মৰিগাঁও জিলা সদৰস্থিত পবিতৰা হাট সভাগৃহত আজি পুৱা দহ বজাৰ পৰা বাধাগ্ৰস্ত লোক সকলৰ অধিকাৰ আইন, ২০১৬ ৰ ওপৰত সজাগতা আনিবলৈ অসম চৰকাৰৰ সমাজ কল্যাণ বিভাগ ,শিশু সাৰথিৰ উদ্যোগত আৰু জিলা উপায়ুক্তৰ সহযোগত দিনজোৰা কাৰ্যসূচীৰে এখন সজাগতা সভা অনুষ্ঠিত হয় ।
সমাজ কল্যাণ বিভাগৰ চুপাৰভাইজাৰ বিনীতা বেজে আঁত ধৰা এই অনুষ্ঠানটোত জিলা সমাজ কল্যাণ বিষয়া দেৱজিৎ বৰাই আদৰণী ভাষণ ৰাখে ।
অনুষ্ঠানটো উদ্বোধন কৰি জিলা উপায়ুক্ত লীনা দাসে কয় যে বিশেষ ভাৱে সক্ষম ব্যক্তি সকলক মৰমৰ দৃষ্টিৰে চাই তেওঁলোকক সাধাৰণ মানুহৰ সৈতে সমান অধিকাৰ পোৱাত সহায় কৰিব লাগে আৰু আজিৰ সজাগতা সভাত বিভিন্ন স্থানৰ পৰা অহা অঙ্গনৱাদী কৰ্মী, আশা কৰ্মী সকলক এই কাৰ্যসূচীত অংশ গ্ৰহণ কৰিবলৈ অহাৰ বাবে ধন্যবাদ জ্ঞাপন কৰাৰ লগতে বিষয় বস্তুৰ বিষয়ে মনোযোগ দিবলৈ আহ্বান জনায় ।
স্বাস্থ্য বিভাগৰ যুটীয়া সঞ্চালক ৰোহিনী কান্ত বৰকটকীয়ে ভাষণত কয় যে পূৰ্বে দিব্যাঙ্গ সকলক হীন দৃষ্টিৰে চোৱা হৈছিল । তেনে কৰাটো অনুচিত আৰু আইন মতে দণ্ডণীয় ।
এতিয়া চৰকাৰে তেওঁলোকক সাধাৰণ জনতাৰ লগত সমানে খোজ মিলাই চলিব পৰাকৈ বহুত কাৰ্যসূচী লৈছে আৰু আইনও প্ৰনয়ন কৰিছে বুলি কয় ।
গুৱাহাটীৰ কাৰ্যালয়ৰ শিশু সাৰথিৰ উপ-সঞ্চালক অম্বালিকা সেনাপতিয়ে ‘বাধাগ্ৰস্ত লোক সকলৰ অধিকাৰ আইন, ২০১৬ ‘ (Disability and the Rights of Persons with Disability Act.2016) ৰ ওপৰত পাৱাৰ পইন্টৰ যোগেদি বিস্তৃত বাখ্যা দাঙি ধৰে আৰু এই আইন কাৰ্যত সফলতা লাভ কৰিবলৈ হ’লে বিভিন্ন চৰকাৰী বিভাগেও বাধাগ্ৰস্ত লোক সকলৰ স্বাভাৱিক জীৱন যাপনৰ বাবে দিব লগীয়া সুবিধা সমূহ সুচল কৰি দিব লাগিব বুলি উল্লেখ কৰে ।
