নাগালেণ্ডত কুকুৰ মাংস বাণিজ্যিক আমদানি আৰু বিক্ৰী বন্ধ নহয়। গুৱাহাটী উচ্চ ন্যায়ালয়ৰ কোহিমা বেঞ্চে এই কথা ঘোষণা কৰিছে।
উল্লেখ্য যে যোৱা ২ জুলাইৰ পৰা নাগালেণ্ড চৰকাৰে নাগালেণ্ডত কুকুৰ মাংসৰ বাণিজ্যিক আমদানি আৰু বিক্ৰীত প্ৰতিবন্ধকতা আৰোপ কৰিছিল।
নাগালেণ্ডৰ চৰকাৰী সূত্ৰৰ মতে চলিত সপ্তাহতে গুৱাহাটী উচ্চ ন্যায়ালয়ৰ কোহিমা বেঞ্চে চৰকাৰৰ এই সিদ্ধান্তত স্থগিতাদেশ জাৰি কৰিছে।
চৰকাৰী সূত্ৰটোৰ মতে উচ্চ ন্যায়ালয়ে আদালতত যোৱা ২৪ ছেপ্টেম্বৰৰ ভিতৰত নাগালেণ্ড চৰকাৰক এই সন্দৰ্ভত এক শপতনামা দাখিলৰ নিৰ্দেশ দিছিল। কিন্তু নাগালেণ্ড চৰকাৰে আদালতত শপতনামা দাখিল নকৰিলে।
মৰাপাটৰ বস্তাত মাংসৰ বাবে কুকুৰৰ ভৰাই নিয়া এক ভিডিঅ’ চ’ছিয়েল মিডিয়াত ব্যাপকভাৱে ভাইৰেল হোৱাৰ পিছত যোৱা জুলাই মাহত নাগালেণ্ড চৰকাৰে নাগালেণ্ডত কুকুৰ মাংস বাণিজ্যিক আমদানি আৰু বিক্ৰী নিষিদ্ধ কৰিছিল।
উল্লেখ্য যে কুকুৰ মাংস হৈছে নগাসকলৰ অতি সুস্বাদু খাদ্যাভ্যাসৰ এক গুৰুত্বপূৰ্ণ অংশ।
২০১৬ চনত পশু অধিকাৰ কৰ্মীসকলে কুকুৰ মাংসৰ বাণিজ্যিক সংক্ৰান্তীয় এক আইনী জাননী নাগালেণ্ড চৰকাৰলৈ প্ৰেৰণ কৰিছিল।
নাগালেণ্ডত কুকুৰ মাংস বিক্ৰী নিষিদ্ধকৰণ বিৰোধিতা কৰাসকলে দাবী কৰি আহিছে নাগালেণ্ড চৰকাৰে কেবিনেট সিদ্ধান্তৰে এই নিষিদ্ধকৰণ জাপি দিছে যিটোত আইনী অনুমোদন নাই।
উল্লেখ্য যে উত্তৰ পূৱৰ অন্য এখন ৰাজ্য মিজোৰামেও যোৱা মাৰ্চ মাহত ৰাজ্যখনত কুকুৰ মাংসৰ বাণিজ্যিক আমদানি আৰু বিক্ৰী নিষিদ্ধ কৰিছিল।
