দেশৰ সৰ্বোচ্চ ন্যায়ালয়ে এলাহাবাদ উচ্চ ন্যায়ালয়ক উত্তৰ প্ৰদেশৰ হাথৰাছৰ ১৯ বছৰীয়া দলিত তৰুণীৰ গণধৰ্ষণ কাণ্ডৰ চিবিআইৰ তদন্তৰ তদাৰক কৰিবলৈ নিৰ্দেশ দিছে। মংগলবাৰে দেশৰ সৰ্বোচ্চ ন্যায়ালয়ে এই নিৰ্দেশ দিয়ে।
উচ্চতম ন্যায়ালয়ৰ মুখ্য ন্যায়াধীশ এছ এ বুবডেই লগতে আৰু কয় যে চিবিআই-এ তদন্ত প্ৰক্ৰিয়া সমাপ্ত কৰাৰ পিছতহে এই গোচৰটো উত্তৰ প্ৰদেশৰ পৰা সৰ্বোচ্চ ন্যায়ালয়লৈ হস্তান্তৰ কৰাৰ বাবে জনোৱা আবেদন বিবেচনা কৰা হ’ব।
ইফালে সৰ্বোচ্চ ন্যায়ালয়ে গণধৰ্ষণ কাণ্ডটোৰ সাক্ষীসকলক নিৰাপত্তা প্ৰদানৰ দিশটোকো পৰ্যবেক্ষণ কৰিবলৈ এলাহাবাদ উচ্চ ন্যায়ালয়ক নিৰ্দেশ দিয়ে।
মুখ্য ন্যায়াধীশ বুবডে, ন্যায়াধীশ এ এছ বুপান্না আৰু ন্যায়াধীশ ৰামসুব্ৰুমণিয়ামৰ এখন খণ্ড বিচাৰপীঠে ১৫ অক্টোবৰত হাথৰাছৰ গণধৰ্ষণ কাণ্ডটো উত্তৰ প্ৰদেশত নিৰপেক্ষ বিচাৰ সম্ভৱ নহয় বুলি কেবাজনো আইনজীৱীয়ে দাখিল কৰা এখন ৰাজহুৱা স্বাৰ্থজড়িত আবেদনৰ শুনানি গ্ৰহণ কৰি আজি উচ্চতম ন্যায়ালয়ে এই নিৰ্দেশ দিয়ে।
উল্লেখ্য যে হাথৰাছৰ ১৯ বছৰীয়া দলিত তৰুণী গৰাকীক গণধৰ্ষণ কৰি শাৰীৰিকভাৱে প্ৰহাৰ কৰাৰ লগতে জিভাখন কাটি পেলোৱা হৈছিল।
ইয়াৰ পিছতে নাৰীক নিৰাপত্তা প্ৰদানত ব্যৰ্থ হোৱা বুলি উত্তৰ প্ৰদেশৰ মুখ্যমন্ত্ৰী যোগী আদিত্যনাথ সমগ্ৰ দেশজুৰি তুমুল সমালোচনাৰ সন্মুখীন হৈছিল।
দেশজুৰি উঠা প্ৰতিবাদত সেউ মানি যোগী আদিত্যনাথে ইয়াৰ তদন্তৰ ভাৰ চিবিআইক অৰ্পণ কৰিবলৈ বাধ্য হয়।
ইতিমধ্যে এই গণধৰ্ষণ কাণ্ডৰ অভিযোগত আৰক্ষীয়ে সঞ্জীৱ(২০) আৰু তেওঁৰ খুড়াক ৰবি(৩৫) আৰু তেওঁৰ বন্ধু ক্ৰমে ৰামু(২৬) আৰু লাভ কুশক গ্ৰেপ্তাৰ কৰি জেইল হাজোতলৈ প্ৰেৰণ কৰিছে।
ইফালে অভিযুক্তসকলে হাথৰাছৰ আৰক্ষী অধীক্ষকলৈ এখন পত্ৰ লিখি দাবী কৰিছে যে তেওঁলোকে তৰুণী গৰাকীক অত্যাচাৰ কৰা নাছিল। নিজ ভাতৃ আৰু মাতৃয়েহে তৰুণী গৰাকীক শাৰীৰিকভাৱে প্ৰহাৰ কৰিছিল।
