ভাৰতৰ প্ৰাক্তন প্ৰধান মন্ত্ৰী ড০ মনমোহন সিং সন্দৰ্ভত নিজৰ আত্মজীৱনীৰ প্ৰথম খণ্ডত উল্লেখ কৰিছে আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতি বাৰাক অ’বামাই।
মনমোহন সিঙে কংগ্ৰেছৰ দলৰ ভিতৰত আৰু প্ৰধান মন্ত্ৰী হিচাপে ৰাহুল গান্ধীৰ ভবিষ্যতৰ বাবে কোনোধৰণৰ ভাবুকি সৃষ্টি কৰা নাছিল যাৰবাবে ছোনিয়া গান্ধীৰ তেওঁ প্ৰধান মন্ত্ৰী হিচাপে প্ৰথম পচন্দ আছিল।
‘‘অধিকাংশ ৰাজনৈতিক বিশ্লেষকে ছোনিয়া গান্ধীয়ে ৰাষ্ট্ৰীয় ৰাজনীতিত শক্তিশালী ভেটি নথকা এগৰাকী জেষ্ঠ শিখ নেতাক দায়িত্বভাৰ অৰ্পন কৰিলে তেওঁৰ পুত্ৰৰ ৰাজনৈতিক কেৰিয়াৰৰ প্ৰতি কোনোধৰণৰ ভাবুকি নাহে বাবে মনমোহন সিঙক বাছি লৈছিল বুলি সহমত প্ৰকাশ কৰিব,’’ অ’বামাই নিজৰ আত্মজীৱনীত এইদৰে উল্লেখ কৰে।
নিজৰ গ্ৰন্থত অ’বামাই ড০ মনমোহন সিঙক এগৰাকী অতি নম্ৰ, চিন্তাশীল আৰু বিজ্ঞ ব্যক্তি হিচাপেও উল্লেখ কৰে।
অ’বামাৰ গ্ৰন্থ ‘এ প্ৰ’মিজদ লেণ্ড’ত তেওঁ ৰাষ্ট্ৰপতি হৈ থকা সময়ৰ ঘটনাৱলী সমূহ সন্নিবিষ্ট কৰিছে। গ্ৰন্থখনত সমসাময়িক ভাৰতীয় নেতা সকলৰ প্ৰতি তেওঁৰ দৃষ্টিভংগী সন্দৰ্ভতো বহু কথা উল্লেখ কৰা হৈছে।
মহাত্মা গান্ধীৰ আদৰ্শই কিদৰে অ’বামাক প্ৰভাবিত কৰি আহিছে, প্ৰাক্তন ৰাষ্ট্ৰপতি গৰাকীয়ে কেনেদৰে শৈশৱ কাল ৰামায়ণ, মহাভাৰতৰ সাধু শুনি অতিবাহিত কৰিছিল সেই কথাও গ্ৰন্থখনত উল্লেখ কৰে।
গ্ৰন্থখনত ইণ্ডো-য়ু এছ নিউক্লিয়াৰ চুক্তিকে ধৰি সেইসময়ৰ ভাৰত-আমেৰিকাৰ দ্বিপাক্ষিক সম্পৰ্ক সন্দৰ্ভতো বহু কথা সন্নিবিষ্ট কৰিছে প্ৰাক্তন ৰাষ্ট্ৰপতি অ’বামাই।
