খানাপাৰাস্থিত পশু চিকিৎসা বিজ্ঞান মহাবিদ্যালয়ৰ সহকাৰী অধ্যাপক ড০ যদুমণি কছাৰীৰ বিৰুদ্ধে উত্থাপিত হৈছে মহিলাৰ শ্লীলতা হানি কৰাৰ অভিযোগ।
এগৰাকী মহিলা দণ্ডাধীশে কছাৰীৰ বিৰুদ্ধে তেওঁৰ মাতৃ আৰু জ্যেষ্ঠ ভগ্নীক গাত হাতেৰে থেলি পেলাই দিয়াৰ গুৰুতৰ অভিযোগ উত্থাপন কৰিছে।
এই ঘটনা সন্দৰ্ভত মহিলা দণ্ডাধীশগৰাকীয়ে দিছপুৰ থানাত ভাৰতীয় দণ্ডবিধিৰ ৩৫৪ নং ধাৰাৰ অধীনত এক এজাহাৰ দাখিল কৰে। এই এজাহাৰৰ ভিত্তিত দিছপুৰ আৰক্ষীয়ে এক গোচৰ ৰুজু কৰে।
ভাৰতীয় দণ্ডবিধিৰ ৩৫৪ ধাৰাটো এক জামিনবিহীন ধাৰা আৰু এগৰাকী মহিলাৰ শ্লীলতা হানিৰ চেষ্টা কৰিলে এই ধাৰাৰ অধীনত অভিযুক্তৰ বিৰুদ্ধে গোচৰ ৰুজু হয়।
ঘটনা অনুসৰি মহিলাগৰাকীয়ে এজনী কুকুৰৰ বন্ধ্যাকৰণ কৰাবলৈ ছয়মাইলস্থিত এপিজ হেপী পজ পেট হ’ম নামৰ এখন ক্লিনিকলৈ লৈ আনিছিল ৭ অক্টোবৰত। যিখন ক্লিনিকত ড০ যদুমণি কছাৰীয়ে আমন্ত্ৰিত চিকিৎসক হিচাপে আছিল।
চাৰ্জাৰী কৰাৰ পাছতেই কুকুৰজনীৰ অৱস্থা বেয়াৰ ফালে ঢাল খায়। ক্লিনিকৰ স্বত্বাধিকাৰীয়ে জনোৱা অনুসৰি অপাৰেশ্যন কৰাৰ ৭-৮ ঘন্টালৈকে কুকুৰজনীক একো খুৱাবলৈ মানা কৰিছিল। কিন্তু কুকুৰজনীৰ বমিওৱাৰ দৰে হোৱাত মহিলাগৰাকীয়ে পানী খুৱাই দিয়াত পুনৰ বমি কৰিবলৈ আৰম্ভ কৰে। চিকিৎসকে দৰৱ-পাতি খুৱাই দিয়াত বমি বন্ধ হয় যদিও ৩:৪৫ বজাত কুকুৰজনীৰ মৃত্যু হয়।
তাৰ পাছত মহিলাগৰাকীয়ে কুকুৰটোৰ চিকিৎসকৰ গাফিলতিৰ বাবে মৃত্যু হোৱা বুলি অভিযোগ তোলে। লগতে তেওঁ দিছপুৰ থানাত চিকিৎসক যদুমণি কছাৰীৰ বিৰুদ্ধে মাতৃ আৰু ভগ্নীক গাত ধৰি গতিয়াই থেলি দিয়া, কাপোৰত ধৰি ভাবুকি দিয়া ইত্যাদি অভিযোগৰে এজাহাৰ দাখিল কৰে।
এই গুৰুতৰ অভিযোগ উত্থাপন হোৱাৰ পাছতো বৰ্তমান পৰ্য্যন্ত দিছপুৰ আৰক্ষীয়ে গ্ৰেপ্তাৰ কৰা নাই চিকিৎসক ড০ যদুমণি কছাৰীক। কালি ক্লিনিকৰ স্বত্বাধিকাৰী আৰু চিকিৎসকক মাতি আনি সোধা-পোছা কৰিছিল বুলি জানিব পৰা গৈছে।
চিকিৎসকগৰাকীৰ বিৰুদ্ধে উত্থাপিত অভিযোগ সন্দৰ্ভত আমি প্ৰতিক্ৰিয়া বিচাৰি ফোনযোগে যোগাযোগ কৰিছিলো ড০ যদুমণি কছাৰীৰ সৈতে।
অভিযোগ সন্দৰ্ভত তেওঁক সোধাত এই অভিযোগ পোনচাটেই নাকচ কৰে। তেনেকুৱা কোনোধৰণৰ পৰিস্থিতিৰ সৃষ্টি হোৱা নাছিল বুলি তেওঁ আমাৰ সাংবাদিকক কয়।
‘তেনেকুৱা একো কৰা নাছিলো। আমি চাকৰি কৰা মানুহ তথা পশু চিকিৎসা বিজ্ঞান মহাবিদ্যালয়ৰ সহকাৰী অধ্যাপক। এগৰাকী ৬৫ বছৰৰ বৃদ্ধাক আমি কেনেকৈ গতিয়াব পাৰো? আমি জোৰকৈ মাত এটাও মতা নাছিলো। মোৰ বিৰুদ্ধে উত্থাপন হোৱা অভিযোগ ভিত্তিহীন।‘
ইপিনে, এই সন্দৰ্ভত ক্লিনিকৰ স্বত্বাধিকাৰীক সোধাত তেওঁ ওলোটাই দণ্ডাধীশ মহিলা, তেওঁৰ জ্যেষ্ঠ ভগ্নীয়ে কুকুৰজনীৰ মৃত্যুৰ পাছত আমি নিজে কুকুৰজনীক মাৰি পেলাইছো বুলি অভিযোগ তুলি দিছপুৰ থানাত গোচৰ দিয়াৰ ভাবুকি দিয়া বুলি কয়।
তাৎপয্যপূৰ্ণভাৱে, এইখিনিতে এটা কথা উল্লেখ কৰিব লাগিব যে, কোনো পশু চিকিৎসা বিজ্ঞান মহাবিদ্যালয়ত কৰ্মৰত চিকিৎসকে যাতে বেলেগ কোনো ব্যক্তিগত ক্লিনিক বা প্ৰতিষ্ঠানত চিকিৎসা সেৱা প্ৰদান কৰিব নোৱাৰে তাৰ বাবে নন প্ৰেকটিছিং এলাউন্স প্ৰদান কৰা হয়।
প্ৰয়োজন সাপেক্ষে পশু চিকিৎসা বিজ্ঞান মহাবিদ্যালয়ৰ চিকিৎসালয়লৈ নি চিকিৎসা কৰিব পাৰিব কিন্তু কোনো ব্যক্তিগত প্ৰতিষ্ঠান বা চিকিৎসালয়ত চিকিৎসা কৰাব নোৱাৰিব।
ইপিনে, এই সন্দৰ্ভত ড০ কছাৰীক সোধাত তেওঁ কয় ‘মোক আমন্ত্ৰিত চিকিৎসক হিচাপে মাননি ক্লিনিকৰ পৰা দিয়ে, মই ক্লিনিকখনত ৰেগুলাৰ নহয়।‘
আনহাতে, এই সন্দৰ্ভত ক্লিনিকৰ স্বত্বাধিকাৰীক সোধাত তেওঁ কয় যে মই অনুৰোধ জনোৱাত তেওঁ মোৰ ক্লিনিকত আহি মাজে সময়ে কুকুৰৰ চাৰ্জাৰী কৰি যায়হি। অকল চাৰ্জাৰীৰ কামৰ বাবেহে মাতো।‘
ইপিনে, ব্যক্তিগত ক্লিনিকত এনেদৰে চিকিৎসা সেৱা আগবঢ়াবলৈ অহাৰ ফলতেই চিকিৎসকগৰাকীৰ বিৰুদ্ধে এনেবোৰ অভিযোগ উত্থাপিত হোৱাৰ লগতে পশু চিকিৎসা বিজ্ঞান মহাবিদ্যালয় আৰু অসম কৃষি বিশ্ববিদ্যালয়ৰ সন্মানত আঘাত হানিলে বুলি একাংশই মত পোষণ কৰে।
ইয়াৰোপৰি পশু চিকিৎসা বিজ্ঞান মহাবিদ্যালয়ৰ Teaching Veterinary Clinical Complex বন্ধ থাকিলে তাৰে সমীপত চকীদাৰজনে লখিমী ভেটেইনেৰী ক্লিনিকত চিকিৎসা কৰিবলৈ পঠিয়াই দিয়ে।
আৰু খানাপাৰাত থকা এনেকুৱা বহু কেইখন ব্যক্তিগত ক্লিনিকত পশু চিকিৎসা বিজ্ঞান মহা বিদ্যালয়ৰ বহু বিশেষজ্ঞই নীতি বৰ্হিভূত ভাবে ধনৰ লালসাত চিকিৎসা প্ৰদান কৰি অহা বুলি গুৰুতৰ অভিযোগ উত্থাপন হৈছে।
কছাৰীৰ বিৰুদ্ধে শেহতীয়াকৈ মহিলাৰ শ্লীলতা হানিৰ অভিযোগ উঠাৰ সময়তে আন বহু চিকিৎসকে নীতি বৰ্হিভূত ভাবে কৰি অহা চিকিৎসা সেৱাৰ বিষয়টোও তদন্তৰ আওতালৈ আনিব লাগে বুলি বহুতে মন্তব্য কৰিছে।
