দিল্লীলৈ যোৱাৰ পথত আটক কৰা হৈছে ইউটিউবাৰ ধ্ৰুৱ ৰাথীক। সূত্ৰ অনুসৰি তেওঁ ৰাজধানীত ককৰোচ জনতা পাৰ্টি বা চিজেপিৰ প্ৰতিবাদী কাৰ্যসূচীত যোগদান কৰিবলৈ গৈছিল। সেই সময়ত গুৰুগ্ৰামত আৰক্ষীয়ে তেওঁক আটক কৰে। চিজেপি নেত্ৰী ৰত্না সিঙকো আটক কৰা হয়।
ধ্ৰুৱ ৰাথী আৰু ৰত্না সিঙক আটক কৰাত তীব্ৰ প্ৰতিক্ৰিয়া প্ৰকাশ কৰিছে চিজেপিয়ে। তেওঁলোকৰ এক্স হেণ্ডেলত এটা পোষ্টত কয় যে ধ্ৰুৱ ৰাথীক আটক কৰা হৈছে। অন্যায়ক লৈ প্ৰশ্ন উত্থাপন কৰি মৌন হৈ থাকিবলৈ অস্বীকাৰ কৰা যুৱক-যুৱতীসকলক লৈ স্বৈৰাচাৰীসকল আতংকিত হৈ পৰিছে!’
আৰক্ষীৰ সূত্ৰৰ উদ্ধৃতি দি সংবাদ সংস্থাই প্ৰকাশ কৰা অনুসৰি শনিবাৰে পুৱা প্ৰায় ৮ বজাত গুৰুগ্ৰামৰ ছেক্টৰ ৫৬ চেণ্ট্ৰেল পাৰ্ক বিহাৰত থকা নিজৰ ঘৰৰ পৰা ধ্ৰুৱক আটক কৰা হয়।
স্থানীয় সূত্ৰসমূহেও প্ৰকাশ কৰা অনুসৰি শুকুৰবাৰে নিশা ইউটিউবাৰগৰাকীৰ ঘৰৰ বাহিৰত কমেও ৫০জন আৰক্ষী জোৱান নিয়োগ কৰা হয়। ইয়াৰ পিছতে শনিবাৰে পুৱা তেওঁৰ দুৱাৰত টোকৰ মাৰিলে আৰক্ষীয়ে।ধ্ৰুৱৰ মাতৃয়ে দুৱাৰখন খুলি দিয়াৰ পিছতে আৰক্ষী বিষয়াই প্ৰৱেশ কৰি ইউটিউবাৰজনক আটক কৰে।
আজি পুৱা দিল্লীৰ বিভিন্ন অঞ্চলৰ পৰা কমেও ২০০ জন লোকক আটক কৰা হয়। যন্তৰ মন্তৰস্থিত প্ৰতিবাদস্থলীলৈ যাবলৈ গৈ কন’ট প্লেচৰ পৰা একাংশ প্ৰতিবাদকাৰীক আৰক্ষীয়ে আটক কৰে।
গুজৰাটৰ পৰাও কেইবাজনো লোকক চিজেপিৰ প্ৰতিবাদত যোগদান কৰিবলৈ যোৱাৰ সময়ত আটক কৰা হয়।
তেওঁলোকৰ এটা অংশই অভিযোগ কৰে যে আৰক্ষীয়ে তেওঁলোকক চিজেপিৰ প্ৰতিবাদত যোগদান কৰিবলৈ দিল্লীলৈ নাযায় বুলি বণ্ডত চহী কৰাইছে।
