ভাৰতীয় জনতা পাৰ্টীৰ ৰাষ্ট্ৰীয় সাধাৰণ সম্পাদক দুষ্যন্ত কুমাৰ গৌতমক ছিকিমৰ ৰাজ্যপাল হিচাপে নিযুক্তি দিয়াৰ বিৰুদ্ধে নতুন দিল্লীৰ ইণ্ডিয়া গেটত প্ৰতিবাদ সাব্যস্ত কৰা অংকিতা ভাণ্ডাৰীৰ পিতৃ-মাতৃক আৰক্ষীয়ে আটক কৰাৰ পাছত বৃহস্পতিবাৰে পুৱা মুকলি কৰি দিয়ে। ২০২২ চনত উত্তৰাখণ্ডত হত্যাৰ বলি হোৱা ১৯ বছৰীয়া অংকিতা ভাণ্ডাৰীৰ হত্যাকাণ্ডত গৌতমৰ গুৰুত্বপূৰ্ণ ভূমিকা থকা বুলি পৰিয়ালটোৱে ধাৰাবাহিকভাৱে অভিযোগ উত্থাপন কৰি আহিছে। আৰক্ষীৰ জিম্মাৰ পৰা মুকলি হোৱাৰ পাছতে অংকিতাৰ পিতৃয়ে সংবাদ সংস্থা পিটিআইৰ আগত কয় যে গৌতমৰ নিযুক্তি বাতিল কৰিবলৈ তেওঁলোকে চৰকাৰক ২৪ ঘণ্টাৰ চূড়ান্ত সময়সীমা বান্ধি দিছে আৰু চৰকাৰে এই দাবী মানি নল’লে দেশজুৰি তীব্ৰ আন্দোলন গঢ়ি তোলা হ’ব।
উল্লেখ্য যে যোৱা ১২ অক্টোবৰত দুষ্যন্ত কুমাৰ গৌতমক সিকিমৰ ৰাজ্যপাল হিচাপে নিযুক্তি দিয়া হৈছিল। ইয়াৰ বিৰোধিতা কৰি বুধবাৰে অংকিতাৰ পিতৃ-মাতৃয়ে ইণ্ডিয়া গেটত ধৰ্ণা কাৰ্যসূচী আৰম্ভ কৰিছিল। এই প্ৰতিবাদস্থলীত লোকসভাৰ বিৰোধী দলপতি ৰাহুল গান্ধী আৰু কংগ্ৰেছ সাংসদ প্ৰিয়ংকা গান্ধী ভাদ্ৰা উপস্থিত হৈ ভুক্তভোগী পৰিয়ালটোৰ দাবীৰ প্ৰতি সমমৰ্মিতা প্ৰকাশ কৰে। গান্ধী ভাতৃ-ভগ্নী তাৰ পৰা প্ৰস্থান কৰাৰ পাছতো কংগ্ৰেছৰ মিডিয়া আৰু প্ৰচাৰ বিভাগৰ মুৰব্বী পৱন খেৰা, সামাজিক মাধ্যম বিভাগৰ মুৰব্বী সুপ্ৰিয়া শ্ৰীনেত, লোকসভাৰ সাংসদ জ্যোতিমণি ছেন্নিমালাই আৰু ভাৰতীয় যুৱ কংগ্ৰেছৰ সভাপতি উদয় ভানু চিবকে ধৰি কেইবাগৰাকীও নেতা ধৰ্ণাস্থলীত উপস্থিত আছিল। আৰক্ষীয়ে এই কংগ্ৰেছ নেতাসকলকো আটক কৰি পৰৱৰ্তী সময়ত মুকলি কৰি দিয়ে। ইপিনে, সামাজিক মাধ্যম এক্সত যোগিতা ভায়ানা নামৰ এগৰাকী সমাজকৰ্মীয়ে প্ৰকাশ কৰা অনুসৰি বৃহস্পতিবাৰে পুৱতি নিশা প্ৰায় ৪:০৫ বজাত দিল্লী আৰক্ষীয়ে অংকিতাৰ শোকসন্তপ্ত পিতৃ-মাতৃক ইণ্ডিয়া গেটৰ পৰা বলপূৰ্বকভাৱে আঁতৰাই নি আটক কৰে।
২০২২ চনৰ ১৮ ছেপ্টেম্বৰত হৃষীকেশৰ বনন্তৰা ৰিজ’ৰ্টত অভ্যৰ্থনাকাৰী হিচাপে কৰ্মৰত অৱস্থাত অংকিতা ভাণ্ডাৰীক হত্যা কৰা হৈছিল। এই হত্যাকাণ্ডৰ গোচৰত প্ৰাক্তন বিজেপি নেতা বিনোদ আৰ্যৰ পুত্ৰ তথা ৰিজ’ৰ্টখনৰ স্বত্বাধিকাৰী পুলকিত আৰ্যৰ লগতে তেওঁৰ দুই সহযোগী ক্ৰমে ৰিজ’ৰ্টৰ মেনেজাৰ সৌৰভ ভাস্কৰ আৰু সহকাৰী মেনেজাৰ অংকিত গুপ্তাক দোষী সাব্যস্ত কৰা হৈছিল।
অংকিতাৰ পৰিয়ালে আৰম্ভণিৰে পৰা এই অপৰাধত এগৰাকী তথাকথিত ভিআইপি ব্যক্তি জড়িত থকাৰ অভিযোগ তুলি আহিছে। বিভিন্ন তথ্য অনুসৰি, এগৰাকী ভিআইপি অতিথিক অনৈতিকভাৱে বিশেষ সেৱা প্ৰদান কৰিবলৈ অস্বীকাৰ কৰাৰ বাবেই অংকিতাক হত্যা কৰা হৈছিল আৰু পৰিয়ালটোৰ অভিযোগ অনুসৰি বিজেপিৰ তদানীন্তন উত্তৰাখণ্ডৰ ভাৰপ্ৰাপ্ত নেতা দুষ্যন্ত কুমাৰ গৌতমেই আছিল সেইগৰাকী ভিআইপি। আনকি উত্তৰাখণ্ড মহিলা মঞ্চৰ নেতৃত্বত মহিলা গোট আৰু গণ সংগঠনৰ ৩০ গৰাকী প্ৰতিনিধিক লৈ গঠিত এটা তথ্য অনুসন্ধানকাৰী দলেও আৰক্ষীৰ তদন্ত প্ৰক্ৰিয়াক লৈ সন্দেহ প্ৰকাশ কৰিছিল। এতিয়া গৌতমৰ ৰাজ্যপাল নিযুক্তিক লৈ ভুক্তভোগী পৰিয়ালটোৱে দিয়া ২৪ ঘণ্টীয়া চূড়ান্ত সময়সীমাৰ পাছত কেন্দ্ৰীয় চৰকাৰে কি স্থিতি গ্ৰহণ কৰে, সেয়া লক্ষণীয় হ’ব।
