আজি খানাপাৰাস্থিত অসম প্ৰশাসনীয় পদাধিকাৰী আইন মহাবিদ্যালয়ত ৰাজ্য চৰকাৰৰ এখন কেবিনেট বৈঠক অনুষ্ঠিত হয়। মুখ্যমন্ত্ৰী সৰ্বানন্দ সোণোৱালৰ অধ্যক্ষতাত অনুষ্ঠিত হোৱা এই বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়।
বৈঠকৰ অন্তত মন্ত্ৰী চন্দ্ৰমোহন পাটোৱাৰীয়ে সংবাদ মাধ্যমৰ আগত কেবিনেট সিদ্ধান্তসমূহ ঘোষণা কৰে।
তলত তেওঁ কৰা ঘোষণাসমূহ অসম্পাদিত ৰূপত উল্লেখ কৰা হ’ল :-
- চৰকাৰী বিভাগৰ সকলো নিযুক্তি পৰীক্ষা বাহিৰৰ ব্যক্তিগত প্ৰতিষ্ঠানক দিয়াৰ ব্যৱস্থাটো আজিৰ পৰা অন্ত পৰিল। কোনোধৰণৰ ব্যক্তিগত প্ৰতিষ্ঠানক পৰীক্ষা অনুষ্ঠিত কৰিবলৈ দিয়া নহ’ব। কোনো বিশ্ববিদ্যালয় নাইবা বিভাগে নিজেই পৰীক্ষা অনুষ্ঠিত কৰিব পাৰিব।
- সদৌ বড়ো-কছাৰী স্বায়ত্ত শাসিত পৰিষদৰ অধ্যাদেশ আজি বিল হিচাপে কেবিনেটে পাছ কৰিছে।
- বড়ো ভাষা সহযোগী ৰাজ্যিক ভাষা হিচাপে স্বীকৃতি লাভ কৰিছে। বিটিচি নিৰ্বাচন অহা ডিচেম্বৰ মাহৰ ভিতৰত অনুষ্ঠিত কৰাৰ সিদ্ধান্ত গ্ৰহণ কৰা হৈছে।
- উন্নয়ন পৰিষদৰ সদস্যৰ সংখ্যা সৰ্বনিম্ন ২৫ৰপৰা সৰ্বাধিক ৪৫ গৰাকীলৈকে বৃদ্ধি কৰা হৈছে।
- বিটিএডি এলেকাৰ চাইন ব’ৰ্ডসমূহৰ বড়ো, ইংৰাজীৰ উপৰিও অসমীয়া ভাষা ব্যৱহাৰৰ সিদ্ধান্ত লোৱা হৈছে।
- পূৰ্বৰ নিয়ম অনুসৰি অসম লোকসেৱা আয়োগত এগৰাকী মহিলা সদস্য থাকিব বুলি নিয়ম আছিল যদিও এতিয়া প্ৰয়োজন সাপেক্ষে বেছি থাকিব পাৰিব বুলি কেবিনেটত সিদ্ধান্ত গ্ৰহণ কৰা হৈছে।
- অসমৰ ৪২৮ খন চাহ বাগিছাৰ ছাত্ৰ-ছাত্ৰীসকলৰ বাবে দিনত থকাৰ ব্যৱস্থা, পুৱাৰ আহাৰ, দুপৰীয়াৰ আহাৰ আৰু য়ুনিফৰ্ম ৰাজ্য চৰকাৰে বহন কৰিব।
- মাজুলীত ফৰেষ্ট বিভাগৰ পৰা দুটা ৰেঞ্জ কাৰ্যালয় আৰু চাৰিটা মাণ্ডলিক কাৰ্যালয় গঠন কৰা হ’ল।
- কনকলতা মহিলা সবলীকৰণ আঁচনিৰ অধীনত স্বীকৃতিপ্ৰাপ্ত আত্ম সহায়ক গোটসমূহক ২৫ হাজাৰ টকাৰ পৰিৱৰ্তে ৫০ হাজাৰ টকাৰ সাহায্য প্ৰদান কৰা হ’ব।
- মহা অধিবক্তাৰ পদমৰ্য্যদা কেবিনেট পৰ্য্যায়লৈ উন্নীত কৰা হৈছে।
