অসম বিধানসভা নিৰ্বাচনতে হওক বা তিৱা স্বায়ত্ত পৰিষদৰ নিৰ্বাচনতে হওক, মৰিগাঁও জিলাৰ ৮১ নং লাহৰীঘাট বিধানসভা সমষ্টিৰ আসনত বা বিধানসভা সমষ্টিটোৰ এলেকাত থকা তিৱা স্বায়ত্ত পৰিষদৰ আসনত স্থায়ী প্ৰাৰ্থীক অগ্ৰাধিকাৰ দিব মৰিগাঁও জিলাৰ লাহৰীঘাট অগপ সমষ্টি কমিটিয়ে।
লাহৰিঘাটৰ অমৰাগুৰীত দলটোৰ জিলা আৰু সমষ্টিৰ নেতৃত্বই এখন সংবাদ মেল সম্বোধন কৰি এই কথা স্পষ্ট কৰি দিয়ে।
সংবাদ মেল খনত উপস্থিত থাকে অগপৰ মৰিগাওঁ সমষ্টি কমিতিৰ সম্পাদক উপেন খাটনীয়াৰ, কেন্দ্ৰীয় কাৰ্যনিবাহক সদস্য যদু মনি পাতৰ, আৰু অগপৰ লাহৰীঘাট বিধান পৰিষদৰ সভাপতি গুলজাৰ হুছেইনকে ধৰি কেবাজনো জিলা আৰু সমষ্টি কমিতিৰ নেতা।
উল্লেখ্য যে প্ৰতিটো নিৰ্বাচনৰ সময়তে লাহৰীঘাটত একাংশ ভাড়াতীয়া নেতাই ভিৰ কৰেহি বিভিন্ন দলৰ টিকট বিছাৰি। বহু সময়ত এনে একাংশ নেতাই অগপৰ মজিয়াতো প্ৰৱেশ কৰি বিসম্বাদৰ বিজ ৰোপন কৰে বুলি কমিটিয়ে অভিযোগ কৰে।
তেওঁলোকে লগতে কয় যে, বৰ্তমানো পূৰ্বে দলত নাম গোন্ধ নথকা টিকট প্ৰত্যাশিয়ে একাংশ কৰ্মীক প্ৰলোভন দি লাহৰীঘাটত দলীয় অনুশাসন ভংগ কৰি নিৰ্বাচনী কুচকাৱাজ চলোৱা পৰিলক্ষিত হৈছে অগপৰ মজিয়াত। আনকি এনে দৌৰত নামি পৰিছে কৃষি বিভাগৰ এজন শীৰ্ষ বিষয়া।
কৃষি পথাৰ চোৱাৰ চলেৰে বিভিন্ন সজাগতা সভা আদিত অংশ গ্ৰহণ কৰি আব্দুল জলিল নামৰ এই বিষয়া জনে আনকি দলীয় সভাতো অংশ গ্ৰহণ কৰা ঘটনাই অগপৰ দলীয় মঞ্চত স্বাভাবিকতেই চৰ্চা লাভ কৰিছে।
দলীয় মঞ্চত এনে ধৰণৰ নাম গোন্ধ নথকা তথাকথিত ভাড়়াতীয়া প্ৰাৰ্থীৰ আগমৰ প্ৰতি লক্ষ্য ৰাখিয়ে শনিবাৰে সংবাদমেল খনত দলীয় নেতৃত্বই দলীয় টিকট প্ৰদানৰ ক্ষেত্ৰত এনে এক স্থিতি ঘোষণা কৰি সতৰ্ক কৰি দিয়াৰ দৰেহে যেন পৰিলক্ষিত হ’ল।
অৱশ্যে লাহৰীঘাট সমষ্টি এলেকাত থকা দুয়োটা তিৱা স্বায়ত্ব পৰিষদৰ সমষ্টিতো দলে স্থানীয় নেতাক প্ৰক্ষেপ কৰিব লাগিব বুলি দাবী কৰে।
তিৱা স্বায়ত্ব পৰিষদৰ নিৰ্বাচনত বিজেপিৰ সৈতে মিত্ৰতা হৈ আসন বুজাবুজি কৰিব নেকি বুলি সাংবাদিকে কৰা এক প্ৰশ্নৰ উত্তৰত সভাপতি গুলজাৰ হুছেইন আৰু কেন্দ্ৰীয় কাৰ্যনিবাহক সদস্য যদুমনি পাতৰে একেমুখে কয়, ‘এয়া নিৰ্ভৰ কৰিব কেন্দ্ৰীয় নেতৃত্বৰ ওপৰত।
অৱশ্যে আসন বুজাবুজি নহ’লে দুয়োটা সমষ্টিতে অগপৰ প্ৰাৰ্থী প্ৰক্ষেপ কৰিব বুলি মন্তব্য কৰে নে়তাদ্বয়ে।
