আইপিএলৰ শনিবাৰে খেলোৱা এখন মেচত ৰয়েল চেলেঞ্জাৰ্ছ বাংগালোৰে চেন্নাই ছুপাৰ কিংছক ৩৭ৰাণত পৰাজিত কৰে।
প্ৰায় একপক্ষীয় হৈ পৰা মেচখনত মহেন্দ্ৰ সিং ধোনীৰ নেতৃত্বৰ চেন্নাইক বিৰাট কোহলীৰ আৰচিবিয়ে অনায়াসে পৰাজিত কৰে।
আৰচিবিয়ে নিৰ্দ্ধাৰিত কৰি দিয়া ১৭০ৰাণৰ লক্ষ্য অনুসৰণ কৰি চেন্নাইয়ে তেওঁলোকৰ নিৰ্দ্ধাৰিত ২০ অভাৰত মাত্ৰ ১৩২ৰাণহে কৰিবলৈ সক্ষম হয়।
এপিনে কোহলীৰ ‘বিৰাট’ বিক্ৰম আৰু আনপিনে ‘কুল’ হৈ পৰিল ধোনীৰ বেট। কোহলীয়ে অপৰাজিত ৯০ৰাণৰ ইনিংছ খেলাৰ বিপৰীতে ধোনীয়ে মাত্ৰ ১০ৰাণহে কৰিবলৈ সক্ষম হয়।
টছত জিকি প্ৰথমে বেটিং কৰিবলৈ লৈ আৰচিবিয়ে প্ৰথমতে এৰন ফিঞ্চৰ উইকেট হেৰুৱায়। দীপক চাহাৰে তেওঁক ২ৰাণতে পেভলিয়নলৈ পঠিয়ায়।
ইয়াৰ পাছতে আৰচিবিৰ ইনিংছৰ গুৰিবঠা ধৰে বিৰাট কোহলি আৰু দেবদূত পাড়িক্কলে। দেবদূতে ৩৩ৰাণ কৰে। এইবাৰে এ বি ভিলিয়াৰ্ছ ব্যৰ্থ হয় আৰু কোনো ৰাণ নকৰাকৈয়ে পেভলিয়নলৈ ওভতে।
বিৰাট কোহলীয়ে আন বেটছমেনক লৈ ইনিংছ ধৰি ৰখাৰ লগতে শেষলৈ ৯০ৰাণ কৰি অপৰাজিত হৈ থাকে। বিৰাটে খেলা ৫২টা বলৰ ইনিংছটোত আছিল ৪টা চাৰি আৰু ৪টা ছয়।
অৱশেষত নিৰ্দ্ধাৰিত ২০ অভাৰত আৰচিবিয়ে চাৰি উইকেটৰ বিনিময়ত ১৬৯ৰাণ কৰে। চেন্নাইৰ হৈ শাৰ্দুল ঠাকুৰে দুটা উইকেট দখল কৰে।
আনহাতে, প্ৰত্যুত্তৰত বেটিং কৰিবলৈ নামি বিপৰ্যয়ৰ মুখত পৰে চেন্নাই। ৱাটছনে ১৪, ডুপ্লেছিয়ে ৮ আৰু ধোনীয়ে ১০ ৰাণহে কৰিবলৈ সক্ষম হয়। আইপিএলত ৩০০টা ছয় মৰাৰ ৰেকৰ্ড গঢ়িলেও সেই অভাৰটোতে চাহালৰ বলত আউট হয়।
ইয়াৰ পাছতেই ৰায়ডুৱে ৪২ ৰাণ আৰু দলত নতুনকৈ স্থান লাভ কৰা জগদেশনে ৩৩ৰাণ কৰে যদিও সেয়া জয়ৰ বাবে পৰ্যাপ্ত নহ’ল।
এই মেচত জয়লাভ কৰি বিৰাটৰ আৰচিবি তালিকাত এটা স্থান ওপৰলৈ উঠিল যদিও ধোনীৰ চেন্নাই ছুপাৰ কিংছ বহুখিনি চাপৰ মাজত সোমাই পৰিল।
