বিশ্ব স্বাস্থ্য সংস্থা(WHO)এ বাৰে বাৰে কৈ আহিছে যে কোভিড সংক্ৰমণৰ পৰা বাচিবলৈ মানুহে মাস্ক পৰিধান কৰাতো জৰুৰী।
ইফালে বিশ্বৰ প্ৰতিখন দেশতে কোভিড প্ৰটক’লৰ নিৰ্দেশনা অনুসৰি জনসাধাৰণে মাস্ক পিন্ধাটো বাধ্যতামূলক ।
বহু দেশত জনসাধাৰণৰ মাস্ক পৰিধান কৰাতো বাধ্যতামূলক কৰিবলৈ বিভিন্ন ধৰণৰ কঠোৰ নীতি নিৰ্দেশনা বলৱৎ কৰি জৰিমনাও বিহা হৈছে।
তথাপিও দেশসমূহৰ জনসাধাৰণে যিধৰণে সচেতন হ’ব লাগিছিল তেনে ধৰণে সচেতন হোৱা পৰলিক্ষিত হোৱা নাই।
সেয়ে কিছুমান দেশে মাস্ক পৰিধান নকৰা লোকক কেৱল মাত্ৰ জৰিমনা বিহাতেই আৱদ্ধ নাথাকিব বিভিন্ন ধৰণৰ শাস্তি প্ৰদান কৰিবলৈ আৰম্ভ কৰিছে।
তেনে এক অভিনৱ পন্থা গ্ৰহণ কৰিছে দক্ষিণ পূৱ এছিয়াৰ এখন দেশ ইন্দোনেছিয়াই।
দেশখনৰ চৰকাৰে মাস্ক নিপিন্ধা লোকসকলক ধৰি নি চিধাই কবৰস্থালৈ নিয়া আৰম্ভ কৰিছে।
দ্য জাৰ্কাতা পোষ্টৰ এক প্ৰতিবেদন অনুসৰি দেশখনৰ মাস্ক পৰিধান নকৰা লোকসকলক ধৰি প্ৰশাসনে চিধাই কবৰস্থানলৈ লৈ যায়।
কবৰস্থানলৈ নি মাস্ক পৰিধান নকৰাৰ লোকক কোভিডত আক্ৰান্ত হৈ মৃত্যু হোৱা লোকৰ মৃতদেহৰ বাবে কবৰৰ গাঁত খান্দিবলৈ দিয়া হয়।
ইতিমধ্যে মাস্ক পৰিধান নকৰি দেশখনৰ আইন ভংগ কৰা এনে বহু লোকক শাস্তি হিচাপে কবৰস্থানত কবৰৰ গাঁত খান্দিবলৈ লগোৱা হৈছে।
প্ৰতিবেদনখনৰ মতে এনে আইন ভংগকাৰীক দিনটোত কবৰস্থানলৈ যিমান টা কোভিড আক্ৰান্তৰ মৃতদেহ আহে সিমানটা কবৰৰ গাঁত খান্দিবলৈ দিয়া হৈছে।
“মহামাৰীৰ সময়ত কবৰৰ গাঁত খান্দিবলৈ মানুহৰ অভাৱ হৈছে। মাস্ক পৰিধান নকৰাৰ ফলত দেশখনত ক’ৰ’ণা সংক্ৰমণৰ বৃদ্ধিৰ আশংকা আৰু বাঢ়িছে। সেয়ে মাস্ক পৰিধান নকৰা আইন ভংগকাৰীৰ দ্বাৰা এই কাম কৰোৱা হৈছে।” ইন্দোনেছিয়াৰ স্থানীয় প্ৰশাসনে এইদৰে কয়।
প্ৰশাসনৰ মতে ক’ৰ’ণা আক্ৰান্ত মৃতদেহৰ বাবে কবৰৰ গাঁত খন্দাৰ ফলত স্বাভাৱিকতে আইন ভংগকাৰীসকল আতংকিত হ’ব।
ইয়াৰ ফলত জলসাধাৰণৰ মাজত সচেতনতা বৃদ্ধি পাব বুলিও প্ৰশাসনে দাবী কৰিছে।
