অৱশেষত হাইঠা মাটিত পৰিল! : হাথৰাছৰ গণধৰ্ষণ কাণ্ডৰ তদন্ত চিবিআইক দিবলৈ বাধ্য হ’ল যোগী আদিত্যনাথে

অৱশেষত হাথৰাছৰ তৰুণীৰ গণ ধৰ্ষণ আৰু হত্যাকাণ্ডৰ তদন্তৰ দায়িত্ব দেশৰ তদন্তকাৰী সংস্থা চিবিআইক অৰ্পণ কৰিবলৈ বাধ্য হ’ল উত্তৰ প্ৰদেশৰ মুখ্যমন্ত্ৰী যোগী আদিত্যনাথে।

উল্লেখ্য যে উত্তৰ প্ৰদেশৰ হাথৰাছ সংঘটিত এই দানৱীয় কাণ্ডটোক লৈ উত্তৰ প্ৰদেশৰ যোগী আদিত্যনাথৰ চৰকাৰে লোৱা পদক্ষেপৰ বাবে সমগ্ৰ দেশজুৰি তীব্ৰ সমালোচনাৰ সন্মুখীন হৈছে।

আনকি এই জঘন্য কাণ্ডটোৰ সংক্ৰান্তত যোগী চৰকাৰে ফেচিষ্ট আচৰণ কৰা বুলিও সমগ্ৰ দেশত প্ৰতিবাদৰ ঢৌ উঠিছে।

সমগ্ৰ দেশত উত্তৰ প্ৰদেশৰ যোগী আদিত্যনাথৰ চৰকাৰৰ ভূমিকাক লৈ হোৱা তীব্ৰ প্ৰতিবাদৰ পিছত এই ঘটনাৰ তদন্ত ভাৰ চিবিআইক অৰ্পণ কৰিবলৈ বাধ্য হৈছে যোগী চৰকাৰ।

Chief Minister Yogi Adityanath orders Central Bureau of Investigation (CBI) probe into the #Hathras case: Chief Minister’s Office (CMO) (File pic) pic.twitter.com/VVvf2M6hRc

— ANI UP (@ANINewsUP) October 3, 2020

উল্লেখ্য যে, দুদিনমান পূৰ্বে উত্তৰ প্ৰদেশ আৰক্ষীৰ এডিজি প্ৰবীণ কুমাৰে সংবাদ মাধ্যমৰ আগত ফৰেনচিক বিজ্ঞান গৱেষণাগাৰত কৰা তৰুণী গৰাকীৰ শৰীৰৰ নমুনা পৰীক্ষাত তৰুণী গৰাকীক ধৰ্ষণ কৰা হোৱা নাছিল বুলি ৰিপ’ৰ্ট অহাৰ কথা জনাইছিল।

ইয়াৰ বিৰুদ্ধেও দেশজুৰি আৰম্ভ হৈছে তীব্ৰ প্ৰতিক্ৰিয়াৰ।

“ফৰেনছিক বিজ্ঞান গৱেষণাগাৰৰ প্ৰতিবেদনত স্পষ্টকৈ কোৱা হৈছে যে মহিলাগৰাকীৰ পৰা সংগ্ৰহ কৰা নমুনাবোৰত পৰুষৰ বীৰ্য পোৱা নগ’ল… প্ৰতিবেদনত স্পষ্টকৈ কোৱা হৈছে যে মহিলাগৰাকীক ধৰ্ষণ কৰা হোৱা নাছিল।” উত্তৰ প্ৰদেশ আৰক্ষীৰ এডিজি প্ৰবীণ কুমাৰে সংবাদমেলত এইদৰে কৈছিল।

ইফালে কংগ্ৰেছ নেতা আৰু নেত্ৰী ৰাহুল গান্ধী আৰু প্ৰিয়ংকা গান্ধী ভদ্ৰাক হাথৰাছৰ নিৰ্যাতিতা পৰিয়ালটোক যোৱা বৃহস্পতিবাৰে সাক্ষাৎ কৰিবলৈ নিদি যোগী আদিত্যনাথৰ চৰকাৰৰ আৰক্ষীয়ে আটক কৰাৰ বাবে দেশজুৰি তীব্ৰ সমালোচনাৰ সন্মুখীন হৈছে উত্তৰ প্ৰদেশ চৰকাৰ।

এই সমালোচনাৰ কোবত তিষ্টিব নোৱাৰি অৱশেষত শনিবাৰে ৰাহুল গান্ধী আৰু প্ৰিয়ংকা গান্ধীসহ পাঁচগৰাকী কংগ্ৰেছৰ শীৰ্ষনেতাক হাথৰাছৰ নিৰ্যাতিতা পৰিয়ালটোক সাক্ষাতৰ অনুমতি দিবলৈ বাধ্য হয় যোগী চৰকাৰ।

যোগী চৰকাৰৰ আৰক্ষীয়ে সংবাদ মাধ্যমৰ লোককো নিৰ্যাতিতা পৰিয়ালটোক সাক্ষাতৰ অনমুতি দিয়া নাছিল। আনকি বিশাল আৰক্ষী বাহিনী মোতায়েন কৰি নিৰ্যাতিতা পৰিয়ালটোক সংবাদ মাধ্যমক সাক্ষাৎ কৰিবলৈ নিদি গৃহ বন্দী কৰি ৰাখিছিল যোগী চৰকাৰে।

কিন্তু ৰাষ্ট্ৰীয় স্তৰত ইয়াৰ বিৰুদ্ধে তীব্ৰ জনমত সৃষ্টি হোৱাত যোগী চৰকাৰে শনিবাৰে সংবাদ মাধ্যমৰ লোকক নিৰ্যাতিতা পৰিয়ালটোক সাক্ষাতৰ অনুমতি দিবলৈ বাধ্য হয়।

উল্লেখ্য যে, যোৱা ১৪ ছেপ্টেম্বৰত উত্তৰ প্ৰদেশ হাথৰাছ জিলাৰ এগৰাকী দলিত তৰুণীক হিন্দু সম্প্ৰদায়ৰ উচ্চ বৰ্ণৰ চাৰি যুৱকে দলৱদ্ধভাৱে ধৰ্ষণ কৰি জিভা কাটি দিয়াৰ লগতে প্ৰহাৰ কৰি ৰাজহাড় ভাঙি দিছিল।

ইয়াৰ পিছতে যোৱা মংগলবাৰে পুৱা নিৰ্যাতিতা তৰুণী গৰাকী দিল্লীৰ চফদৰজং হাস্পতালত চিকিৎসাধীন অৱস্থাত মৃত্যু ঘটে।

কিন্তু মৃত যুৱতীগৰাকীৰ শৱদেহটো পৰিয়ালৰ লোকক অৰ্পণ নকৰি উত্তৰ প্ৰদেশ আৰক্ষীয়ে অমানৱীয়তাৰ পৰিচয় দি শেষকৃত্য কৰা বুলি অভিযোগ উত্থাপন হৈছে।