ধৰ্ষণৰ মিছা অভিযোগত কাৰাৰুদ্ধ হোৱা এগৰাকী যুৱকে অৱশেষত ন্যায় ভাল কৰিবলৈ সক্ষম হৈছে।
দহবছৰ পূৰ্বে এক ধৰ্ষণৰ মিছা অভিযোগত ৯৬ দিন পৰ্যন্ত কাৰাৰুদ্ধ হৈ জামিন লাভ কৰাৰ পিছতে নিৰ্দোষী যুৱকজনে যুঁজিছিল ন্যায় লাভৰ বাবে।
অৱশেষত আদালতে যুৱকজনক নিৰ্দোষী বুলি ঘোষণা কৰে আৰু তেওঁৰ বিৰুদ্ধে মিথ্যা অভিযোগ অনা যুৱতী গৰাকীৰ পৰিয়ালটোক ১৫ লাখ টকা ক্ষতিপূৰণ দিবলৈ নিৰ্দেশ দিছে।
নিৰ্দোষী উক্ত যুৱকজন হৈছে তামিলনাডুৰ ৰাজধানী চেন্নাইৰ সন্তোষ।
২০১০ চনত সন্তোষৰ বিৰুদ্ধে উত্থাপন কৰা হয় এটা ধৰ্ষণৰ অভিযোগ। উক্ত অভিযোগৰ ভিত্তিত সন্তোষে ৯৬ দিন কাৰাৰুদ্ধ হৈ আৰু পিছত জামিন লাভ কৰি মুকলি আকাশলৈ ওলাই আহে।
ইয়াৰ পিছতে নিৰ্দোষী যুৱকজনে এই ভুৱা তথা মিথ্যা অভিযোগৰ বিৰুদ্ধে চেন্নাই আদালতৰ দাৰস্থ হয়।
ঘটনাৰ বিৱৰণী অনুসৰি এক বন্ধুৰ পৰিয়ালৰ সৈতে সন্তোষৰ বিয়া ঠিক হৈছিল। কিন্তু সম্পত্তি বিবাদ সৃষ্টি হোৱাত তেওঁলোকৰ বিবাহ ভাঙি যায়।
সেই সময়ত এখন বেচৰকাৰী খণ্ডৰ অভিযান্ত্ৰিক প্ৰতিষ্ঠানত সন্তোষে ইঞ্জিনিয়াৰিঙ পঢ়ি আছিল।
তেনে সময়তে যুৱতী গৰাকীৰ পৰিয়ালে যুৱতী গৰাকীক অন্তঃসত্ত্বা হোৱা বুলি প্ৰকাশ কৰি সন্তোষ গৰ্ভস্থ সেই সন্তানটিৰ পিতৃ বুলি দাবী কৰে।
কিন্তু অভিযুক্ত সন্তোষ আৰু তেওঁৰ পৰিয়ালে সেই দাবী প্ৰত্যাখান কৰে।
যুৱতী গৰাকীৰ পৰিয়ালে ইয়াৰ পিছতে সন্তোষৰ বিৰুদ্ধে ধৰ্ষণৰ অভিযোগ আনি আৰক্ষী থানাত এজাহাৰ দাখিল কৰে।
আৰক্ষীয়ে ইঞ্জিনিয়াৰিঙৰ ছাত্ৰ সন্তোষক গ্ৰেপ্তাৰ কৰি জেইল হাজোতলৈ প্ৰেৰণ কৰে।
ইয়াৰ মাজতে ২০১০ চনৰ ফেব্ৰুৱাৰীৰ মাহত যুৱতী গৰাকীয়ে এগৰাকী কন্যা সন্তান জন্ম দিয়ে। কন্যা সন্তানটিৰ ডিএনএ পৰীক্ষা কৰাৰ পিছত স্পষ্ট হয় যে কন্যা সন্তানটিৰ পিতৃ সন্তোষ নহয়।
ইয়াৰ পিছতে ৬ বছৰীয়া ন্যায়িক যুঁজৰ পিছত ২০১৬ চনত মহিলা আদালতে সন্তোষক নিৰ্দোষী বুলি ঘোষণা কৰে।
এইবাৰ যুৱতী গৰাকীৰ পৰিয়ালৰ বিৰুদ্ধে ওলোটাই গোচৰ ৰুজু কৰি সন্মানহানিৰ ক্ষতিপূৰণ দাবী কৰে সন্তোষে।
ধৰ্ষণৰ মিছা অভিযোগেৰে কাৰাৰুদ্ধ কৰোৱা আৰু ভৱিষ্যৎ নষ্ট কৰাৰ অভিযোগ তুলি সন্তোষে যুৱতী গৰাকীৰ পৰিয়ালৰ পৰা ৩০ লাখ টকাৰ ক্ষতিপূৰণ দাবী কৰে।
আদালতে শেষত যুৱতী গৰাকীৰ পৰিয়ালক ১৫ লাখ টকাৰ ক্ষতিপূৰণ দিবলৈ নিৰ্দেশ দিয়ে। এইদৰে ন্যায় লাভ কৰে ধৰ্ষণৰ মিছা অভিযোগৰ বলি হৈ কাৰাৰুদ্ধ হোৱাৰ সন্তোষে।
