২৫ বছৰীয়া এগৰাকী মাতৃয়ে ৮ মহীয়া পুত্ৰ সন্তানৰ সৈতে জুইত আত্মজাহ দিয়াৰ এক কৰুণ ঘটনা পোহৰলৈ আহিছে।
এই দুখজনক ঘটনাটো সংঘটিত হৈছে ঝাৰখণ্ডৰ জামাটাৰা জিলাত।
ঘটনাৰ বিৱৰণীৰ অনুসৰি যোৱা মংগলবাৰে ৰাজ্যখনৰ জামাটাৰা জিলাৰ নালা আৰক্ষী থানাৰ অন্তৰ্গত সূৰ্য্যপানী গাঁৱৰ বৈশাখী মুৰ্মু নামৰ ২৫ বছৰীয়া মাতৃ গৰাকীয়ে ৮ মহীয়া নিজ পুত্ৰ সন্তানটিৰ সৈতে জুইত আত্মজাহ দিয়ে।
মাতৃ গৰাকীয়ে যোৱা তিনি মাহ ধৰি ৮ মহীয়া পুত্ৰ সন্তানটিৰ দুৰাৰোগ্য বেমাৰৰ বাবে হতাশাগ্ৰস্তাত ভুগি অহাৰ কথা প্ৰাথমিক তদন্তত পোহৰলৈ অহা বুলি নালা উপ সংমণ্ডল আৰক্ষী বিষয়া মনোজ কুমাৰ ঝা-এ সংবাদ মাধ্যমক জানিবলৈ দিছে।
আৰক্ষী বিষয়া ঝা-এ সংবাদ মাধম্যক জনোৱা অনুসৰি বৈশাখীয়ে ৮ মহীয়া সন্তানটোৰ সৈতে নিজ পিতৃ ঘৰতে আছিল। তেওঁ স্বামী ৰাজেন্দ্ৰ টুডুৱে বাহিৰত কাম কৰি বৈশাখীৰ ভৰণ পোষণ আৰু সন্তানটিৰ চিকিৎসাৰ বাবে নিয়মিত পইচাৰ যোগান ধৰি আহিছিল।
‘বৈশাখীৰৰ পিতৃ-মাতৃৰ অনুসৰি, তেওঁ সন্তানৰ সৈতে ঘৰৰ পৰা ওলাই গৈ উভতি আহিছিল আৰু ঘৰৰ আন লোকসকল শুই থকা অৱস্থাত নিজৰ আৰু শিশুটিৰ শৰীৰত কেৰাচিন ঢালি অগ্নি সংযোগ কৰি লৈছিল।’ আৰক্ষী বিষয়া ঝা-এ কয়।
বৈশাখী আৰু সন্তানটিৰ অগ্নিদগ্ধ অৱস্থাৰ আৰ্তনাদ শুনি পিতৃ-মাতৃৰ লগতে প্ৰতিবেশীসকলে আহি দুয়োকে উদ্ধাৰ কৰি আহত অৱস্থাত চিকিৎসালয় ভৰ্তি কৰায় যদিও তেওঁলোকৰ দুয়োৰে মৃত্যু ঘটে।
আৰক্ষীয়ে দুয়োৰে মৃতদেহ মৰণোত্তৰ পৰীক্ষাৰ বাবে প্ৰেৰণ কৰি তদন্ত অব্যাহত ৰাখিছে।
