গোটেই বিশ্বতে কৰ’নাৰ সংহাৰ বৃদ্ধি পাইছে। চীনতো কৰ’নাৰ মাৰাত্মক প্ৰভাৱ পৰিছে। কিন্তু এই মহামাৰীৰ মাজতে চীনে এইবাৰ জনসংখ্যা বৃদ্ধিৰ কৌশলক লৈ পৰিকল্পনা চলাইছে।
দেশখনত জন্মৰ হাৰ বৃদ্ধি কৰাৰ বাবে নতুন নীতি গ্ৰহণ কৰিছে চীনে। চীনৰ চৰকাৰী সংবাদ মাধ্যমৰ বাতৰি অনুসৰি চীনত বয়স্ক লোকৰ সংখ্যা বৃদ্ধি পাইছে। এই সমস্যাৰ মোকাবিলা কৰিবৰ বাবে শিশু জন্ম দিয়াৰ সন্দৰ্ভত গুৰুত্ব আৰোপ কৰা হৈছে।
‘চাইনা ডেইলী’ৰ প্ৰতিবেদন অনুসৰি চীনত বয়সস্থ লোকৰ সংখ্যা দ্ৰুতভাৱে বৃদ্ধি পাইছে। ইয়াৰ লগতে বিশ্বৰ আন আন দেশৰ লগতে চীনো এতিয়ালৈকো কৰ’নাৰ সংকটৰ পৰা মুক্ত হোৱা নাই।
প্ৰতিবেদন অনুসৰি বৰ্তমান চীনত যিসকল দম্পতিয়ে শিশু জন্ম দিব বিচাৰিছে তেওঁলোকলৈ চৰকাৰে আৰ্থিক সহায়তা আগবঢ়াব।
বিশ্বৰ বৃহত্তম জনসংখ্যাৰ দেশ হ’লেও চীনত শিশুৰ জন্মত গুৰুত্ব দিয়া হৈছে যাতে দেশখনত যুৱকৰ অভাৱ নহয়। কিয়নো চীনত বাৰ্দ্ধক্যৰ গতি অতি বেছি।
উল্লেখ্য যে ১৯৭৮চনত চীনত ‘এটা সন্তান’ৰ নীতি ঘোষণা কৰা হৈছিল। এই নীতি উলংঘা কৰা দম্পতিক জৰিমনা পৰ্যন্ত বিহা হৈছিল। আনকি তেওঁলোকৰ চাকৰিও কাঢ়ি লোৱা হৈছিল। দেশখনত প্ৰচুৰ গৰ্ভপাতো কৰোৱা হৈছিল।
সেই সময়ত চীনত দৰিদ্ৰতা হ্ৰাস কৰাৰ লক্ষ্য বান্ধি লোৱা হৈছিল কিয়নো বৰ্দ্ধিত জনসংখ্যাই এক প্ৰচণ্ড ভাবুকিৰ সৃষ্টি কৰিছিল। পাছত ২০১৫চনত দেশখনে এইক্ষেত্ৰত ৰেহাই দিয়ে।
