উল্লেখযোগ্য যে শেহতীয়াকৈ এদিনীয়া ক্ৰিকেটত বিৰাট কোহলী আৰু ৰোহিত শৰ্মা দুয়োগৰাকীয়েই সুন্দৰ ফৰ্মত আছে। কোহলীয়ে তেওঁৰ অন্তিম পাঁচটা এদিনীয়া ইনিংছত ৭৬.৭৫ গড়ে মুঠ ৩০৭ ৰান সংগ্ৰহ কৰিছে, যাৰ ভিতৰত যোৱা মাহত ৱেষ্ট ইণ্ডিজৰ বিৰুদ্ধে খেলা ১৩৯ ৰানৰ এটা অপৰাজিত ইনিংছো অন্তৰ্ভুক্ত আছে। সমান্তৰালভাৱে ৰোহিত শৰ্মায়ো নিজৰ ফৰ্ম অধিক উন্নত কৰি তুলিছে। চলিত মাহৰ আৰম্ভণিতে ইংলেণ্ডৰ বিৰুদ্ধে ১৩৮ ৰানৰ ইনিংছসহ দুটা শতক অৰ্জন কৰা ৰোহিতে অন্তিম পাঁচটা এদিনীয়া ইনিংছত ৭৭.৮০ গড়ে মুঠ ৩৮৯ ৰান সংগ্ৰহ কৰিছে।
ইফালে, দলত বিৰাট আৰু ৰোহিতৰ উপস্থিতিয়ে অধিনায়ক শুভমন গিলক নেতৃত্বৰ দক্ষতা অধিক বিকশিত কৰাত কেনেদৰে সহায় কৰিব পাৰে, সেই বিষয়েও বিচিচিআইৰ সভাপতিগৰাকীয়ে আলোকপাত কৰে। তেওঁ কয়, “ভাৰতীয় দলক নেতৃত্ব দিয়াৰ উপৰি শুভমনে বিগত দুই-তিনি বছৰ ধৰি গুজৰাট টাইটানছৰ অধিনায়ক হিচাপে দায়িত্ব পালন কৰি আছে। মোৰ বোধেৰে বিশ্বকাপ অভিযান আৰম্ভ কৰাৰ সময়ত তেওঁৰ এই অভিজ্ঞতা যথেষ্ট কামত আহিব। দলত বিৰাট, হাৰ্দিক (পাণ্ডিয়া) আৰু ৰোহিতৰ উপস্থিতিয়ে নিশ্চিতভাৱে তেওঁক সহায় কৰিব। ইয়াৰ উপৰি যশপ্ৰীত বুমৰাহৰ দৰে খেলুৱৈ আছে, যিয়ে বলিঙৰ নেতৃত্ব ল’ব পাৰে আৰু আন কোনোবাই ফিল্ডিং বিভাগটো চম্ভালিব পাৰে। গতিকে ইয়াৰ মূল কথাটো হ’ল কামৰ বোজা বা দায়িত্বসমূহ ভগাই লোৱা। ভৱিষ্যতে কথাবোৰ কিদৰে আগবাঢ়ে সেয়া চাবলৈ আকৰ্ষণীয় হ’ব। কিন্তু শুভমন এজন ধীৰ-স্থিৰ স্বভাৱৰ খেলুৱৈ আৰু তেওঁৰ আশে-পাশে জ্যেষ্ঠ খেলুৱৈসকল থকাটো দলৰ বাবে এক অতিৰিক্ত সুবিধা হ’ব।”
