ভাৰতবৰ্ষত প্ৰথমবাৰ বাবে আৰম্ভ হ’ল সামুদ্ৰিক বিমান সেৱাৰ। আজি প্ৰধানমন্ত্ৰী নৰেন্দ্ৰ মোদীয়ে গুজৰাটৰ আহমদাবাদৰ সাৱৰমতী ৰিভাৰফ্ৰণ্ট আৰু কাৱেৰী নদীৰ ষ্টেটু অৱ ইউনিটিৰ মাজত শুভাৰম্ভ কৰে দেশৰ প্ৰথম সামূদ্ৰিক বিমান সেৱাৰ।
পৰ্যটনক গুৰুত্ব প্ৰদান কৰি এই সামুদ্ৰিক বিমান সেৱাক স্পাইজেটে পৰিচালনা কৰিব বুলি জানিব পৰা গৈছে।
প্ৰথমাৱস্থাত আহমদাবাদৰ পৰা কাৱেডিয়াৰ পথত স্পাইজেটে দৈনিক দুবাৰকৈ এই সেৱাৰ সামুদ্ৰিক বিমান চলাব।
উড়ান আঁচনিৰ অধীনত এবাৰ যাত্ৰা কৰিবলৈ ইয়াৰ ভাড়া হ’ব ১৫০০ টকা।
এই সামুদ্ৰিক বিমান সেৱা সাৱৰমতী ৰিভাৰফ্ৰন্টৰ পৰা কাৱেৰীয়াৰ ষ্টেটু অৱ ইউনিটিলৈকে চলাচল কৰোতে সময় লাগিব মাত্ৰ আধাঘন্টা।
স্পাইজেটে এই বিমানসমূহৰ বাবে ১৫-চিটাৰ টুইন অ’টাৰ ৩০০ বিমান ব্যৱহাৰ কৰিব বুলি জানিব পৰা গৈছে।
আনহাতে ভাৰতীয় বিমান প্ৰাধিকৰণে জনাইছে যে অসমৰ ব্ৰহ্মপুত্ৰৰ নদীৰ তিনিটা স্থানক সংযোগ কৰি এনে সামুদ্ৰিক বিমান সেৱা আৰম্ভ কৰা হ’ব।
ইতিমধ্যে এই সম্পৰ্কীয় কাম কাজ আৰম্ভ হৈছে বুলি প্ৰকাশ কৰি ভাৰতীয় বিমান প্ৰাধিকৰণে কয় যে বিগত বৰ্ষৰ ছেপ্টম্বৰ মাহতে অসমত দেশৰ ভিতৰতে সৰ্বপ্ৰথম সামুদ্ৰিক বিমান সেৱা আৰম্ভ কৰাৰ বিষয়ে ঘোষণা কৰা হৈছিল।
“পৰ্যটন খণ্ডৰ সমৃদ্ধি আৰু যোগাযোগৰ বাবে অসমত সামুদ্ৰিক বিমান সেৱা আৰম্ভ কৰাৰ বাবে ভাৰতৰ ভিতৰতে প্ৰথম অসমত তিনিটা নদীৰ মোহনা অঞ্চল বাচনি কৰা হৈছিল।” এএআইৰ কাৰ্যকৰী সঞ্চালক সঞ্জীৱ জিণ্ডালে কয়।
এএআই-এ চলিত বৰ্ষ অথবা ২০২১ বৰ্ষৰ পহিলা ভাগতে এই সেৱা শুভাৰম্ভ কৰাৰ পৰিকল্পনা কৰিছিল যদিও প্ৰকল্পটোত কিছু বিঘিনী ঘটাৰ বাবে সেয়া সম্ভৱ হৈ উঠা নাই।
৫০ কোটি টকাৰ ব্যয় সাপেক্ষ এই প্ৰকল্পটোৰ অধীনত এএআই-এ তিনিটা স্থানৰ বাবে তিনিখন এনে সামুদ্ৰিক বিমান নিমাৰ্ণৰ পৰিকল্পনা কৰিছে।
