কাজিৰঙা ৰাষ্ট্ৰীয় উদ্যানত গঁড়ৰ খৰ্গৰ চোৰাং ব্যৱসায়ৰ সৈতে বনকৰ্মী জড়িত থকা ঘটনাৰ চলি থকা অনুসন্ধানৰ আধাৰত আজি পুনৰ দুজন বনকৰ্মী আৰু দুজন গঁড়ৰ খৰ্গৰ চোৰাং ব্যৱসায়ীক আটক কৰিছে উদ্যান কৰ্তৃপক্ষই৷
পুৰ্বে আটক কৰা অস্থায়ী বনকৰ্মীৰ স্বীকাৰোক্তি আৰু অনুসন্ধানৰ তথ্যৰ আধাৰত কাজিৰঙাৰ ডি এফ অ’ ৰমেশ কুমাৰ গগৈৰ নেতৃত্বত যোৱা বনকৰ্মী আৰু আৰক্ষীৰ যুটীয়া অভিযানকাৰীয়ে সোমবাৰৰ নিশা কাজিৰঙাত কৰ্মৰত বনকৰ্মী বিমলা শইকীয়া আৰু চবিৰ আহমেদ লস্কৰ উপৰিও কুঠৰীৰ নুৰ ইছলাম আৰু আব্দুল আলীক আটক কৰে৷
বনকৰ্মী বিমলা শইকীয়া আৰু চবিৰ আহমেদ লস্কৰে কাজিৰঙা ৰাষ্ট্ৰীয় উদ্যানৰ ভিতৰৰ পৰা সংগৃহীত গঁড়ৰ খৰ্গ কুঠৰীৰ নুৰ ইছলাম আৰু আব্দুল আলীক ধনৰ বিনিময়ত দিয়াৰ কথা স্বীকাৰ কৰে৷
বিমলা শইকীয়া আৰু চবিৰ আহমেদ লস্কৰৰ স্বীকাৰোক্তিৰ আধাৰতে কুঠৰীৰ নুৰ ইছলাম আৰু আব্দুল আলীক আটক কৰে অভিযানকাৰী দলে৷
ধৃত চাৰিজন ব্যক্তিকেই আজি বোকাখাতৰ আদালত হাজিৰ কৰাৰ পাচত আদালতে চাৰিওকে জেল হাজোতলৈ প্ৰেৰণ কৰে৷
গঁড়ৰ খৰ্গৰ চোৰাং ব্যৱসায়ী নুৰ ইছলাম আৰু আব্দুল আলীৰ স্বীকাৰোক্তি মতে কাজিৰঙা ৰাষ্ট্ৰীয় উদ্যানৰ গঁড়ৰ খৰ্গৰ এই চোৰাং ব্যৱসায়ীৰ সৈতে আৰু বহু লোকৰ নামো সাঙুৰ খাই আছে৷ পৰৱৰ্তী অনুসন্ধানত আৰু বহু লোক আটক হোৱাৰ সম্ভাৱনা আছে৷
আজি আদালতত হাজিৰ কৰোৱাৰ পিচত ধৃত চাৰিওজনকে আদালতে ন্যায়িক জিম্মালৈ প্ৰেৰণ কৰে৷
কাজিৰঙাৰ ইতিহাসত অতি গুৰুত্বপুৰ্ণ বুলি বিবেচিত হোৱা এই অভিযানত এতিয়ালৈকে ২৫ গৰাকী লোকক গঁড়ৰ খৰ্গৰ চোৰাং ব্যৱসায়ত জড়িত থকাৰ অপৰাধত বন বিভাগে আটক কৰিছে৷ ইয়াৰে ৮ জনেই হ’ল ৰাষ্ট্ৰীয় উদ্যানত কৰ্মৰত অস্থায়ী আৰু দুজন স্থায়ী বনকৰ্মী৷
