চৰকাৰক কৰ ফাঁকি দি ছুইছ বেংকত কোনে টকা ৰাখিছে সেই সম্পৰ্কীয় তথ্যৰ দ্বিতীয়খন তালিকা দিছে বেংকটোৱে।
শুকুৰবাৰে এই তথ্যৰ দ্বিতীয়খন তালিকা ভাৰত চৰকাৰে লাভ কৰিছে।
তালিকাত কিমানজনৰ নাম আছে সেই তথ্য কেন্দ্ৰীয় চৰকাৰে প্ৰকাশ কৰা নাই। অৱশ্যে, এই তথ্য ক’লা ধনৰ বিৰুদ্ধে কেন্দ্ৰীয় চৰকাৰৰ মূল অস্ত্ৰ।
বিশ্বৰ ৮৬খন দেশৰ নাগৰিকৰ বেংক একাউন্টৰ তথ্য সংশ্লিষ্ট দেশৰ চৰকাৰসমূহক ছুইছ বেংক কৰ্তৃপক্ষই জনাইছে। এই তালিকাত ভাৰতৰ নামো আছে।
ছুইজাৰলেণ্ড ফেডাৰেল টেক্স এডমিনিষ্ট্ৰেশ্যনে সেই বেংকত কোন কোন দেশৰ নাগৰিকৰ একাউন্ট আছে তাৰ তথ্য দিয়ে।
অটোমেটিক এক্সচেঞ্জ অফ ইনফৰমেশ্যন নীতি অনুসৰি চলিত বছৰত ৩১লাখ একাউন্টৰ তথ্য তেওঁলোকে দিছে। ৮৬খন দেশৰ তালিকাত ভাৰতৰ নামো আছে আৰু সেয়েহে ভাৰত চৰকাৰলৈও ডছিয়াৰ প্ৰেৰণ কৰিছে।
যোৱা এবছৰত কেন্দ্ৰ মোদী চৰকাৰলৈ ১০০ৰো অধিক ব্যক্তি তথা সংস্থাৰ নাম বেংকটোৱে প্ৰেৰণ কৰিছে। এই তথ্যৰ ভিত্তিতে কেন্দ্ৰীয় চৰকাৰৰ বিভিন্ন সংস্থাই ক’লা ধনৰ বিৰুদ্ধে অভিযান চলাইছে।
নতুন তথ্য লাভ কৰাৰ পাছত এই অভিযান আৰু তীব্ৰতৰ হ’ব পাৰে যদিও ছুইছ বেংকৰ পৰা পোৱা তথ্যৰ বিষয়ে কেন্দ্ৰই এতিয়াও মুখ খোলা নাই।
উল্লেখ্য যে ২০১৪ত কেন্দ্ৰত ক্ষমতালৈ অহাৰ পূৰ্বে নৰেন্দ্ৰ মোদীয়ে ক’লা ধনৰ বিৰুদ্ধে এক প্ৰকাৰ যুদ্ধ ঘোষণা কৰিছিল। এই সন্দৰ্ভত ছুইছ বেংকৰ পৰা তথ্য অনাৰ বাবে চুক্তিও স্বাক্ষৰিত হৈছে আৰু নিয়মিত তথ্য লাভ কৰি আহিছে।
কিন্তু ক’লা ধন উদ্ধাৰ কৰাৰ ক্ষেত্ৰত বিশেষ ভূমিকা গ্ৰহণ নকাৰ অভিযোগ উত্থাপন হৈ আহিছে চৰকাৰখনৰ বিৰুদ্ধে।
