বিধান সভা নিৰ্বাচনলৈ মাজত কেইটামান মাহ বাকী আছে । ইতিমধ্যে বিটিচিৰ নিৰ্বাচনী বতাহে সমান্তৰাল ভাবে অসমৰ ৰাজনৈতিক বতাহো গৰম কৰি তুলিছে । কাৰণ বিটিচিৰ নিৰ্বাচনী প্ৰচাৰ সভাত মন্ত্ৰী হিমন্ত বিশ্ব শৰ্মাই ঘোষণাই কৰিছে বিটিচিৰ নিৰ্বাচন অসম বিধান সভা নিৰ্বাচনৰ বাবে চেমি ফাইনেল হব ।
সেয়ে সমগ্ৰ অসমৰ অন্যান্য জিলা সমূহৰ লগতে নগাঁও জিলাৰ ৮টা বিধান সভা সমষ্টিত ইতিমধ্যে আৰম্ভ হৈছে ব্যাপক নিৰ্বাচনী তৎপৰতা । অসমৰ ৰাজনৈতিক ক্ষেত্ৰত এইবাৰ নতুনকৈ আত্মপ্ৰকাশ ঘটিছে দুটাকৈ আঞ্চলিক ৰাজনৈতিক দলৰ । শাসকীয় বিজেপি অগপ মিত্ৰজোটঁ ,কংগ্ৰেছ, এ আই ইউ ডি এফ ৰ লগতে নতুনকৈ আত্মপ্ৰকাশ ঘটা অসম জাতীয় পৰিষদ আৰু ৰাইজৰ দলেও নগাঁও জিলাৰ প্ৰতিটো সমষ্টিত আৰম্ভ কৰি দিছে প্ৰচাৰ অভিযান ।
অসমৰ ৰাজনীতিত অতি গুৰুত্বপূৰ্ণ সমষ্টি বুলি বিবেচিত নগাঁও সদৰ সমষ্টি অগপ বিজেপিৰ মিত্ৰতা সূত্ৰে পূৰ্বৰ দৰে এইবাৰো বিজেপিৰ পৰাই প্ৰাৰ্থিত্ব প্ৰদান কৰাটো নিশ্চিত । ঠিক তেনেকৈ কংগ্ৰেছ, এ আই ইউ ডি এফ মিত্ৰতা সূত্ৰে এইবাৰ নগাঁও সদৰ বিধান সভা সমষ্টিটো এ আই ইউ ডি এফ দলে সমষ্টিতো কংগ্ৰেছৰ সমৰ্থনত এৰি দিয়াৰ সম্ভৱনা আছে । সেয়ে ইতিমধ্যে বিজেপি আৰু কংগ্ৰেছৰ ফালৰ পৰা সমষ্টিটোত ব্যাপক নিৰ্বাচনী প্ৰচাৰ তথা তৎপৰতা অব্যাহত ৰখাটো পৰিলক্ষিত হৈছে ।
নগাঁও সদৰ সমষ্টিত বিজেপিৰ বৰ্তমানৰ বিধায়ক ৰূপক শৰ্মাৰ প্ৰাৰ্থিত্ব নিশ্চিত হৈ থকাৰ বিপৰীতে কংগ্ৰেছ দলৰ পৰা প্ৰাক্তন বিধায়ক দু্ৰ্লভ চমুৱা ,শান্তনু শৰ্মা আৰু মৃনাল হাজৰিকাই প্ৰাৰ্থিত্ব বিচাৰিছে ।
ইপিনে অসমৰ ৰাজনৈতিক ক্ষেত্ৰ খনত সকলোৰে পৰিচিত এটা গুৰুত্বপূৰ্ণ সমষ্টি হৈছে বঢ়মপুৰ সমষ্টি । কাৰণ এই সমষ্টিটোত বিগত ৩০ বছৰ ধৰি প্ৰতিনিধিত্ব কৰি আহিছে দুবাৰকৈ অসমৰ প্ৰাক্তন মুখ্যমন্ত্ৰী হোৱা প্ৰফুল্ল কুমাৰ মহন্তই । উল্লেখযোগ্য যে বিগত বিধান সভা নিৰ্বাচনত প্ৰফুল্ল কুমাৰ মহন্ত বঢ়মপুৰ সমষ্টিৰ পৰা বিজয়ী হলেও তীব্ৰ প্ৰত্যাহ্বান সৃষ্টি কৰিছিল কংগ্ৰেছে ।
ইয়াৰ উপৰিও বিগত ১৫ বছৰ ধৰি বঢ়মপুৰ সমষ্টিত উন্নয়নৰ ক্ষেত্ৰত একপ্ৰকাৰ বিফল প্ৰফুল্ল কুমাৰ মহন্ত । তাৰো ৰাজনৈতিক কাৰণ নথকা নহয় । কিন্তু সকলোতকৈ ডাঙৰ কথা বঢ়মপুৰ সমষ্টি এইবাৰ বিজেপিয়ে অগপক এৰি দিবনে নিদিয়ে । কাৰণ শেহতীয়াকৈ বঢ়মপুৰত বিজেপিৰ ৰাজনৈতিক তৎপৰতা যঠেষ্ট বৃদ্ধি পাবলৈ ধৰিছে ।
ইয়াৰ উপৰি অগপ নেতৃত্বতই বঢ়মপুৰৰ প্ৰতি বৰ বিশেষ আগ্ৰহ প্ৰকাশ কৰা পৰিলক্ষিত হোৱা নাই । এনে পৰিস্থিতিত বঢ়মপুৰত বিজেপিয়ে যদি প্ৰাৰ্থিত্ব প্ৰদান কৰে তেনেহলে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তৰ ৰাজনৈতিক ভৱিষ্যতৰ প্ৰতি এক ডাঙৰ প্ৰত্যাহ্বান যে আহিব সেয়া নিশ্চিত । সমষ্টিটোত এইবাৰো কংগ্ৰেছ দলৰ পৰা সুৰেশ বৰাৰ প্ৰাৰ্থিত্ব প্ৰায় নিশ্চিত হৈ আছে । কাৰণ এই সমষ্টিত কোনো বিশেষ গণভিত্তি নাই এ আই ইউ ডি এফ দলৰ । ইয়াৰ উপৰিও সমষ্টিটোত নতুনকৈ গঠিত আঞ্চলিক ৰাজনৈতিক দল দুটাই কিছু প্ৰভাৱ পেলাব পাৰে বিজেপিৰ ক্ষেত্ৰত ।
জিলা খনৰ আন এটা গুৰুত্বপূৰ্ণ সমষ্টি হৈছে একালৰ কংগ্ৰেছৰ প্ৰভাৱশালী মন্ত্ৰী ৰকিবুল হুছেইনে প্ৰতিনিধিত্ব কৰি অহা চামগুৰি বিধান সভা সমষ্টি । এইবাৰো চামগুৰিত কংগ্ৰেছ দলৰ হৈ ৰকিবুল হুছেইনে প্ৰতিদ্বন্দ্বিতা কৰাটো নিশ্চিত ।সমষ্টিটো বিজেপিয়ে মিত্ৰতা সূত্ৰে অগপক এৰি দিলেও অগপ তীব্ৰ প্ৰত্যাহ্বানৰ সন্মুখীন হব । এই সমষ্টিত অগপ দলৰ হৈ মন্ত্ৰী কেশৱ মহন্তৰ ভাতৃ মণিমাধৱ মহন্তই নিৰ্বাচনী তৎপৰতা অব্যাহত ৰাখিছে । ইপিনে ধিং বিধান সভা সমষ্টিত পুনৰ বাৰ এ আই ইউ ডি এফৰ পৰা প্ৰাৰ্থিত্ব পাব পাৰে বৰ্তমানৰ বিধায়ক আমিনুল ইছলামে ।
ৰাইজৰ দল আৰু অসম জাতীয় পৰিষদে সমষ্টিটোত নিৰ্বাচন কেন্দ্ৰীক তৎপৰতা অব্যাহত ৰাখিছে যদিও আমিনুল ইছলামৰ স্থিতি এতিয়াও শক্তিশালী হৈয়ে আছে । সমষ্টিটোত সংখ্যালঘু ভোটাৰে সদায়ে নিৰ্ণায়ক ভূমিকা গ্ৰহণ কৰি আহিছে । জিলা খনৰ আন এটা সংখ্যালঘু বসতিপ্ৰধান গুৰুত্বপূৰ্ণ সমষ্টি হৈছে ৰূপহীহাট বিধান সভা সমষ্টি । বৰ্তমান কংগ্ৰেছৰ দখলত থকা এই সমষ্টিত এইবাৰো কংগ্ৰেছৰ বিধায়ক নুৰুল হুদাই প্ৰাৰ্থিত্ব পাব পাৰে । কিন্তু কংগ্ৰেছ এ আই ইউ ডি এফৰ মিত্ৰতাৰ সূত্ৰে এই সমষ্টিটো এ আই ইউ ডি এফে বিচৰাৰ সম্ভাৱনা আছে । ৰূপহীহাট সমষ্টিৰ একালৰ প্ৰাক্তন অগপ বিধায়ক আব্দুল আজিজে শেহতীয়াকৈ বিজেপি দলত যোগদান কৰি সমষ্টিটোত বিজেপিৰ নিৰ্বাচনী তৎপৰতা অব্যাহত ৰাখিছে ।
হয়তো আব্দুল আজিজকে সমষ্টিটোৰ পৰা বিজেপিয়ে প্ৰাৰ্থিত্ব প্ৰদান কৰিব পাৰে । ইয়াত ৰাইজৰ দলেও নিৰ্বাচনী তৎপৰতা অব্যাহত ৰাখিছে । মন্ত্ৰী কেশৱ মহন্তই পুনৰ বাৰ অগপৰ প্ৰাৰ্থিত্বৰে কলিয়াবৰৰ পৰা প্ৰতিদ্বন্দ্বিতা কৰাটো নিশ্চিত । মিত্ৰতাৰ সূত্ৰে এই সমষ্টি বিজেপিয়ে অগপক এৰি দিব । সমষ্টিটোত বৰ্তমানলৈকে কংগ্ৰেছ দলৰ বিশেষ নিৰ্বাচন তৎপৰতা পৰিলক্ষিত হোৱা নাই । বৰ্তমান বিজেপি ৰ দখলত থকা বটদ্ৰৱা বিধান সভা সমষ্টিত পুনৰ বাৰ বিধায়িকা আঙুৰলতা ডেকাই প্ৰাৰ্থিত্ব পাব পাৰে । ঠিক তেনেকৈ কংগ্ৰেছৰ প্ৰাক্তন মন্ত্ৰী গৌতম বৰাই প্ৰাৰ্থিত্ব পোৱাটো নিশ্চিত ।
সমষ্টিটোত কংগ্ৰেছ এ আই ইউ ডি এফৰ মিত্ৰতাই কিছু প্ৰত্যাহ্বান সৃষ্টি কৰিব আঙুৰলতা ডেকাৰ ক্ষেত্ৰত । কাৰণ বিগত বিধান সভা নিৰ্বাচনৰ সময়ত কংগ্ৰেছ-এ আই ইউ ডি এফৰ মিত্ৰতা নথকাৰ পাছতো বহু কম ভোটৰ ব্যৱধানত বিজয়ী হৈছিল আঙুৰলতা । ইপিনে জিলা খনৰ অনুসূচিত জাতিৰ প্ৰাৰ্থীৰ বাবে সংৰক্ষিত একমাত্ৰ সমষ্টিটো হৈছে ৰহা বিধান সভা সমষ্টি । বৰ্তমান বিজেপিৰ দখলত থকা এই সমষ্টিত পুনৰ বাৰ বৰ্তমানৰ বিধায়ক ডিম্বেশ্বৰ দাসে প্ৰাৰ্থিত্ব পাবনে নাপায় সেয়া এতিয়াও নিশ্চিত নহয় ।
প্ৰতিটো নিৰ্বাচনত সংখ্যালঘু ভোটাৰে বিশেষ প্ৰভাৱ বিস্তাৰ কৰি আহিছে ৰহা সমষ্টিত । কংগ্ৰেছ দলে এই সমষ্টি হয়তো এ আই ইউ ডি এফ দলক এৰি দিয়াৰ সম্ভাৱনা আছে । কাৰণ পূৰ্বে এই সমষ্টি এবাৰ এ আই ইউ ডি এফ দলে দখল কৰিবলৈ সক্ষম হৈছিল । ইয়াত অসম জাতীয় পৰিষদেও নিৰ্বাচনী তৎপৰতা অব্যাহত ৰাখিছে ।
ৰহাত বৰ্তমানৰ বিধায়ক ডিম্বেশ্বৰ দাসৰ লগতে সঞ্জীৱ হাজৰিকা, ক্ৰিয়া সংগঠক তপন দাস, প্ৰাক্তন বিধায়ক গুণেশ্বৰ দাস আদিয়েও নিৰ্বাচনী তৎপৰতা অব্যাহত ৰাখিছে । যিয়ে নহওক বিগত বিধান সভা নিৰ্বাচনৰ তুলনাত এইবাৰ যে নগাঁও জিলাত নিৰ্বাচনী যুজঁ খন বহু আকৰ্ষণীয় হব সেয়া প্ৰায় নিশ্চিত ।
