আমেৰিকাৰ উপ ৰাষ্ট্ৰপতি হিচাপে নিৰ্বাচিত হৈছে ভাৰতীয় মূলৰ কমলা হেৰিছ। ইপিনে কমলা হেৰিছৰ বিজয়ৰ বিষয়ে পূৰ্বেই নিশ্চিত আছিল বুলি জানিবলৈ দিছে তেওঁৰ মোমায়েক গোপালন বালাচন্দ্ৰনে।
ভাগিনীয়েকৰ বিজয়ৰ বাৰ্তা পোৱাৰ পাছত নতুন দিল্লীত থকা বালাচন্দ্ৰনে সংবাদমাধ্যমক জানিবলৈ দিয়ে যে তেওঁ একেবাৰে চিন্তা কৰা নাছিল। কিয়নো তেওঁ কমলাৰ বিজয় নিশ্চিত বুলি জানিছিল। সেয়েহে, কেৱল মাত্ৰ চূড়ান্ত ফলাফলৰ বাবেহে অপেক্ষা কৰিছিল যাতে নিশ্চিত হৈ তেওঁ নিশা শুব পাৰে।
বাতৰি অনুসৰি, কমলা হেৰিছৰ এতিয়াও ভাৰতৰ পৰিয়ালৰ সৈতে ঘনিষ্ঠ সম্পৰ্ক তথা যোগাযোগ আছে।
ইপিনে, অহা ২০ জানুৱাৰিত অনুষ্ঠিত হ’বলগীয়া শপতগ্ৰহণ অনুষ্ঠানত উপস্থিত থকাৰ বাবে মোমায়েক গোপালনে পৰিকল্পনা কৰিছে।
তেওঁ সংবাদ প্ৰতিষ্ঠানক জানিবলৈ দিয়া মতে আজি দুদিন পূৰ্বেও কমলা হেৰিছৰ সৈতে তেওঁ কথা পাতিছে। সম্পূৰ্ণ পৰিয়ালকেন্দ্ৰিক কথা বতৰাৰ মাজত কোনে ৰাজনৈতিক বিষয়ে স্থান লাভ কৰা নাছিল।
কমলাৰ মোমায়েক গোপালনে লগতে জানিবলৈ দিয়ে সকলো অভিভাৱকে দিয়াৰ দৰে তেওঁৱো কমলাক কিছুমান সাধাৰণ পৰামৰ্শ দিব।
তেওঁ কয় যে কমলাই ভালদৰেই আগবাঢ়িছে। তেওঁক উৎসাহিত কৰা দৰকাৰ। তেওঁ আৰু জো বিডেনৰ পৰা আমেৰিকাবাসীৰ বহুত প্ৰত্যাশা আছে। তেওঁলোকৰ বিজয়ত দেশখনৰ গৰিষ্ঠ সংখ্যক লোক উৎফুল্লিত।
পূৰ্ৰে পৰা কমলাই সকলো কামৰ দায়িত্ব যোগ্যতাৰে কৰি আহিছে। এতিয়া এক ডাঙৰ দায়িত্ব লাভ কৰি জনসাধাৰণৰ প্ৰত্যাশা পূৰণত তেওঁ আত্মনিয়োগ কৰিব বুলি আশা প্ৰকাশ কৰিছে মোমায়েক গোপালন বালাচন্দ্ৰনে।
