সদৌ অসম ছাত্ৰ সন্থাৰ সভাপতি দীপাংক নাথ আৰু সাধাৰণ সম্পাদক লুৰিণজ্যোতি গগৈৰ বিৰুদ্ধে আদালতত এক কোটি টকাৰ মান হানি গোচৰ তৰিছে সদ্য পদত্যাগী আছু নেতা সীমান্ত ঠাকুৰীয়াই।
গৌৰীসদনত এক সংবাদমেল সম্বোধন কৰি এই কথা ঘোষণা কৰে ঠাকুৰীয়াই।
‘সমাজত মোৰ ভাবমুৰ্তি বিনষ্ট কৰাৰ বাবে মই আদালতৰ ওচৰ চাপিছো। ক্ষতিপুৰণ হিচাপে এক কোটি টকাৰ মান হানি গোচৰ তৰিছো। সদৌ অসম ছাত্ৰ সন্থাৰ সভাপতি-সম্পাদকৰ বিৰুদ্ধে এই মানহানি গোচৰ তৰা হৈছে।‘ ঠাকুৰীয়াই এইদৰে কয়।
ইপিনে, এই গোচৰ তৰাৰ কাৰণ বাখ্যা কৰি ঠাকুৰীয়াই সংবাদমেলত কয় ‘যোৱা ৩ নৱেম্বৰৰ দিনা সদৌ অসম ছাত্ৰ সন্থাৰ কাৰ্য্য নিৰ্বাহকত সীমান্ত ঠাকুৰীয়াক বহিস্কাৰ কৰাৰ সিদ্ধান্ত লৈছিল। কিন্তু তাৰ এমাহ পূৰ্বেই মই আছুৰ পৰা পদত্যাগ কৰিছিলো। পদত্যাগৰ এমাহৰ পাছত মোক বহিস্কাৰ কৰি যি অপমান কৰিলে তাৰবাবে মই ন্যায়ালয়ৰ ওচৰ চাপিছো।‘
সংবাদমেলৰ জৰিয়তে সদৌ অসম ছাত্ৰ সন্থাৰ সভাপতি আৰু সম্পাদকক গৰিহনা দিয়ে ঠাকুৰীয়াই।
‘বিবাহিত ব্যক্তিক কিয় আছুৱে কাৰ্য্য নিৰ্বাহকত ৰাখিছে?’ এনেদৰে আছুৰ শীৰ্ষ নেতৃত্বক প্ৰশ্ন কৰি ঠাকুৰীয়াই লগতে কয় ‘কিয় তেওঁলোকে এই সন্দৰ্ভত ব্যৱস্থা গ্ৰহণ কৰিব পৰা নাই? সততাৰে কাম কৰা মানুহৰ বিৰুদ্ধেহে আছুৰ নেতৃত্বই ব্যৱস্থা গ্ৰহণ কৰে।‘
তেওঁ লগতে প্ৰশ্ন কৰি কয় ‘আছুৱে মূল্যবৃদ্ধিৰ বিৰুদ্ধে প্ৰতিবাদ কৰে, কিন্তু কিয় টোলগেটসমূহ বন্ধ কৰিব পৰা নাই?’
এই অভিযোগ আৰু আদালতত ১ কোটি টকাৰ মানহানি গোচৰ সন্দৰ্ভত লুৰিণজ্যোতি গগৈক আমাৰ সাংবাদিকে সোধাত তেওঁ প্ৰতিক্ৰিয়া প্ৰকাশৰ পৰা বিৰত থাকে।
লুৰিণৰ উত্তৰ ‘মই একো নকওঁ। প্ৰতিক্ৰিয়া দিব বিচৰা নাই।‘
