দেশত ক’ৰ’ণাৰ মহামাৰীৰ সন্ত্ৰাসৰ বাবে বিভিন্ন উন্নয়নমূলক কাম কাজ স্তব্ধ হৈ আছে যদিও নতুন সংসদ ভৱন নিৰ্মাণৰ যাৱতীয় প্ৰস্তুতি হ’লে দুৰন্ত গতিত অব্যাহত আছে।
হয়, এই ক’ৰ’ণা মহামাৰী মাজতে প্ৰস্তাৱিত নতুন সংসদ ভৱন নিৰ্মাণৰ নিবিদা প্ৰদান সম্পন্ন হৈ গৈছে।
এই নিবিদা লাভ কৰিছে টাটা গোষ্ঠীয়ে। ৮৬২ কোটি টকাৰ ন্যূনতম দৰত টাটাই বুধবাৰে লাভ কৰিছে নতুন সংসদ ভৱন নিৰ্মাণৰ নিবিদা।
এই নিবিদা দাখিলৰ দৌৰত মুঠ সাতটা সংস্থাই অংশগ্ৰহণ কৰিছিল। সংসদ ভৱন নিৰ্মাণৰ সৰ্বোচ্চ দৰ ধাৰ্য কৰা হৈছিল ৯৪০ কোটি টকা। কিন্তু সকলোতকৈ কম দৰ দি টাটাই লাভ কৰিলে এই নিবিদা।
উল্লেখ্য যে, নিবিদা লাভ কৰা টাটাই আগন্তুক ২০ৰ পৰা ২১ মাহৰ ভিতৰত নতুন সংসদ ভৱন নিৰ্মাণ সম্পূৰ্ণ কৰিব লাগিব।
এই নতুন সংসদ ভৱনটো বৰ্তমানৰ সংসদ ভৱনৰ সমীপতে নিৰ্মাণ কৰা হ’ব। ত্ৰিভূজাকাৰৰ এই নতুন সংসদ ভৱনটোত ৯০০ৰ পৰা ১২০০খন আসন থাকিব বুলি জানিব পৰা গৈছে।
ক’ৰ’ণা মহামাৰীয়ে দেশৰ অৰ্থনীতি বিধ্বস্ত কৰাৰ সময়তে বৃহৎ পৰিমাণৰ ধন ব্যয়েৰে নতুন সংসদ ভৱন নিৰ্মাণৰ চৰকাৰৰ এই উদ্যোগক বিৰোধিতা কৰিছে বিৰোধী পক্ষই।
ইফালে নতুন ভৱনৰ নক্সা তৈয়াৰ কৰা এটা গুজৰাটী প্ৰতিষ্ঠানে কেৱল নক্সা তৈয়াৰতে চৰকাৰৰ পৰা আদায় লৈছিল ২৩০ কোটি টকা।
কিদৰে এটা প্ৰতিষ্ঠানে কেৱল ভৱনৰ নক্সা তৈয়াৰতে এই বৃহৎ পৰিমাণৰ ধনৰাশি ল’লে তাকলৈও বিৰোধীয়ে প্ৰশ্ন উত্থাপন কৰিছে।
