উচ্চতম ন্যায়ালয়ে এটা বৰ্বৰ হত্যাকাণ্ডত জড়িত এজন অপৰাধীৰ মৃত্যুদণ্ডৰ নিৰ্দেশ কাৰ্যকৰীকৰণত স্থগিতাদেশ জাৰি কৰিছে।
বুধবাৰে সৰ্বোচ্চ ন্যায়ালয়ৰ মুখ্য ন্যায়াধীশ এছ এ বুডবেৰ ন্যায়িক বিচাৰপীঠে মোহন সিং নামৰ লোকজনক ৰাজস্থান উচ্চ ন্যায়ালয়ে বিহা মৃত্যুদণ্ডৰ শাস্তিক কাৰ্যকৰী কৰাতো স্থগিত ৰাখিছে।
প্ৰণিধানযোগ্য যে মোহন সিং নামৰ লোকজনে এগৰাকী মহিলাক হত্যা কৰি পেট কাটি জননেন্দ্ৰিয়সহ বিভিন্ন অংগ উলিয়াই পেটত কাপোৰ ভৰাই থৈছিল।
এই জঘন্য তথা বৰ্বৰ অপৰাধ সংঘটিত কৰাৰ পিছতে এটা বেগৰ পৰাৰ পৰা মহিলা গৰাকীৰ মৃতদেহটো আৰক্ষীয়ে উদ্ধাৰ কৰি যোৱা বছৰ মে’ মাহত সিঙক গ্ৰেপ্তাৰ কৰি তেওঁৰ বিৰুদ্ধে আদালতত চাৰ্জশ্বীট দাখিল কৰিছিল।
মৃতদেহ মৰণোত্তৰ পৰীক্ষাৰ প্ৰতিবেদনৰ মতে মহিলা গৰাকীৰ শৰীৰৰ বিভিন্ন অংগ চিকিৎসকে লাভ কৰা নাছিল। অৰ্থাৎ লাভ নকৰা অংগবোৰ হত্যাকাৰীজনে কাটি শৰীৰৰ পৰা বিচ্ছিন্ন কৰি পেলাইছিল।
ৰাজস্থান উচ্চ ন্যায়ালয়ে চলিত বৰ্ষৰ ফেব্ৰুৱাৰী মাহত হত্যাৰ অপৰাধত মোহন সিঙক মৃত্যুদণ্ডৰ ৰায় প্ৰদান কৰে।
উচ্চ ন্যায়ালয়ৰ মৃত্যুদণ্ডৰ ৰায়ৰ বিৰুদ্ধে লোকজনে উচ্চতম ন্যায়ালয়ৰ দ্বাৰস্থ হয়। বুধবাৰে এই গোচৰৰ শুনানি গ্ৰহণ কৰি উচ্চতম ন্যায়ালয়ে ৰাজস্থান উচ্চ ন্যায়ালয়ৰ মৃত্যুদণ্ডৰ ৰায় কাৰ্যকৰী কৰাত স্থগিতাদেশ জাৰি কৰিছে।
“আবেদন মঞ্জুৰ কৰা হৈছে। এতিয়াই মৃত্যুদণ্ড কাৰ্যকৰী কৰা নহয়।” পদকীয়া মোহন সিঙৰ আবেদনৰ শুনানি গ্ৰহণ কৰি উচ্চতম ন্যায়ালয়ৰ মুখ্য ন্যায়াধীশ এ এছ বুবডে-এ কয়।
আনহাতে জ্যেষ্ঠ আইনজীৱী তথা পদকীয়াৰ অধিবক্তা সিদ্ধাৰ্থ লুথ্ৰাক এনে এটা জঘন্য অপৰাধ সংঘটিত কৰা অপৰাধীক কিয় মৃত্যুদণ্ড বিহিব নেলাগে বুলিও প্ৰশ্ন কৰে বিচাৰপীঠে।
“তেওঁ কোন হয়? ৰাক্ষস নে মানুহ?” অধিবক্তা লুথ্ৰাক বিচাৰপীঠৰ অন্য দুই বিচাৰপতি ন্যায়াধীশ এ এছ বোপ্পানা আৰু ভি ৰামসুব্ৰমণিয়ামে প্ৰশ্ন কৰে।
“আপোনাৰ মক্কেলে অতি জঘন্য তথা বৰ্বৰ কাম কৰিছে। কেনেকৈ পেট কাটি জননেন্দ্ৰিয় উলিয়াই পেটত কপোৰ ভৰাই থ’ব পাৰিলে? তেওঁ কি চাৰ্জন নেকি?”
এই প্ৰশ্নোত্তৰত অধিবক্তা লুথ্ৰাই কয়ে যে তেওঁ মক্কেল এজন নিৰাপত্তাৰক্ষীহে।
ইফালে ৰাজস্থান উচ্চ ন্যায়ালয়ৰ মতে মোহন সিঙে ইয়াৰ পূৰ্বেও অন্য এটা হত্যাকাণ্ড সংঘটিত কৰিছিল।
